Read DIOSPA QHELQACHISQ Quechua 2 CRÓNICAS 36 Bible Online

2 CRÓNICAS 36 - DIOSPA QHELQACHISQ Quechua bible

2 CRÓNICAS 36

¹Judá suyu runakunan Josiaspa churin Joacazta taytanpa rantinpi Jerusalenpi reyta churarqanku.

²Joacazqa iskay chunka kinsayoq watayoqmi karqan kamachikuyta qallarishaspa, kamachikurqantaq Jerusalenmanta kinsa killata.

³Egipto rey Necaotaq Jerusalenpi kashaq Joacaztaqa kamachikuyninmanta horqorqan, hinaspa Judá suyu runakunata kamachirqan kinsa waranqa kinsa pachak kilo qolqeta, kinsa chunka kinsayoq kilo qoritawan contribucionta paganankupaq.

⁴Rey Necaoqa Joacaztan presota hap'ispa Egiptoman aparqan, Judá suyuta Jerusalentawan kamachiqtataq Joacazpa wawqen Eliaquimta churarqan, suticharqantaq Joacim sutiwan.

⁵Joacimqa iskay chunka phisqayoq watayoqmi karqan kamachikuyta qallarishaspa, kamachikurqantaq Jerusalenmanta chunka hukniyoq watata. Payqa manapunin Señor Diospa munayninman hinachu ruwarqan.

⁶Chaymi Babilonia rey Nabucodonosorqa suyuta munaychakuq phawaykuspa, Joacimta cadenawan watasqata Babiloniaman presota aparqan.

⁷Nabucodonosorqa apallarqantaq Señor Dios yupaychana wasipi serviciokunata, hinaspa Babiloniapi yupaychana wasiman chay serviciokunata churarqan.

⁸Joacimmanta wakin willakuykuna, millay mana chanin ruwasqankuna, tukuy huchallikusqankunapas Israel Reykunaq Judá Reykunaq Willakuynin Qelqapi qelqasqan kashan. Rantinpitaq churin Joaquín kamachikurqan.

⁹Joaquinqa chunka pusaqniyoq watayoqmi karqan kamachikuyta qallarishaspa, kamachikurqantaq Jerusalenmanta kinsa killa chunka p'unchayta. Payqa manapunin Señor Diospa munayninman hinachu ruwarqan.

¹⁰Chiri tiempo qhepatataq rey Nabucodonosorqa kacharqan Babiloniaman presota Joaquinta apanankupaq, Señor Dios yupaychana wasipi sumaq illakunatawan apanankupaq. Judá suyuta Jerusalentawan kamachiqtataq Joaquinpa tion Sedequiasta churarqan.

¹¹Sedequiasqa iskay chunka hukniyoq watayoqmi karqan kamachikuyta qallarishaspa, kamachikurqantaq Jerusalenmanta chunka hukniyoq watata.

¹²Payqa manapunin Diosnin Señor Diospa munayninman hinachu ruwarqan, profeta Jeremiasña Señor Diospa siminta rimaykushaqtinpas payqa manapunin huch'uyyaykukurqanchu.

¹³Nabucodonosorqa Diospa sutinpin Sedequiasta jurachirqan payman hunt'aqllapuni kananpaq, chaywanpas Sedequiasqa Nabucodonosor contran sayarirqan. Payqa sinchi k'ullu mana kasukuqmi karqan, manataq Israelpa Diosnin Señorman kutirikuytapas munarqanchu.

¹⁴Hinallataq llapan sacerdote umallikunapas, llapan llaqta runakunapas aswantaraq huchallikurqanku, wak suyu runakunaq millay mana chanin ruwasqantan paykunapas ruwallarqankutaq. Ahinapin Jerusalenpi Señor Diospa ch'uyanchasqan yupaychana wasita qhellicharqanku.

¹⁵Ñawpa taytankuq Diosnin Señortaq tukuy tiempo kamachinkunata kachaspa rimaykachirqan, llaqtanta yupaychana wasitawan khuyapayasqanrayku.

¹⁶Paykunataq ichaqa Diospa kachasqankunata asipayarqanku, hinaspa rimaykusqanku simitapas pisichaspa profetakunamanta burlakurqanku. Chayraykun Señor Diospa phiñakuyninqa paykuna contra rawrarirqan, manataq imaynamantapas qespikuyta atirqankuñachu.

¹⁷Chaymi Señor Diosqa paykuna contra Babilonia reyta kachamurqan, hinan chay reyqa yupaychana wasipi kashaq waynakunata wañuchirqan, chaymantataq mana khuyapayaspa llapanta waynatapas sipastapas kurak runatapas sinchi yuyaqtapas wañuchirqan. Diosmi paykunataqa llapallankuta Babilonia reyman hap'ichirqan.

¹⁸Babiloniamanmi aparqan Dios yupaychana wasipi hayk'an kaqta hatuntapas huch'uytapas, qhapaq kaykunatapas, hinallataq reypa wasinpi qhapaq kaykunatapas, umallikunaq wasinkupi qhapaq kaykunatapas.

¹⁹Dios yupaychana wasitataq ninawan kanaykurqanku, Jerusalén llaqta muyuriq perqatapas lliwta thunirqanku, tukuy qhapaq wasikunatapas ninawan kanaykurqanku, tukuy chaypi allinkaqkunatapas chhalluykurqanku.

²⁰Mana wañuchisqa runakunatataq Babiloniaman presota aparqan, hinan chay runakunaqa Nabucodonosorpa kamachin, churinkunaq kamachin kapurqanku, Persia rey Babilonia suyuta munaychakunankama.

²¹Ahinapin Señor Diospa simin hunt'akurqan, payqa Jeremiaswanmi willachirqan: Kay suyu hallp'aqa purunyachisqa kaspanmi samanqa qanchis chunka watata, Israel runakunaq mana samachisqan watakuna hunt'akunankama, nispa.

²²Persia rey Ciro kamachikuyta qallarisqan watapin Señor Diosqa siminta hunt'achirqan Jeremiaswan ñawpaqta willachisqanman hina. Señor Diosmi Ciroq sonqonta kuyurichirqan, chaymi payqa kamachikurqan simipipas qelqapipas suyuntinpi khaynata willanankupaq,

²³Persia rey Ciron nin: Hanaq pacha Señor Diosmi llapan kay pachapi suyukunata qowan, kamachiwantaq Judá suyupi kashaq Jerusalén llaqtapi yupaychana wasita paypaq sayarichipunaypaq. Hayk'an Diospa llaqtanmanta kaypi kashaqkuna Jerusalén llaqtaman puririchunku, Diosninku Señor Diostaq paykunawan kachun, nispa.