Read DIOSPA QHELQACHISQ Quechua 2 CRÓNICAS 30 Bible Online

2 CRÓNICAS 30 - DIOSPA QHELQACHISQ Quechua bible

2 CRÓNICAS 30

¹Rey Ezequiasmi willaqkunata kacharqan Israel suyuntinman Judá suyuntinmanwan. Efraín aylluman Manasés ayllumanwantaq qelqata apachirqan Jerusalenman hamuspa Señor Dios yupaychana wasipi Pascua Fiestata ruwanankupaq.

²Hinan reypa oficialninkunapiwan llapa huñuykusqa runakunapiwan Jerusalén llaqtapi rimanakurqanku iskaykaq killapi Pascua Fiestata ruwanankupaq.

³Judá suyu runakunaqa Pascua Fiestata manan ñawpaqkaq killapi unanchasqa p'unchaypi ruwayta atirqankuchu, pisillaraq ch'uyanchasqa sacerdotekuna kasqanrayku, runakunapas manaraq Jerusalén llaqtapi huñukusqankuraykupiwan.

⁴Chay yuyaykusqankun reymanpas llapan runakunamanpas allinpuni rikch'akurqan.

⁵Hinan llapa Israel runakunaman willachiyta yuyaykurqanku Beersebamanta Dankama, Jerusalén llaqtaman hamuspanku Israelpa Diosnin Señorpa sutinpi Pascua Fiestata ruwanankupaq, unayñan chay fiestataqa mana iman ruwanankuta hinachu ruwarqanku.

⁶Chaymi reyqa oficialninkunapiwan cartakunata qelqarqanku, hinan chaskikunaqa reypa kamachisqan kaspa Israel suyuntinman Judá suyuntinman cartakunata aparqanku. Chay cartakunan khaynata nirqan: Asiria reykunaq apananmanta puchuq Israel runakuna, Abrahampa, Isaacpa, Jacobpa Diosnin Señorman kutirikuychis, hinan paypas qankunaman kutirimusunkichis.

⁷Amayá ñawpa taytaykichis hinaqa, wawqeykichis hinapas kaychischu, paykunan Señor Diosta wasancharqanku, chaymi payqa sinchitapuni paykunata muchuchirqan, imaynan kunan rikushankichis hina.

⁸Chhaynaqa, ama ñawpa taytaykichis hinaqa k'ulluchakuychischu, Señor Diosta kasuychis. Pay yupaychana wasiman hamuychis, chaytan Señor Diosqa wiñaypaq sapaqcharqan. Diosniykichis Señor Diosta serviychis, hinan payqa manaña qankunapaq phiñakunqachu.

⁹Señor Diosman kutirikuqtiykichisqa preso apasqa wawqeykichiskunata, churiykichiskunatapas preso apaqninkunaqa sumaqtan qhawarinqaku. Hinan kay suyuman kutimpunqaku, Diosniykichis Señor Diosqa ancha khuyapayakuqmi, sumaq sonqotaqmi. Payman kutirikuqtiykichisqa manan wikch'usunkichischu, nispa.

¹⁰Chaskikunataq phawarqanku Efraín ayllunta, Manasés ayllunta, llaqtan-llaqtanta Zabulón aylluman chayanankukama, runakunataq ichaqa chaskikunata asipayaspa burlakurqanku.

¹¹Chaywanpas Aser ayllu wakin runakuna, Manasés ayllu wakin runakuna, Zabulón ayllu wakin runakunapas huch'uyyaykukurqankun, hinaspan Jerusalén llaqtata rirqanku.

¹²Judá suyu runakunatataq sonqonkuta Señor Dios kuyurichirqan, hinan llapan runakuna ch'ulla yuyaylla kasukurqanku Señor Diospa siminman hina rey Ezequiaspa oficialninkunantin kamachisqanta.

¹³Hinan iskaykaq killapi Jerusalén llaqtapi sinchi askha runakuna huñukurqanku Mana Qonchuyoq T'anta Fiestata ruwanankupaq.

¹⁴Hinaspa usqhaylla Jerusalenpi kaq altarkunata thunirqanku, chhaynallataq incienso q'apachina llapan altarkunatapas, hinaspa Cedrón mayuman wikch'umurqanku.

¹⁵Iskaykaq killapi chunka tawayoq p'unchaypitaq Pascua Fiesta borregokunata nak'arqanku. Hinan sacerdotekunapas Leví runakunapas mana ch'uyanchakusqankumanta anchata p'enqakurqanku, chaymi ch'uyanchakuspanku Señor Dios yupaychana wasiman ruphachina sacrificiota aparqanku.

¹⁶Paykunaqa llank'ananku t'aqapin llank'ayta qallarirqanku Diospa kamachin Moisespa kamachikuyninman hina. Sacerdotekunataq Leví runakunamanta yawarta chaskispa altarta ch'aqchurqanku.

¹⁷Chay huñukuypiqa askha runakunan mana ch'uyanchasqa kaspanku Pascua borregonkuta mana nak'ayta atirqankuchu, chaymi Leví runakunaqa llapan chay mana ch'uyanchasqa runakunaq borregonkuta nak'apurqan, chay borregokuna Señor Diospaq t'aqasqa kananpaq.

¹⁸Askha runakunan mana ch'uyanchasqa karqanku, astawanqa Efraín ayllumanta, Manasés ayllumanta, Isacar ayllumanta, Zabulón ayllumantawan. Chaymi paykunaqa mana kamachikuyman hinachu Pascua Fiesta borregokunata mikhurqanku. Chayraykun Ezequiasqa paykunapaq mañapurqan: Señor Diosníy, hatun khuyakuyniykiman hina pampachaykuy hayk'achus tukuy sonqo qanta maskhaqkunata. Qanqa ñawpa taytankuq Diosninmi kanki.

¹⁹Ruwanaman hina mana ch'uyanchasqaña kaqtinkupas chaskiykullaypuni, nispa.

²⁰Señor Diostaq Ezequiaspa mañakusqanta uyarirqan, hinan llapa runakunata huchankumanta pampacharqan.

²¹Ahinatan Jerusalenpi kashaq Israel runakunaqa ancha kusisqa qanchis p'unchayta Mana Qonchuyoq T'anta Fiestata ruwarqanku, sacerdotekunataq Leví runakunapiwan sapa p'unchay Señor Diosta yupaycharqanku ancha allin tocanakunata tocaspanku.

²²Chaymi Ezequiasqa Señor Diosta serviypi allin yuyaywan kusa tocaq llapan Leví runakunata sumaq simikunawan kallpacharqan. Qanchis p'unchaymi runakunaqa ñawpa taytankuq Diosnin Señorta yupaychaspanku, sumaq kawsay sacrificiokunata haywarqanku, hinaspan chay sacrificiokunamanta mikhurqanku.

²³Chaymantataq paykuna yuyaykurqanku qanchis p'unchaytawanraq fiesta ruwayta, chaymi qanchis p'unchaytawan ancha kusisqa fiestata ruwarqanku.

²⁴Judá rey Ezequiasmi llapa huñuykusqa runakunaman qorqan waranqa torillota qanchis waranqa ovejatawan, umallikunapas qollarqantaq waranqa torillota, chunka waranqa ovejatawan. Askha sacerdotekunataq ch'uyanchakurqanku.

²⁵Anchatan kusikurqanku llapa Judá runakuna, sacerdotekuna, Leví runakuna, Israel suyumanta hamuq llapan runakuna, Israel suyupi tiyaq Judá suyupi tiyaq karu llaqtayoqkunapas.

²⁶Jerusalén llaqtapin ancha hatun kusikuy q'ochukuy karqan, Israel rey Davidpa churin Salomonpa tiemponmantapacha mana chay hina fiesta Jerusalenpi kasqanrayku.

²⁷Chaymantataq sacerdotekunaqa Leví runakunapiwan sayarispanku llapa huñuykusqa runakunata samincharqanku, hinan hanaq pacha ch'uya wasipi kaq Dios mañakusqankuta uyarirqan.