Read DIOSPA QHELQACHISQ Quechua 2 CRÓNICAS 9 Bible Online

2 CRÓNICAS 9 - DIOSPA QHELQACHISQ Quechua bible

2 CRÓNICAS 9

¹Sabá suyu reinaqa Salomonpa mentasqa kasqanta uyarispanmi, Jerusalenta rirqan sasa tapukuykunawan Salomonta wateqananpaq. Hinan chayarqan askha runakunapiwan, apamurqantaq camellokunapi q'apaq hawinakunata, askha qorita, umiña rumikunata ima. Salomonman asuykuspataq sonqonpi tukuy yuyaykusqanta tapukurqan.

²Hinan Salomonqa tukuy tapukusqanta kutichirqan, sinchi sasaña kaqtinpas payqa mana sasachaspallan kutichirqan.

³Sabá suyu reinaqa Salomonpa yachaynintan uyarirqan, sayarichisqan wasitapas qhawarqan.

⁴Hinallataq rikurqan mesapi sumaq mikhunakunata, oficialninkunaq tiyasqan wasikunata, kamachinkunaq imayna llank'asqankutapas p'achankutapas, ukyana haywaqninkunata p'achankutapas, Señor Diospa wasinpi ruphachina sacrificiota haywasqantapas. Chaykunata rikuspanmi musphaspa chiriyarqan.

⁵Hinaspan rey Salomonta nirqan: — Llaqtaypi kashasparaq ruwasqaykimanta yachayniykimantawan uyarisqayqa cheqaqpunin kasqa.

⁶Runakunaq rimasqantaqa manan cheqaqpaqchu hap'irqani, kunanmi ichaqa ñawiykunawan rikuspa creeni. Chaywanpas qanmantaqa manan kuskantapas willawasqakuchu, yachayniykipas qhapaq kayniykipas willawasqankumantaqa ancha hatunraqmi kasqa.

⁷¡Kusisamiyoqchá runaykikunapas! ¡Ancha kusisqachá oficialniykikunapas! ¡Paykunaqa qayllaykipi kaspankun uyarishallankupuni yachaysapa simiykikunata!

⁸¡Diosniyki Señor Dios hatunchasqa kachun! Paymi sumaqta qhawarirqasunki, chaymi Israel suyuta paypaq kamachinaykipaq churarqasunki. Señor Diosqa Israel llaqtanta munakunpunin, waqaychayllatapunitaq munanpas, chaymi reyta churarqasunki chanin-kaywan kuskachaywan kamachinaykipaq, nispa.

⁹Hinaspanmi reinaqa Salomonman qorqan yaqa tawa waranqa kilo qorita, ancha askha q'apaq hawinata, umiña rumikunatawan. Manan hayk'aqpas Israelpiqa karqanchu Sabá suyu reinaq Salomonman qosqan sumaq q'apaq hawina hinaqa.

¹⁰Hirampa runankunan Salomonpa runankunapiwan Ofirmanta qorita aparqanku, sándalo kurkukunata, umiña rumikunatapas apallarqankutaq.

¹¹Chay sándalo kurkuwanmi reyqa ruwachirqan seqana gradasta Señor Diospa wasinpaqpas paypa wasinpaqpas. Tocaqkunapaqpas ruwachillarqantaq arpakunata tawtinkukunatawan. Judá suyupiqa manan hayk'aqpas chay hinakunaqa rikukurqanchu.

¹²Rey Salomonqa Sabá suyu reinamanmi tukuy munasqanta mañakusqantawan qorqan paypa regalo apamusqanmantaqa aswan askhataraq. Chaymantataq reinaqa suyunman kutipurqan kamachinkunapiwan.

¹³Salomonqa sapa watan iskay chunka iskayniyoq waranqa kilo qorita chaskirqan,

¹⁴hinallataq qhatuqkunapas, rantiqkunapas contribucionta pagarqan, llapan Arabia reykunapas, suyupi kamachikuqkunapas qorita qolqeta aparqanku.

¹⁵Rey Salomonqa iskay pachak hatun escudokunatan ruwachirqan, sapanka escudotataq qanchis kilo qori llaphllawan qatachirqan.

¹⁶Ruwachillarqantaq kinsa pachak huch'uy escudokunata, sapankatataq kinsa kilo kuskannin qori llaphllawan qatachirqan. Hinaspan chaykunata churachirqan Líbano Sach'a-sach'a nisqa wasiman.

¹⁷Hinallataq marfilmanta huk hatun tiyanata ruwachikurqan, hinaspan ch'uya qoriwan qatachirqan.

¹⁸Chay tiyanaqa soqta pata seqanayoqmi karqan, kallarqantaq qorimanta ruwasqa chaki sarunanpas. Tiyanaq iskaynin ladonpitaq maki tawnakunan karqan, chaywan kuskataq sayashaq iskay leonkunaq rikch'aynin karqan.

¹⁹Chay soqta pata seqanaq iskaynin lado cantonpin sapanka patapi leonpa rikch'aynin karqan, llapanpiqa chunka iskayniyoq leonkunan karqan. Chay hina tiyanataqa manan hayk'aqpas mayqen suyupipas ruwachikurqankuchu.

²⁰Reypa llapan vasonkunapas qorimantakaman karqan, hinallataq Líbano Sach'a-sach'a nisqa wasipi llapan serviciokunapas qorimantakaman karqan. Manan imatapas qolqemantaqa ruwarqankuchu, Salomonpa tiemponpi qolqe mana munasqa kasqanrayku.

²¹Salomonpaqa lamar-qochanta Tarsisman puriq barconkunan karqan, chaykunatan Hirampa runankuna purichirqan. Sapa kinsa watataq Tarsismanta barcokunapi apamurqanku qorita, qolqeta, marfilta, k'usillukunata, pavo realkunatawan.

²²Rey Salomonqa tukuy kay pachapi reykunamanta allin qhapaqmi allin yachaysapataq karqan.

²³Chaymi lliw kay pacha reykuna Salomonwan tupayta munarqanku, Diospa qosqan yachayninta uyarinankupaq.

²⁴Watan-watanmi payman rirqanku, sapanka sumaq sonqota aparikuspa: qorita, qolqeta, alhajakunata, p'achakunata, armakunata, q'apaq hawinakunata, caballokunata, mulakunata ima.

²⁵Salomonpaqa karqanmi tawa waranqa establonkuna, caballokunata carretakunatawan waqaychananpaq. Kallarqantaqmi chunka iskayniyoq waranqa caballopi sillakuqkunapas. Chaykunatan wakinta maqanakuypaq carretakuna waqaychana llaqtakunaman apachirqan, wakintataq Jerusalén llaqta qayllapi waqaycharqan.

²⁶Payqa llapan reykunatan kamachirqan Eufrates mayumanta Filistea suyukama, Egipto qorpakama.

²⁷Rey Salomonqa sinchi askhatan Jerusalenpi qolqeta rumita hinaraq hunt'aykachirqan, cedro kurkukunatapas Shefela moqo-moqopi k'ita higos sach'ata hinaraq.

²⁸Caballokunatapas Salomonpaqqa rantirqanku Egiptomanta llapan suyukunamantawan.

²⁹Salomonmanta wakin willakuykunaqa qallariymanta tukukuykaman Profeta Natanpa Qelqanpi, Silomanta Profeta Ahiaspa Qelqanpi, Profeta Iddoq Qelqanpiwan qelqasqa kashan. Profeta Iddoqa qelqallarqantaqmi Nabatpa churin Jeroboammanta rikhuriypi rikusqanta.

³⁰Salomonqa llapa Israel suyupin kamachikurqan Jerusalenmanta tawa chunka watata.

³¹Wañukapuqtintaq taytan Davidpa Llaqtan nisqapi p'ampapurqanku, rantinpitaq churin Roboam kamachikurqan.