Read DIOSPA QHELQACHISQ Quechua 2 CRÓNICAS 5 Bible Online

2 CRÓNICAS 5 - DIOSPA QHELQACHISQ Quechua bible

2 CRÓNICAS 5

¹Señor Diospa wasinpaq tukuy serviciokunata ruwachiyta tukuspataq, Salomonqa taytan Davidpa t'aqasqan qorita, qolqeta, llapan serviciokunatawan Diospa wasinpi qhapaq kay churana wasiman churachirqan.

²Chaymantataq rey Salomonqa Jerusalén llaqtapi huñuykurqan Israelpi llapan kurak runakunata, llapan ayllu umallikunata, familia umallikunatawan, Señor Diospa rimanakuynin arcata Davidpa Llaqtan nisqa Sionmanta apanankupaq.

³Hinan llapan Israel qharikuna rey Salomonwan huñukurqanku qanchiskaq killapi Ch'uklla Ruwana Fiestapi.

⁴Israelpi kaq llapan kurak runakuna huñukuqtintaq, Leví runa sacerdotekunaqa rimanakuy arcata hoqarirqanku,

⁵hinaspa Dioswan Tupana Karpata, karpapi kaq llapan ch'uya serviciokunatawan aparqanku Dios yupaychana wasiman.

⁶Hinan rey Salomonqa paywan huñukuq llapan qharikunapiwan rimanakuy arcaq ñawpaqenpi askha ovejakunata torokunatawan sacrificiota haywarqanku, chaykunan mana yupay atiy karqan.

⁷Chaymantataq sacerdotekunaqa Señor Diospa rimanakuynin arcata yupaychana wasi ukhuman apaykurqanku Ch'uyay-ch'uya Cheqaskama, hinaspa churaykurqanku querubinkunaq raphran uraman.

⁸Chay querubinkunaqa mast'arisqa raphrayoqmi karqan, raphrankunan rimanakuy arcata wantuna k'aspitapas pakarqan.

⁹Wantuna k'aspikunaqa sinchi hatunmi karqan, chaymi k'aspikunaq puntan Ch'uya Cheqasmanta rikukurqan, yupaychana wasi punkumantan ichaqa mana rikukurqanchu, ahinapin chay k'aspikunaqa qhepakapurqan.

¹⁰Rimanakuy arcapiqa iskay p'alta rumillan karqan. Israel runakuna Egipto suyumanta lloqsimuqtinmi, Señor Diosqa paykunawan rimanakusqa, chay p'alta rumikunatan Moisesqa arcaman Horebpi churaykusqa.

¹¹Chaypi kashaq sacerdotekunaqa ch'uya cheqasmantan lloqsimurqanku paykunaqa llapallanmi ch'uyanchakurqankuña, t'aqa-t'aqa llank'ayninkuta saqerispa.

¹²Leví ayllumanta llapan takiqkunan chaypi karqan: Asaf, Hemán, Jedutún, churinkuna, wawqenkunapiwan. Sumaq lino p'achawan p'achasqa, paykunan altarpa inti lloqsimuy ladonpi sayasharqanku, platillota, arpata, tawtinkutawan tocaspanku. Paykunawanmi kashallarqantaq pachak iskay chunka sacerdotekuna cornetata tocaspanku.

¹³Cornetata, platillota, wak tocanakunatapas tocaqtinkutaq, tocaqkunapas, takiqkunapas huk kunkalla takiykurqanku, Señor Diosta yupaychaspanku, payman graciasta qospanku ima: — ¡Señor Diosqa allinmi! ¡Khuyapayakuyninqa wiñaypaqmi! nispa. Chay raton Dios yupaychana wasita phuyu hunt'aykurqan.

¹⁴Chaymi wasiqa Señor Diospa qhapaq-atiyninwan hunt'a karqan, chay hawataq sacerdotekunaqa mana wasipi serviyta atirqankuchu.