Read DIOSPA QHELQACHISQ Quechua ESTER 4 Bible Online

ESTER 4 - DIOSPA QHELQACHISQ Quechua bible

ESTER 4

¹Tukuy chaykunata yacharqospataq Mardoqueoqa llakikuymanta p'achanta llik'ikurqan. Qhasqa p'achawan churakuspataq usphawan umanta hach'ikurqan, hinaspa llaqtantinta purirqan sinchi llakisqa sonqo nanayta qaparispa.

²Reypa kamachikunan wasi punkuman chayaspataq chaypi sayarqan, qhasqa p'achayoqqa manan pipas ukhuman haykuqchu.

³Kaqllataq sapanka provinciakunapi reypa unanchay kamachikusqanta yacharqospanku judío runakunaqa waqarqanku, llakikurqanku, anchirqanku, ayunarqanku ima, askhataq qhasqa p'achawan churaykusqa uspha patapi khuyay wikch'urayarqanku.

⁴Reina Esterta serviq eunuco qharikunataq warmi kamachinkunapiwan Mardoqueoq ruwasqanta payman willarqanku, chaymi Esterqa sinchita llakikurqan. Hinaspa Mardoqueoman p'achata apachirqan qhasqa p'achanta ch'utikuspa churakunanpaq. Paytaq ichaqa mana munarqanchu.

⁵Hinan Esterqa reypa eunucon Hatacta waqyachirqan, paymi reina Esterta servirqan. Paytan Mardoqueoman kacharqan: ¿Iman karqon? ¿Imanaqtinmi kayta ruwashanki? nispa, tapuqta.

⁶Chaymi Hatacqa Mardoqueo tapuq rirqan, payqa reypa kamachikunan wasi punku plazapin kasharqan.

⁷Hinan Mardoqueoqa willakurqan imaymana llakiq payta qatisqanta, willallarqantaq judío runakunata wañuchiqtinqa reypa qolqe waqaychananman hayk'a qolqetachus Amanpa qonanpaq prometekusqantapas.

⁸Hinallataq Susa llaqtapi willakusqan reypa unanchasqan qelqata Esterman apachirqan, judío runakuna wañuchisqa kananta yachananpaq. Valekurqantaq Esterta reyman rimapayaq rispa llaqtanrayku valekamunanpaq.

⁹Kutimuspataq Hatacqa Mardoqueoq nisqan simikunata Esterman willarqan.

¹⁰Chaymi Esterqa Hatacta nirqan: — Mardoqueoman kay hinata niy,

¹¹reypa llapa oficialninkuna provinciakunapi llapan tiyaqkunapas wasinpi kashaqtin reyman qayllaykuy kamachikuytaqa yachankun. Mayqen qharipas warmipas mana waqyasqa kashaspa reyman asuykun chayqa, wañuchisqan kanan, imaynapipas rey khuyapayaspa qori varanta haywarin payta pampachaspa, chayllan kawsan. Ñoqataqa kinsa chunka p'unchayñan reyqa mana waqyawanchu, nispa.

¹²Mardoqueotaq chayta uyarispa kutichillarqantaq:

¹³— ¿Reypa wasinpi kaspachu, judío runakunata wañuchishaqtin qespisqa kayta yuyanki? Manan hinachu kanqa.

¹⁴Manachus kay hinapi kashaqtinchis rimarinki chayqa, judío runakunataqa hukmi yanapaspa qespichinqa, qantaq ichaqa llapa aylluykipiwan ch'usaqyachisqa kankichis. Ichapaschá kay hina sasachakuypi yanapawanaykikupaq reina kashanki, nispa.

¹⁵Hinan Esterqa huktawan Mardoqueoman kutichispa nichirqan:

¹⁶Susa llaqtapi kashaq llapa judío runakunata huñuy, hinaspa ñoqapaq ayunaychis, kinsa p'unchay kinsa tuta ama mikhuychischu, amataq ukyaychispaschu. Ñoqapas sipas kamachiykunapiwanmi ayunallasaqtaq. Chaymantataq reyman qayllaykuq risaq, manaña kamachikuyman hina atikuqtinpas risaqpunin, wañuchiwaqtinkuqa hina wañusaqpas, nispa.

¹⁷Hinan Mardoqueoqa ripuspa Esterpa tukuy kamachikusqanta ruwarqan.