Read DIOSPA QHELQACHISQ Quechua 2 CRÓNICAS 27 Bible Online

2 CRÓNICAS 27 - DIOSPA QHELQACHISQ Quechua bible

2 CRÓNICAS 27

¹Jotamqa iskay chunka phisqayoq watayoqmi karqan kamachikuyta qallarishaspa, kamachikurqantaq Jerusalenmanta chunka soqtayoq watata. Maman Jerusaqa Sadocpa ususinmi karqan.

²Jotamqa Señor Diospa munayninman hinan chaninta ruwarqan, taytan Uziaspa ruwasqankunata hina, Señor Dios yupaychana wasimanmi ichaqa incienso q'apachiq mana haykurqanchu. Chaywanpas suyupi runakunaqa huchallikushallarqanpunin.

³Paymi ruwachirqan Señor Dios yupaychana wasi wichay lado punkuta, Ofel cheqaspi kaq perqatataq allinta perqaparqan.

⁴Hinallataq Judá suyu orqo-orqokunapi llaqtakunata sayarichirqan, sach'a-sach'akunapitaq pukarakunata torrekunata ima sayarichirqan.

⁵Chaymantataq Jotamqa Amón suyu reywan maqanakurqan, hinaspa Amón runakunata atiparqan. Chaymi Amón suyu runakunaqa chay wata Jotamman pagarqanku kinsa waranqa kinsa pachak kilo qolqeta, chunka waranqa fanega trigota, chunka waranqa fanega cebadatawan. Chhaynatakaman iskaykaq watapas kinsakaq watapas pagarqanku.

⁶Jotamqa allin atiyniyoqmi kapurqan, Diosnin Señor Diospa munayninta ruwaspallapuni kawsasqanrayku.

⁷Jotammanta wakin willakuykunaqa, maqanakusqanmanta, tukuy ruwasqankunamantapas Judá Reykunaq Israel Reykunaq Willakuynin Qelqapi qelqasqan kashan.

⁸Jotamqa iskay chunka phisqayoq watayoqmi karqan kamachikuyta qallarishaspa, kamachikurqantaq Jerusalenmanta chunka soqtayoq watata.

⁹Wañukapuqtintaq Davidpa Llaqtan nisqapi p'ampapurqanku. Chay qhepatataq churin Ahaz rantinpi kamachikurqan.