Read DIOSPA QHELQACHISQ Quechua 2 CRÓNICAS 21 Bible Online

2 CRÓNICAS 21 - DIOSPA QHELQACHISQ Quechua bible

2 CRÓNICAS 21

¹Josafat wañupuqtintaq Davidpa Llaqtan nisqapi p'ampapurqanku. Paypa rantinpitaq churin Joram kamachikurqan.

²Jorampa wawqenkunan kaykuna karqan: Azarías, Jehiel, Zacarías, Azaryau, Micael, Sefatiaspiwan. Llapan chaykunan karqan rey Josafatpa churinkuna.

³Paykunamanmi Josafatqa askha qorita, qolqeta, illakunatapas qorqan, hinallataq Judá suyupi pukara llaqtakunatapas. Joramtataq ichaqa kamachikuq kananpaq churarqan, pay phiwi churin kasqanrayku.

⁴Hinan Joramqa taytan Josafatpa rantinpi Judá suyupi kamachikurqan. Allinta kamachikuyninpi takyaykuspañataq llapan wawqenkunata wañurqachirqan, suyupi wakin umallikunatapas wañuchillarqantaq.

⁵Kamachikuyta qallarishaspaqa kinsa chunka iskayniyoq watayoqmi karqan, kamachikurqantaq Jerusalenmanta pusaq watata.

⁶Joramqa Israel reykuna hinan ruwarqan, Ahabpa ayllunpa ruwasqanta hina. Warminmi karqan Ahabpa ayllunmanta, Joramqa manapunin Señor Diospa munayninman hinachu ruwarqan.

⁷Chaywanpas Señor Diosqa manan Davidpa ayllunta ch'usaqyachiyta munarqanchu Davidwan rimanakusqan hawa, paymanmi Señor Diosqa prometesqa: Mirayniykiqa kamachikushallanqapunin, nispa.

⁸Joram kamachikushaqtinmi Edom runakunaqa Judá suyuq munaychakuynin contra sayarirqanku, hinaspa paykuna ukhumanta reyninkuta churakurqanku.

⁹Hinan Joramqa Edom suyuta pasarqan oficialninkunapiwan llapan carretakunantin. Edom runakunan paykunata muyuykurqanku, rey Joramtaq ichaqa carretakuna purichiqkunapiwan tuta lloqsispanku muyuykuq Edom soldadokunata qhochurparirqanku.

¹⁰Chay hinapin Edom runakunaqa Judamanta kacharichikapurqanku. Chay tiempollapitaqmi Libna llaqtapas Judá suyuq munaychakuynin contra sayarirqanku, ñawpa taytanpa Diosnin Señorta Joramqa mana servisqanrayku.

¹¹Joramqa Judá suyu orqokunapin wak'a dios yupaychana altarkunata sayarichirqan, ahinapin Jerusalenpi tiyaq runakunata wak'a diosta yupaychaspa waqlliyman tanqaykurqan, hinallataq llapan Judá runakunatapas pantachirqan.

¹²Chaymantataq Joramqa profeta Eliaspa qelqanta chaskirqan, chay qelqapin nisqa: David ñawpa taytaykiq Diosnin Señormi nin: Qanqa manan taytayki Josafat hinachu ruwarqanki, manataq Judá rey Asa hinapaschu,

¹³aswanpas Israel reykuna hinan ruwarqanki, hinaspa Jerusalenpi tiyaq runakunatapas Judá suyuntinpi tiyaq runakunatapas waqllichirqanki, imaynan Ahabpa ayllun huchallichirqan hinata. Hinallataq wañuchirqanki taytaykiq churin wawqeykikunata, paykunaqa qanmanta aswan allinkunan karqanku.

¹⁴Chayraykun suyuykipi llapan runakunata, wawaykikunata, warmiykikunata sinchitapuni muchuchisaq, tukuy kaqniykikunatapas chinkachisaq.

¹⁵Qantataq askha onqoykunawan muchuchisqayki, ch'unchulniykipin sinchi millay onqoy hap'isunki, aswan-aswanta chay onqoyniyki sinchiqtintaq ch'unchulniykiraq lloqsinqa, nispa.

¹⁶Hinan Señor Diosqa Filistea runakunata Etiopía suyuq qorpan Arabe runakunatawan tanqarirqan Jorampa awqan sayarinankupaq.

¹⁷Chaymi paykunaqa Judá suyuman phawaykuspa ch'eqeykurqanku, hinaspa reypa wasinmanta aparqanku hayk'an tarisqanku tukuy kaqninkunata, wawankunata, warminkunata ima. Llapan churinkunamantaqa sullk'akaq Ocoziasllañan qhepaykurqan.

¹⁸Tukuy chaykuna qhepatataq Señor Diosqa mana qhaliyaq onqoyta churaykurqan Jorampa ch'unchulninman.

¹⁹Chaymantataq iskay wataña onqoshaqtin aswan-aswanta onqoynin sinchisqan hawa ch'unchulnin lloqsirqan, hinan sinchi musphay nanayta muchuspa wañupurqan. Llaqtanqa manan ima q'apaqllatapas wañuqpa sutinpi kanarqanchu, imaynan ñawpa taytankunapaq ruwarqanku hinata.

²⁰Joramqa kamachikuyta qallarishaspa kinsa chunka iskayniyoq watayoqmi karqan, kamachikurqantaq Jerusalenmanta pusaq watata. Wañuqtinqa manan pipas waqarqanchu. P'ampapurqankutaq Davidpa Llaqtan nisqapi, ichaqa manan reykunata p'ampanapichu.