Read DIOSPA QHELQACHISQ Quechua ESTER 6 Bible Online

ESTER 6 - DIOSPA QHELQACHISQ Quechua bible

ESTER 6

¹Reyqa chay kikin tutan mana puñuy aysaqtin, suyuq willakuy qelqanta mañakurqan apamuspa qayllanpi leenankupaq.

²Hinan tarirqanku reypa wasin punku qhawaq eunuco Bigtanwan Terespiwan reyta wañuchinankupaq yuyaykusqankuta, hinallataq Mardoqueoq willasqantapas.

³Chaymi reyqa nirqan: — Mardoqueomanri, ¿chay ruwasqanmanta imata qospataq payta hatuncharqanchis? nispa. Oficialninkunataq kutichirqanku: — Manan imatapas qonchischu, nispa.

⁴Amantaq chay rato reypa wasin patioman haykusharqan ruwachisqan seq'onapi Mardoqueota seq'ochinanpaq reyta valekuq. Reytaq nirqan: — ¿Pin patiopi kashan? nispa.

⁵Oficialninkunataq: — Amanmi, nirqanku. Hinan reyqa: — Haykumuchun, nirqan.

⁶Amán haykuqtintaq reyqa nirqan: — Ñoqan huk qharita hatunchayta munani, ¿imayna hatunchasqataq kanman? nispa. Amantaq sonqonpi yuyaykurqan: ¿Pitaq kanmanri? Ñoqatachá hatunchayta munawan, nispa.

⁷Hinan kutichirqan: — Mayqen qharitapas hatunchayta munanki chayqa,

⁸qanpa p'achaykiwan p'achakuchun, sillakunayki caballopi sillakuchun, caballoq mat'inman coronayki hina seq'esqawan churakuchun.

⁹Chay p'achata caballotawantaq suyupi qollana oficial hap'ichun, hinaspa hatunchay munasqayki qharita p'achachichun, caballomanpas sillachichun. Caballo aysantintaq llaqta plazapi muyurimuchun: ¡Ahinatan reyqa hatunchay munasqan qharitaqa ruwan! nispa, waqyakuspa.

¹⁰Chaymi reyqa Amanta nirqan: — Allinmi, usqhaylla rispa p'achata horqomuy, caballotapas aysamuy, hinaspa imaynan nisqaykiman hina kamachikunay wasi punkupi tiyaq Mardoqueo judío runata ruwamuy. Paqtataq nisqaykikunata qonqawaq, nispa.

¹¹Hinan Amanqa rispa Mardoqueota p'achachimurqan, caballoman sillachispataq llaqta plazapi caballo aysantin muyurimurqan: ¡Ahinatan reyqa hatunchay munasqan qharitaqa ruwan! nispa, waqyakuspa.

¹²Chaymantataq Mardoqueoqa reypa kamachikunan wasi punkuman kutimpurqan. Amantaq ichaqa usqhaylla wasinta kutiripurqan sinchi p'enqasqa uyanta pakaykukuspa.

¹³Wasinman haykuspataq warmin Zeresman yuyaychaqninkunamanwan willakurqan tukuy llakiq qatisqanta. Hinan paykunaqa nirqanku: — Chay Mardoqueo judío runa kashaqtin, ñawpaqenpi atiyniyki pisichasqa chayqa, manan atipawaqñachu, aswanpas hukpaqkaman urmanki, nispa.

¹⁴Chayta rimashallaqtinkuraqmi, reypa eunucon qharikunaqa usqhaylla hamurqanku Amanta waqyaq, Esterpa wakichisqan hatun mikhuyman rinanpaq.