Read DIOSPA QHELQACHISQ Quechua 2 CRÓNICAS 4 Bible Online

2 CRÓNICAS 4 - DIOSPA QHELQACHISQ Quechua bible

2 CRÓNICAS 4

¹Ruwachillarqantaqmi Salomonqa huk bronce altarta, wask'anmanpas anchonmanpas isqon metrotakama, sayayninmantaq tawa metro kuskanninta.

²Unuyachisqa broncemanta hatun muyu qochata ruwachirqan. Huk wirp'amanta huk wirp'akamataq tawa metro kuskannin karqan, sayaynintaq iskay metro iskay chunka phisqayoq centímetro karqan, muyuntaq chunka kinsayoq metro kuskannin karqan.

³Unu qochaq muyuriq wirp'an urapi toroq rikch'aynin iskay wachu ruwasqa karqan, iskay chunka toro rikch'aykuna sapanka metropi. Chay rikch'aykunaqa qochawan k'aska hich'asqan karqan.

⁴Qochaqa chunka iskayniyoq sayashaq bronce toro patapin tiyarqan, chay torokunan qhawarqan kinsa wichayta, kinsa urayta, kinsa inti lloqsimuyta, kinsataq inti haykuyta, qhepa chakinkunaqa qochaq tiyananpin karqan.

⁵Qochaq rakthanqa huk t'aqllan karqan, wirp'antaq hawaman q'empisqa karqan, hamanq'ay t'ika hina. Chay qochaqa soqta chunka soqtayoq waranqa litro unutan chaskirqan.

⁶Chunka huch'uy qochakunatan ruwachirqan, chaykunatan churarqan yupaychana wasiq uray ladonpi phisqata, wichay ladonpitaq phisqata. Chaykunaqa ruphachina sacrificiota maqchinapaqmi karqan. Hatun qochaqa sacerdotekunaq mayllikunanpaqmi karqan.

⁷Kamachikuyman hina chunka candelerota qorimanta ruwachirqan, chaykunatan yupaychana wasiman churarqan, phisqata uray ladoman, phisqatataq wichay ladoman.

⁸Ruwachillarqantaq chunka mesata, hinaspa yupaychana wasiman churarqan, phisqata uray ladoman, phisqatataq wichay ladoman. Ruwachillarqantaq pachak qori puruñakunatapas.

⁹Sacerdotekunapaq patiota ruwachirqan, hinallataq hatun patiotapas punkunkunatawan, chay punkukunatataq broncewan qatachirqan.

¹⁰Hatun qochataqa churarqan yupaychana wasi uray ladowan inti lloqsimuy ladowan tupay cheqasmanmi.

¹¹Hiram-abiqa ruwallarqantaqmi mankakunata, palakunata, puruñakunatawan. Ahinatan Hiram-abiqa Diospa wasinpaq Salomonpa tukuy ruwachisqanta tukurqan.

¹²Chaykunan karqan: iskay tusakuna, tusaq umanpi kaq iskay muyu pillukuna, sapanka pilluta qatanapaq cadena awasqakuna,

¹³chaykunaman warkunapaq iskay wachu granadakuna (sapanka wachu iskay pachak granadakunayoq, chay awasqakunapin granada warkusqa pilluq q'ompunta qatarqan),

¹⁴chunka carretakuna, carretakunapaq chunka huch'uy qochakuna,

¹⁵chunka iskayniyoq toro patapi hatun qocha,

¹⁶mankakuna, palakuna, trinchekunapiwan. Señor Diospa wasinpaq Salomonpa tukuy chay ruwasqankunata Hiram-abiqa llusk'achasqa broncemantan ruwarqan.

¹⁷Tukuy chaykunatan rey Salomonqa unuyachispa t'uru moldekunapi hich'aykurqan Jordán pampapi kaq Saretán llaqta Sucot llaqta chawpipi.

¹⁸Sinchi askhan karqan rey Salomonpa broncemanta serviciokuna ruwachisqanqa, chaymi hayk'achus bronce pesasqantapas mana pesayta atirqankuchu.

¹⁹Hinallataq Salomonqa Diospa wasinpi kaykunata ruwachirqan: qori altarta, Diospa ñawpaqenpi churana t'antapaq mesakunata,

²⁰ch'uya qorimanta candelerokunata kamachikuyman hina Ch'uyay-ch'uya Cheqaspa ñawpaqenpi k'anchachinapaq,

²¹qorimanta t'ikakunata, lamparachakunata, pábilo sipinakunata,

²²pábilo allichanakunata, puruñakunata, pocillokunata, sansa apanakunatawan. Hinallataq Ch'uyay-ch'uya Cheqasman haykuna punkupas yupaychana wasiman haykuna hatun punkupas ch'uya qorimanta ruwasqa karqan.