Read DIOSPA QHELQACHISQ Quechua NEHEMÍAS 4 Bible Online

NEHEMÍAS 4 - DIOSPA QHELQACHISQ Quechua bible

NEHEMÍAS 4

¹Perqa sayarichisqaykuta yachaspanmi Sanbalatqa sinchita phiñakurqan, sonqonpas rawrarirqanraq, judío runakuna contrataq asikurqan.

²Hinan paywan kashaq kamachikuq-masinkunaman Samaria soldadokunaman rimarqan: ¿Imatataq kay pisi kallpa judío runakunari ruwashanku? ¿Sayarichiyta yuyankuchu? ¿Sacrificiotapas haywanqakuchu? ¿Huk p'unchayllapi tukurqonqakuchu? ¿Chay k'urpa montonmanta ruphasqa rumikunatapas horqonkumanchu? nispa.

³Qayllanpi kashaq Amón suyu runa Tobiastaq nirqan: — Hinalla sayarichishachunku, mayqen atoqllapas seqarqospaqa thunirparinqan, nispa.

⁴Hinan mañakurqani: ¡Ay! ¡Diosniyku, uyariy khaynata pisichawasqankuta! Paykunaman kutichiy k'amiwasqankuta, wak suyuman kamachi kanankupaq preso apasqa kachunku.

⁵Llank'asqaykumantan k'amiwanku, chayrayku, ama hinallata qhawaychu kay mana chanin rimasqanta, huchantapas ama pampachaychu, nispa.

⁶Chaywanpas tukuy sonqon llank'asharqayku, chaymi kuskan perqakama sayarichirqayku.

⁷Jerusalén perqata usqhaylla sayarichishasqaykuta q'asankunatapas wisq'ashasqaykuta rikuspataq, Sanbalat, Tobías, Arabia runakuna, Amón suyu runakuna, Asdod llaqtayoqkunapiwan sinchita phiñakurqanku.

⁸Hinaspan llapanku rimanakurqanku huk-nisqalla Jerusalenta phawaykamunankupaq, chaypi kaqkunata musphachiwanankupaq.

⁹Chaymi Diosniykumanta mañakurqayku, hinaspa tuta-p'unchay awqaykumanta cuidaqkunata churakurqayku.

¹⁰Judá runakunataq nirqanku: — K'urpa q'epiq runakunan sayk'urqapunku, askharaqtaq k'urpakunapas kashan, manan muyuriq perqata sayarichiyta atisunmanchu, nispa.

¹¹Awqanchiskunaqa nirqanmi: Paykunaq mana yachasqallan mana rikusqallan haykurqospa wañurqachisunchis, chay llank'ananku qollupunanpaq, nispa.

¹²Paykuna qayllapi tiyaq judío runakunan ichaqa askha kuti hamuspanku willawarqanku: Muyuriqmantan phawaykusunkichis, nispa.

¹³Chaymi kamachirqani runakunata aylluntintakama perqa q'asa qhepakunapi espadayoq, lanzayoq, p'eqtayoq makilla qhawanankupaq.

¹⁴Manchasqa kasqankuta reparaspaytaq umalli runakunata, allichachaq runakunata, wakin runakunata ima nirqani: — Ama manchakuychischu, yuyariychis Diosninchisqa hatunmi, manchanataq. Chhaynaqa, maqanakuychis warmiykichisrayku, wawaykichisrayku, wawqeykichisrayku, wasiykichisrayku, nispa.

¹⁵Awqaykun wakichisqa kashasqaykuta yacharqanku, contraykupi yuyaykusqankutapas Diospa qolluchisqanta repararqanku, chaymi llapayku perqaman kutipurqayku sapanka maychus llank'asqaykuman.

¹⁶Chay p'unchaymantaqa kuskan t'aqallan runaykuna ruwanapi llank'arqanku, huk kuskan t'aqataq lanzayoq, escudoyoq, p'eqtayoq, qara unkuyoq ima karqanku. Umalli runakunataq perqa sayarichishaq Judá runakunata tukuypi kallpacharqanku.

¹⁷Chaymi perqa sayarichiqkunapas llank'ashallarqankupuni, q'epiqkunapas q'epishallarqankupuni, ichaqa huk makiwanmi llank'arqanku, hukkaq makiwantaq armata hap'irqanku.

¹⁸Sapanka perqapi llank'aqkunataq chumpinkupi espadayoqkama llank'arqanku, trompeta tocaqpas qayllaypin kasharqan.

¹⁹Hinan umalli runakunata, allichachaq wakin runakunatawan nirqani: — Llank'asqanchisqa sinchi hatunmi, llapan perqa muyuriqpitaq t'aqa-t'aqa sapanka karupikama kashankichis.

²⁰Chhaynaqa, trompeta waqayta uyarispaykichisqa, ñoqaq kasqay cheqasmanmi usqhaylla huñukamunkichis, Diosninchismi ñoqanchisrayku maqanakunqa, nispa.

²¹Ahinatan llank'arqayku, kuskan t'aqa runakunataq pacha paqariymanta tutayanankama arma hap'intinkama karqanku.

²²Chaypachan nirqani: — Sapanka qhari yanapaqnintinkama Jerusalén llaqta ukhupi tuta qhepakuychis, chay hinapi llaqtata tuta makilla qhawasunchis p'unchaytaq llank'asunchis, nispa.

²³Chaywanpas ñoqaqa wawqeykunapiwan, runaykunapiwan, qhawaqkunapiwanqa manan puñunaykupaq p'achaykutapas ch'utikurqaykuchu, manallataqmi armaykutapas kacharirqaykuchu, bañakunallaykupaqñan p'achaykutaqa ch'utikurqayku.