Read DIOSPA QHELQACHISQ Quechua NEHEMÍAS 9 Bible Online

NEHEMÍAS 9 - DIOSPA QHELQACHISQ Quechua bible

NEHEMÍAS 9

¹Chay killallapitaqmi iskay chunka tawayoq p'unchaypi Israel runakunaqa llakikuymanta qhasqa p'achawan p'achaykusqa hallp'akama umayoq ayunanankupaq huñukurqanku.

²Paykunaqa t'aqakurqankuñan llapan mana judío runakunamanta, sayarispankutaq huchankuta ñawpa taytankuq huchantapas willakapurqanku.

³Chaymi kasqallanpi sayashaqtinku, Diosninku Señor Diospa kamachikuy siminta llapankuq uyarishasqan kinsa horasta leerqan. Huk kinsa horastataq huchankuta willakurqanku, hinaspa Señor Diosta yupaycharqanku.

⁴Chaymantataq tablakuna chakasqanku pataman seqarqan Leví runakuna Jesúa, Bani, Cadmiel, Sebanías, Buni, Serebías, Bani, Quenanipiwan. Paykunan Diosninku Señor Diosman kunkayoqta mañakurqanku.

⁵Chaymantataq Leví runakuna Jesúa, Cadmiel, Bani, Hasabnías, Serebías, Hodías, Sebanías, Petaiaspiwan nirqanku: — Sayariychis, Diosninchis Señor Diosta yupaychaychis, wiñaymanta-wiñaykama payta saminchaychis. Tukuy yupaychaykunamantapas astawanraq saminchasqa kachun hatun qhapaq sutinqa, nispa.

⁶Chaymantataq mañakurqanku: Qan sapallaykipunin Señor Diosqa kanki, qanmi kamarqanki hanaq pachata, chaypi tukuy ch'askakunatapas. Kamallarqankitaq kay pachata llapan chaypi kaqkunatapas, lamar-qochata llapan chaypi kaqkunatapas, llapanta kawsachinki. Qoyllurkunapas ch'askakunapas yupaychasunki.

⁷Qanmi Señor Diosqa kanki, Abramta akllaspaykin Caldea suyupi Ur llaqtamanta horqomurqanki, Abraham sutiwantaq churarqanki.

⁸Hunt'aq sonqota rikuspan paywan rimanakurqanki mirayninman qonaykipaq: Canaán runakuna, Het runakuna, Amor runakuna, Ferez runakuna, Jebus runakuna, Gerges runakunaq hallp'ankunata. Chay simiykitan hunt'arqanki chanin kasqaykirayku.

⁹Egiptopi ñawpa taytaykuq muchusqantan qhawarirqanki, Puka Qocha qayllapi waqyakusqankutapas uyarirqanki,

¹⁰rey Faraonpapas oficialninkunaqpas llapan runankunaqpas contranpin hatun milagrokunata señalkunata ruwarqanki, qanqa yacharqankin paykuna llaqtaykita sarunchasqankuta. Hinan ancha mentasqa-kayta tarirqanki, kaqllataq kunan p'unchaypas.

¹¹Ñawpa taytaykuq ñawpaqenpin unuta t'aqarqanki, hinan chawpinta pasarqanku, ch'akinta. Qatiykachaqninkunatataq unuwan millp'uchirqanki, ukhu unuman rumi urmaykusqata hinaraq.

¹²Qanmi paykunata sayaq phuyuwan p'unchaypi pusarqanki, tutapitaq purinanku ñanta sayaq ninawan k'ancharqanki.

¹³Sinaí orqo patamanmi uraykamurqanki, hanaq pachamanta paykunata rimaykuspa qorqanki allin chaninchaykunata, cheqaq yachachikuykunata, unanchaykunata, allin kamachikuykunatawan.

¹⁴Moisés kamachiykiwanmi samana p'unchayta t'aqapunasuykipaq yachachirqanki, kamachikuykunata unanchaykunata yachachikuykunatawantaq qorqanki.

¹⁵Yarqayninkupaqmi hanaq pachamanta t'antata qomurqanki, ch'akiyninkupaqpas qaqamanta unuta phawachirqanki, prometesqayki suyuta hap'ikapuq haykunankupaqmi kamachirqanki.

¹⁶Ñawpa taytaykun ichaqa sinchita k'ankaykacharqanku, kamachikuyniykita mana kasukuspa k'ulluchakurqanku.

¹⁷Manan kasukuyta munarqankuchu, manataq yuyarqankuchu milagrokunata paykunapaq ruwasqaykitapas, aswanpas k'ulluchakuspankun huk umallita akllarqanku, wakmanta Egipto suyuman kamachi-kayman kutiykunankupaq. Chaywanpas qanqa pampachakuq Diosmi kanki, sumaq sonqo, khuyapayakuqmi kanki, mana usqhay phiñakuqmi kanki, ancha munakuqmi kanki, chayraykun paykunataqa mana saqerparirqankichu.

¹⁸Qorita unuyachispankun torillota ruwakurqanku: ¡Kaymi Egiptomanta horqomuq diosninchis! nispanku. Sinchi mana chaninwanña pisicharqasunkiku chaypas,

¹⁹qanqa hatun khuyapayakuq kaspaykin manapuni ch'inneqpi saqerparirqankichu. Manan sayaq phuyuqa ch'isiyaq p'unchay chinkarqanchu, purinanku ñanta rikuchispa. Manan ninapas tutantin chinkarqanchu, purinanku ñanta k'anchaspa.

²⁰Allin Espirituykitan qorqanki, paykunata yachachinanpaq, manan hayk'aqpas pisichirqankichu maná nisqa mikhunata, ch'akiyninkupaqpas unutan qorqanki.

²¹Tawa chunka watan ch'inneqpi uywarqanki, manan p'achankupas thantakurqanchu, manan chakinkupas punkirqanchu, manan imankupas pisirqanchu.

²²Llaqtakunatan suyukunatan paykunaman qorqanki, qorpankupi hallp'akunata rakispa. Hap'ikapurqankun Hesbón llaqta rey Sehonpa suyunta, rey Ogpa suyun Basantawan.

²³Churinkunatapas qoyllurta hinaraq mirachirqanki, taytankuman prometesqayki hallp'amantaq pusarqanki hap'ikapunankupaq.

²⁴Paykunan haykuspanku Canaán suyuta hap'ikapurqanku, chay suyu runakunatataq qayllankupi k'umuykachirqanki, reyninkutapas llapa runakunatapas paykunaman hap'ichirqanki, munasqankuta ruwanankupaq.

²⁵Pukara hina allin perqasqa llaqtakunata, imaymanaq wiñanan hallp'akunata munaychakurqanku, hap'ikapurqankutaq hunt'a kawsayniyoq wasikunata, unuyoq p'uytukunata, uvas chakrakunata, olivos chakrakunata, askha fruta chakrakunatawan. Hinaspa mikhurqanku, saksaykurqanku, wirayarqanku, khuyakuyniykipin anchata kusikurqanku.

²⁶Ichaqa manan kasukurqankuchu, qan contran sayarirqanku, kamachikuy simiykitan pisicharqanku. Profetaykikunan sut'inta paykunata huchacharqanku, qanman kutirikunankupaqpas waqyarqanku, ichaqa profetaykikunatan wañuchirqanku, chay hinapin sinchi mana chaninwan pisicharqasunkiku.

²⁷Chaymi awqankunaman hap'ichirqanki, awqankunataq paykunata muchuchirqan. Hinan muchusqankupi qanman waqyakamurqanku, qantaq hanaq pachamanta uyarirqanki, anchata khuyakuspayki qespichiqkunata kacharqanki, awqankumanta paykunata qespichinanpaq.

²⁸Pisi tiempollaraq thak-kaypi kawsaspankun wakmanta qan contra mana chaninta ruwarqanku. Hinan awqankuq makinman saqepurqanki, paykunata munaychakunankupaq. Wakmanta qanman waqyakamuqtinkutaq, anchata khuyakuspa hanaq pachamanta uyarimurqanki, askha kutitan qespichirqanki.

²⁹Yachachikuyniykita kasukunankupaqmi anyarqanki, paykunataq ichaqa hatunchakuspanku kamachikuyniykita pisicharqanku, chaninchayniykikunata saruncharqanku, chaywanpas chaykunata hunt'aqqa kawsananpunin karqan. Mana kasukuspan k'ulluchakurqanku, manataq uyarirqasunkikuchu.

³⁰Askha watakunan pacienciawan paykunata hinallata qhawarqanki, Espirituykiwan anyarqanki profetaykikunawan willachispa, manapunin ichaqa kasukurqankuchu, chaymi wak llaqtakunaman hap'iykachirqanki.

³¹Anchata khuyakuspaykin mana ch'usaqyananta munarqankichu, manataq saqerparirqankichu, qanqa sumaq sonqo khuyapayakuq Diosmi kanki.

³²Diosnillayku, hatunmi kanki, manchana atiyniyoqmi kanki, rimanakusqayki hunt'aqmi munakuqmi kanki. Chay hinaqa, Asiria reykunaq tiemponmantapacha kunankama sasachakuypi muchusqaykuta ama pisipaq hap'iychu. Reyniykupas, umalliykupas, sacerdoteykupas, profetaykupas, ñawpa taytaykupas, llapa llaqtaykupas muchurqaykun.

³³Tukuy chay sasachakuykunawan huchayku hawa muchuchiwaspaykikun chaninta ruwarqanki, ñoqaykupaqpas hunt'aq karqanki, ñoqaykutaq ichaqa mana chaninta ruwarqayku.

³⁴Reyniykupas, umalliykupas, sacerdoteykupas, ñawpa taytaykupas manan yachachikuyniykitaqa kasukurqankuchu, manataq kamachikuyniykikunatapas willakuyniykikunatapas uyarirqankuchu.

³⁵Kay suyupi reyniyku kashaqtin, tukuy qhapaq kaykunata paykunaman qoshaqtiyki, imaymanaq wiñanan hatun suyuta qoshaqtiykipas, manan qanta yupaycharqasunkikuchu, manan huchankutapas wikch'urqankuchu.

³⁶¡Qhawariy! Ñawpa taytaykuman qosqayki suyupin kamachi kashayku, kay suyupi rurukunapas lliw imakunapas ñoqaykupaqmi karqan, ichaqa chaypin kamachi kashayku.

³⁷Hallp'aq askha rurusqantaqa wak reykunan chaskinku, qanmi huchayku hawa chay reykunata kamachiwanankupaq churarqanki, chayraykun ima munasqankuta ñoqaykuta, uywaykutapas ruwanku, chaymi sinchi ñak'ariypi kawsashayku, nispa.

³⁸Tukuy chaykuna hawan qelqapi ñoqayku cheqaqta prometekuyku, kay chaninninpi rimanakusqa qelqatataq umalliyku, Leví runakuna, sacerdotekunapiwan seq'espa selloykunku.