Read DIOSPA QHELQACHISQ Quechua ESTER 7 Bible Online

ESTER 7 - DIOSPA QHELQACHISQ Quechua bible

ESTER 7

¹Reymi Amanpiwan reina Esterpa wakichisqan hatun mikhuyman wakmanta rirqanku.

²Hinan chay iskaykaq p'unchaypi vinota ukyashaspanku reyqa Esterta tapuykullarqantaq: — Reina Ester, ima munasqaykita mañakuway, suyuq kuskannintaña mañakuwanki chaypas, qosqaykin, nispa.

³Chaymi reina Esterqa nirqan: — Reyníy, sumaqta qhawariwanki chayqa, allintaq rikch'akusunkipas chayqa, khuyapayaykuwayku ñoqatapas llaqtaytapas ama wañuchiwanankupaq. Chayllatan valekuyki.

⁴Ñoqapas llaqtaypas llapayku ch'usaqyachisqa kanaykupaqmi vendesqa kashayku. Kamachipaq vendesqalla kaykuman chayqa, ch'inllachá kakuyman, manachá umayki nanachiq hamushaymanchu, nispa.

⁵Reytaq Esterta tapuykurqan: — ¡Pitaq chayri! ¡Maypitaq kashan hatunchakuspa chay hina mana chanin ruwayta munaqri! nispa.

⁶Hinan Esterqa kutichirqan: — ¡Awqaykuqa kay millay Amanmi! nispa. Amantaq chayta uyarispa, mancharikuymanta chiriyarqanraq.

⁷Reytaq hatun mikhuymanta sinchi phiñasqa sayarispa huertaman lloqsirqan. Amantaq reypa wañuchinanta repararqokuspa, reina Esterpa qayllanpi qhepakurqan ama wañuchinanpaq rogakuq.

⁸Huertamanta kutiykamuspataq reyqa rikurqorqan, Esterqa puñunanpi k'iraykusqa kashaqta, Amantataq chakinpi thallashaqta. Chaymi reyqa phiñarikuspa nirqan: — ¿Wasiypi kashaspachu qayllaypiraqtaq reinata violayta munanki? nispa. Chayta rey rimarqoqtin hinan wakin eunucokunaqa Amanpa uyanta pakarqanku.

⁹Paykunamanta huknin Harbona sutiyoq runataq nirqan: — Kashanmi Amanpa wasinpi huk seq'ona iskay chunka iskayniyoq metro sayayniyoq, chaytan pay ruwachirqan reyman willaq Mardoqueota seq'ochinanpaq, nispa. Hinan reyqa kamachirqan: — ¡Chay seq'onapi Amanta seq'omuychis! nispa.

¹⁰Ahinatan Amanta seq'opurqanku, pay kikinpa Mardoqueopaq ruwachisqan seq'onapi. Chaymi reypa phiñakuynin thaniykurqan.