Read DIOSPA QHELQACHISQ Quechua 2 CRÓNICAS 31 Bible Online

2 CRÓNICAS 31 - DIOSPA QHELQACHISQ Quechua bible

2 CRÓNICAS 31

¹Chay fiesta lliw tukukapuqtintaq fiestapi kaq llapan Israel runakuna Judá suyuq llaqtankunata puririrqanku, hinaspa yupaychana saywa rumikunata p'akirqanku, Asera diosaq rikch'ayninkunatapas thunirqanku. Hinallataq Judapi, Benjaminpi, Efrainpi, Manasespiwan kashaq llapan wak'a dios yupaychana cheqaskunata altarkunatapas lliwta thunirqanku. Chaymantataq paykunaqa llaqtankuman kutipurqanku, sapanka hallp'ankumankama.

²Ezequiasqa wakmantan sacerdotekunata Leví runakunatawan tupaqninkuman hina t'aqa-t'aqata llank'anankuman churarqan. Paykunatan churarqan ruphachina sacrificiota sumaq kawsay sacrificiotawan haywanankupaq, yupaychana wasipi graciasta qonankupaq yupaychanankupaq, punkukunata qhawanankupaqwan.

³Rey Ezequiasqa Señor Diospa kamachikuynin qelqaman hinan qhapaq kayninmanta qorqan ch'isin paqar ruphachina sacrificiopaq, samana p'unchaykunapi ruphachina sacrificiopaq, Mosoq Killa Fiestapi ruphachina sacrificiopaq, hatun fiestakunapi ruphachina sacrificiopaqwan.

⁴Jerusalén llaqtapi tiyaq llapan runakunatataq kamachirqan sacerdotekunaman Leví runakunamanwan tupaqninkuta qonankupaq, ahinapi paykuna Señor Diospa kamachikuyninman hina mana kuyurispa llank'anankupaq.

⁵Chay kamachikuy ch'eqeriqtinmi Israel runakunaqa mana mich'akuspa ñawpaqkaq rurumanta qorqanku: trigota, vinota, aceiteta, miel misk'ita, hayk'an chakra llank'asqanku rurukunatawan, hinallataq tukuy kaqninkumanta diezmonkuta askhatapuni aparqanku.

⁶Chhaynallataq Judá suyuq llaqtankunapi tiyaq Israel runakunapas Judá runakunapas wakamanta, ovejamanta, cabramantawan diezmonkuta qorqanku, hinallataq chakrankuq rurunmantapas diezmonkuta aparqanku Diosninku Señor Diospaq t'aqasqa kananpaq, hinaspan chaykunata qotu-qotuta churarqanku.

⁷Kinsakaq killapin diezmonku qotuyta qallarirqanku, qanchiskaq killapitaq tukurqanku.

⁸Ezequiastaq oficialninkunapiwan diezmo huñusqanku qhawaq rirqanku, hinaspa chaykunata rikuspa Señor Diosta yupaycharqanku, Israel llaqtatataq samincharqanku.

⁹Ezequiastaq sacerdotekunata Leví runakunatawan tapuykurqan chay diezmo huñusqankumanta.

¹⁰Hinan Sadocpa ayllunmanta uma sacerdote Azariasqa kutichirqan: — Señor Diospa yupaychana wasinman apamuyta qallarisqankumantapachan ñoqaykuqa saksata mikhuyku, chaywanpas askhapunin puchun, llaqtanta Señor Dios saminchasqanrayku, chaymi kay askha ofrendakuna puchuykun, nispa.

¹¹Hinan Ezequiasqa kamachikurqan Señor Dios yupaychana wasipi kaq waqaychana wasikunata wakichinankupaq. Chay wasikunata wakichispankutaq

¹²chayman makilla waqaycharqanku sacerdotekunapaq kaq ofrendakunata, diezmokunata, Señor Diospaq t'aqasqakunatapas. Chayta waqaychaqpaqtaq Leví runa Conaniasta umalli kananpaq churarqanku, wawqen Simeitataq payman qatiq umallita.

¹³Rey Ezequiasmi yupaychana wasipi umalli Azariaspiwan churarqanku: Jehielta, Azaziasta, Nahat-ta, Asaelta, Jeremot-ta, Jozabadta, Elielta, Ismaquiasta, Mahat-ta, Benaiatawan paykunaq kamachinkupi llank'anankupaq.

¹⁴Inti Lloqsimuy nisqa Punku qhawaq Leví ayllumanta Imnaq churin Coretaq Diosman sumaq sonqo ofrendakunata, Señor Diospaq t'aqasqa ofrendakunata, ancha ch'uya ofrendakunatawan chaskinanpaq rakinanpaqwan churasqa karqan.

¹⁵Sacerdotekunaq tiyasqan llaqtakunapin Corepa llank'aqmasinkuna karqan Edén, Miniamín, Jesúa, Semaías, Amarías, Secaniaspiwan. Paykunan sacerdote-masinkuman t'aqankuman hina tupaqninta kurakmanpas sullk'amanpas kuskata makilla rakirqanku.

¹⁶Kinsa watayoqmanta wichayman sacerdote t'aqa miraypi qelqasqakunaman tupaqninkuta rakirqanku, ahinatan chaskirqanku Señor Dios yupaychana wasita t'aqa-t'aqa llank'ayninkuman hina riqkuna.

¹⁷Sacerdotekunan ayllunkuman hina qelqasqa karqanku, Leví runakunataq iskay chunka watayoqmanta wichayman qelqasqa karqanku t'aqankuman hina, llank'anankuman hina.

¹⁸Paykunaqa llapan familiantinmi qelqasqa karqanku: Erqenkunantin warminkunantin, churinkunantin, ususinkunantin. Tupaqninkuta chaskinankupaqmi sacerdotekunapas Leví runakunapas ch'uyanchasqaña karqanku.

¹⁹Aaronpa miraynin wakin qharikunan sacerdotekunaq tiyasqan llaqtakunaq muyuriqninpi tiyarqanku, chaymi sapanka llaqtapi huk sacerdote churasqa karqan paykunaman tupaqninta rakinanpaq. Hinallataq chay sacerdoteqa rakirqan mirayninkuman hina qelqasqa Leví runakunamanpas.

²⁰Chhaynatan Ezequiasqa Judá suyuntinpi ruwarqan. Diosnin Señor Diospa munayninman hina chaninta, cheqaqta, allinta ruwarqan.

²¹Ezequiasqa Diospaqmi hunt'aq-kaywan tukuy sonqowan yupaychana wasipi llank'ayta lliwta ruwarqan, hinallataq Diospa kamachikuyninkunata yachachikuyninkunatapas kasukurqan, chaymi payqa tukuy imapi allin karqan.