Read DIOSPA QHELQACHISQ Quechua ESDRAS 6 Bible Online

ESDRAS 6 - DIOSPA QHELQACHISQ Quechua bible

ESDRAS 6

¹Chaymi rey Darioqa kamachikurqan Babiloniapi reykunaq qelqa k'uyu waqaychanan wasita maskhanankupaq.

²Hinan Media hap'iypi Ecbatana llaqta pukarapi huk qelqata tarirqanku, chaypin kay hina qelqasqa kasqa:

³Rey Ciron kamachikusqan ñawpaqkaq watapi Jerusalenpi Diospa wasinmanta kamachikurqan: Teqsi churakuchun, wakmanta wasi sayarichun, sacrificiota chaypi haywanapaq. Sayayninman iskay chunka qanchisniyoq metro, anchonmanpas iskay chunka qanchisniyoq metro kachun.

⁴Hatun rumikunawan sapa kinsa patata muyurispa huk patata k'ulluwan churachunku. Llapan chay llank'aypi gastokunataqa reypa qolqe waqaychananmanta pagachunku.

⁵Nabucodonosormi qorimanta qolqemanta serviciokunata Jerusalenpi Dios yupaychana wasimanta horqospa Babiloniaman apachisqa, chay serviciokunata kutichipuchunku. Jerusalenman apapuchunku, Dios yupaychana wasimantaq churanan cheqasman churamuchunku, nispa.

⁶Chaymi rey Darioqa Eufrates mayu inti haykuy lado hap'iypi kamachikuq Tatnaita, Setar-boznaita, chay hap'iypi kamachikuq-masinkunatawan kamachirqan: — Ama Jerusalenman qayllaykuychischu,

⁷ama hark'aychischu. Hinalla wakmanta Dios yupaychana wasita ñawpaq kasqan cheqaspi sayarichichunku judío runakunaq kamachiqnin umalli runakunapiwan.

⁸Judío umalli runakuna Dios yupaychana wasita sayarichishaqtinmi kay hinata yanapankichis: Eufrates mayu inti haykuy lado hap'iypi reypaq impuesto chaskisqaykichis qolqemantan llank'ayninkupi tukuy gastokunata makilla pagankichis.

⁹Jerusalenpi sacerdotekunamantaq tukuy necesitasqan mañasqasuykichista mana saqespa sapa p'unchay qonkichis torillota, ovejata, borregotawan ruphachispa sacrificiota Hanaq Pacha Diosman haywanankupaq. Hinallataq trigotapas, vinotapas, kachitapas, aceitetapas qonkichis,

¹⁰Hanaq Pacha Diosman sumaq q'apaq sacrificiota haywanankupaq, ñoqapaqpas churiykunapaqpas mañapuwanankupaqwan.

¹¹Kamachikullanitaq: Pipas kay kamachikusqayta mana kasukunqachu chayqa, wasinmanta chakana kurkuta horqospa chaypa puntanman ch'antisqa wañuchun, wasinpas k'urpa montonman tukuchun.

¹²Mayqen suyupas mayqen reypas kay kamachikuyta p'akinman, Dios yupaychana wasitapas thuniyta munanman chayqa, chaypi sutin yupaychasqa kananpaq Jerusalenta akllakuq Dios paykunata thunichun. Kay kamachikusqayqa makilla hunt'asqa kachun. Ñoqa Darion chayta kamachikuni, nispa.

¹³Chaymi Eufrates mayu inti haykuy lado hap'iypi kamachikuq Tatnai, Setar-boznai, llank'aq-masinkunapiwan rey Darioq kamachikusqanman hina usqhaylla hunt'arqanku.

¹⁴Judío umalli runakunataq llank'aspanku astawanraq usachirqanku, profeta Hageoq Iddoq churin profeta Zacariaspa kallpachaspa nisqankuman hina. Dios yupaychana wasi llank'asqankutan tukurqanku Israelpa Diosninpa unanchasqanman hina, Persia suyu reykuna: Ciroq, Darioq, Artajerjespa kamachikusqankuman hina.

¹⁵Chay wasi ruwaytan tukurqanku Persia suyu rey Darioq kamachikusqan soqtakaq watapi, Adar killaq kinsakaq p'unchayninpi.

¹⁶Hinan Israel runakunaqa, sacerdotekuna, Leví runakuna kamachi-kaymanta kutimpuqkunapiwan kusisqa chay wasita Diospaq t'aqarqanku.

¹⁷Chay p'unchaymi sacrificiota haywarqanku pachak torillokunata, iskay pachak ovejakunata, tawa pachak borregokunatawan, hinallataq chunka iskayniyoq orqo cabrakunatapas sapanka Israel ayllumanta huktakama haywarqanku, Israelpa huchanta pampachananpaq.

¹⁸Chaymantataq Moisespa qelqanpi qelqasqa kasqanman hina sacerdotekunatapas Leví runakunatapas t'aqa-t'aqata churarqanku, tupaqninman hina Diosta servinankupaq.

¹⁹Hinallataq kamachi-kaymanta kutimpuqkunaqa wata qallariy killaq chunka tawayoq p'unchayninpi Pascua Fiestata ruwarqanku.

²⁰Sacerdotekunapas Leví runakunapas llapankun kuska ch'uyanchakurqanku, chaymi ch'uya karqanku. Hinan Leví runakunaqa Pascua Fiesta borregokunata nak'arqanku llapan kamachi-kaymanta kutimpuqkunapaq, sacerdotekunapaq, paykuna kikinkupaqpas.

²¹Chaymantataq kamachi-kaymanta kutimpuq llapa Israel runakuna chay borregokunata mikhurqanku, hinallataq muyuriqninkupi tiyaq runakunaq map'a millay kawsayninkumanta t'aqakuspa Israelpa Diosnin Señorta yupaychaqkunapas mikhurqanku.

²²Kusisqan Mana Qonchuyoq T'anta Fiestata qanchis p'unchay ruwarqanku. Señor Diosmi Asiria reywan paykunata sumaqta qhawarichirqan, chaymi Israel runakunaq Dios yupaychanan wasita sayarichiypi yanaparqan. Ahinapin paykunata anchata kusichirqan.