Read DIOSPA QHELQACHISQ Quechua 2 CRÓNICAS 25 Bible Online

2 CRÓNICAS 25 - DIOSPA QHELQACHISQ Quechua bible

2 CRÓNICAS 25

¹Amasiasqa iskay chunka phisqayoq watayoqmi karqan kamachikuyta qallarishaspa, kamachikurqantaq Jerusalenmanta chunka iskayniyoq watata. Maman Joadanqa Jerusalenmantan karqan.

²Amasiasqa Señor Diospa munayninman hinan chaninta ruwarqan, ichaqa manapunin tukuy sonqochu.

³Suyu kamachiyninpi atiyniyoqña kashaspan, taytan rey Joasta wañuchiq oficialkunata wañuchirqan.

⁴Ichaqa manan churinkunataqa wañuchirqanchu, Moisespa qelqasqan kamachikuy simipin Señor Diosqa kamachisqa: Taytakunaqa manan churinkuq huchanmanta wañuchisqachu kanqa, churikunapas manan taytankuq huchanmanta wañuchisqachu kanqa, aswanpas sapankan kikinkuq huchankumanta wañunqaku, nispa. Chayraykun mana wañuchirqankuchu.

⁵Chaymantataq Amasiasqa llapan Judá runakunata huñuykuspa ayllukunaq mirayninman hina Judá ayllupi Benjamín ayllupi churarqan waranqa soldadoq umallinkunata, pachak soldadoq umallinkunatawan. Iskay chunka watayoqmanta wichaymantaq qharikunata yuparqan, hinaspan tarirqan awqa-tinkuyman riy atiq kinsa pachak waranqa qharikunata, paykunaqa kusatan yacharqanku lanzawan escudowan maqanakuyta.

⁶Hinallataq Israel suyumanta kinsa waranqa kinsa pachak kilo qolqewan mink'akurqan pachak waranqa allin maqanakuq qharikunata.

⁷Hinan Diospa profetanqa Amasiasman rispa nirqan: — Reyníy, Israel suyu ejercitoqa ama qanpa ejercitoykiwan maqanakuyman richunchu, manan Señor Diosqa Israel runakunawanpas Efraín llapa aylluwanpas kanchu.

⁸Mana kasukuspachus paykunawan awqa-tinkuq rinki chayqa, anchataña kallpachakushaspapas manapunin atipankichu, aswanpas Diosmi awqaykiwan atipachisunki, Diosmi atiyniyoq yanapanasuykipaqpas awqaykiwan atipachinasuykipaqpas, nispa.

⁹Hinan Amasiasqa Diospa profetanta nirqan: — ¿Imanasaqtaq Israel ejercitoman kinsa waranqa kinsa pachak kilo qolqe qosqaytari? nispa. Diospa profetantaq kutichirqan: — Señor Diosqa atiyniyoqmi chay qolqemantapas aswan askhataraq qonasuykipaq, nispa.

¹⁰Chaymi Amasiasqa Efrainmanta hamuq ejercitota paypa ejercitonmanta t'aqarqan, hinaspa wasinkuta kachapurqan. Chay soldadokunataq Judá suyu contra sinchi phiñasqa wasinkuman kutipurqanku.

¹¹Chaymantataq Amasiasqa kallpacharikuspa soldadonkunapiwan Kachi Wayq'ota puririrqanku, hinaspa Edom runakunawan maqanakuspa chunka waranqata wañuchirqanku.

¹²Chunka waranqa qharikunatataq presota hap'ispa qaqa-qaqa orqo pataman aparqanku, hinan chaymanta tanqaykuspa qaqapaykachirqanku, chaymi llapan chay chunka waranqa qharikuna wañupurqanku.

¹³Chaykamataq Amasiaspa awqa-tinkuyman riysinanta mana munaspa kutichipusqan Israel soldadokuna llapan Judá llaqtakunaman llat'anaq phawaykurqanku, Samaria llaqtamanta Bet-horón llaqtakama, hinaspa kinsa waranqa runakunata wañuchirqanku, askha kaqninkunatataq llat'anaspa aparqanku.

¹⁴Amasiasqa Edom suyu runakunata wañuchisqanmanta kutimpuspanmi diosninkunata apakurqan. Hinaspa chaykunata diosnin kananpaq churakurqan, yupaychaspataq sacrificiota chaykunaman ruphachirqan.

¹⁵Chaymi Señor Diosqa Amasías contra sinchita phiñakurqan, hinan huk profetata kacharqan. Paymi nirqan: — ¿Imanaqtintaq wak suyu dioskunata servinki, yupaychaqnin runakunatapas makiykimanta mana qespichishaqtinqa? nispa.

¹⁶Chayta rimashallaqtinraqmi Amasiasqa chay profetata nirqan: — ¿Hayk'aqmantataq qanri reypa yuyaychaqnin kashanki? Upallakuy mana wañuchinata munaspaqa, nispa. Chaymi profetaqa tukuykuspa nirqan: — Mana chanintan ruwarqanki, yuyaychasqaytapas manan kasukurqankichu, chaymi Diosqa yuyaykurqan qan wañuchiyta, chaytaqa allintapunin yachani, nispa.

¹⁷Chaymantataq Judá rey Amasiasqa yuyaychaqninkunawan rimanakuspa, Jehupa nieton Joacazpa churin Israel rey Jehoasman willaqta kacharqan: Qhari kaspaykiqa, hamuy tinkusun, nispa niqta.

¹⁸Hinan Israel rey Jehoasqa Judá rey Amasiasman willaqta kacharqan: Huk kutinsi Libanopi huk kisa cedro sach'aman kachasqa: Ususiykita qopuway churiypa warminpaq, nispa. Ichaqa huk phiña animalsi chayninta purispa chay kisata sarurqapusqa.

¹⁹Arí, qanqa ninkin: Edom runakunatan atiparqoni, nispa, chaywantaq anchaykachanki. Allinmi, hatunchakullay, chaywanpas wasillaykipi qhepakuy. ¿Imapaqtaq maskhawaq qan kikiykipaq llakikuyta, hinallataq Judá suyu runakunaq llakikuynintapas? nispa.

²⁰Amasiastaq ichaqa mana kasurparirqanchu, Diospunin chayta unancharqan Jehoasman hap'ichinanpaq, Edom suyu dioskunata servisqan hawa.

²¹Hinan Israel rey Jehoasqa puririrqan Judá suyupi kashaq Bet-semespi maqanakunankupaq, hinaspa Judá rey Amasiaswan maqanakurqanku.

²²Judá suyutaqa Israel suyun atiparqan, chaymi Judá runakunaqa sapanka wasinkuman ayqekapurqanku.

²³Israel rey Jehoastaq Judá rey Amasiasta Bet-semespi presota hap'irqan, chaymantataq Jerusalenman aparqan, chaypin llaqta muyuriq perqata thunirqan pachak pusaq chunka metrota, Efraín Punkumanta Esquina Punkukama.

²⁴Munaychakuspataq hayk'an tarisqan qorita, qolqeta, Dios yupaychana wasipi Obed-edompa waqaychasqan tukuy t'aqa serviciokunata, reypa wasinpi qhapaq kaykunatawan aparqan. Chaymantataq wakin runakunata presota apaspa Samariaman kutipurqan.

²⁵Joaspa churin Judá rey Amasiasqa chunka phisqayoq watataraqmi kawsarqan, Joacazpa churin Israel rey Jehoaspa wañupusqan qhepataqa.

²⁶Amasiasmanta wakin willakuykunaqa qallariymanta tukukuykama Judá Reykunaq Israel Reykunaq Willakuynin Qelqapi qelqasqan kashan.

²⁷Amasiaspa Señor Diosmanta t'aqarikusqan p'unchaymantapachan Jerusalén llaqtapiqa wakin runakuna Amasías contra rimanakurqanku, chaymi Amasiasqa Laquisman ayqekapurqan, ichaqa chay llaqtamanmi runakunata kacharqanku hap'imunankupaq, chaypin wañuchirqanku.

²⁸Chaymantataq caballopi ayata aparqanku, hinaspa Davidpa Llaqtan nisqapi p'ampapurqanku ayllunpa aya p'ampananpi.