Read DIOSPA QHELQACHISQ Quechua ESTER 9 Bible Online

ESTER 9 - DIOSPA QHELQACHISQ Quechua bible

ESTER 9

¹Chunka iskayniyoqkaq Adar killaq chunka kinsayoq p'unchayninpin reypa kamachikusqan hunt'akunan karqan. Chay p'unchaypin judío runakunata awqanku munaychakuyta yuyarqanku, ichaqa manan hinachu karqan, judío runakunan paykunata munaychakurqanku.

²Rey Asueroq suyun llapan llaqtakunapi tiyaq judío runakunan huñukurqanku, paykunata wañuchiy munaq awqanku contra phawaykunankupaq. Manataq awqankuqa tupapakuyta atirqanchu, llapan runakuna judío runakunata manchakusqanrayku.

³Llapan umallikunapas, provinciakunapi kamachikuqkunapas, llaqta kamachikuqkunapas, oficialkunapas Mardoqueota manchakuspankun judío runakunata yanaparqanku.

⁴Mardoqueoqa reypa wasinpi ancha atiyniyoqmi karqan, llapan suyupitaq allin mentasqa kasqanta yacharqanku, sapa p'unchaytaq aswan-aswan atiyniyoq kapurqan.

⁵Chaymi judío runakunaqa llapan awqankuta espadawan wañuchispa ch'usaqyachirqanku, ima munasqankutan ruwarqanku.

⁶Suyuq hatun Susa llaqtallanpiraqmi wañuchirqanku phisqa pachak qharikunata,

⁷hinallataq wañuchirqanku Parsandatata, Dalfonta, Aspatata,

⁸Poratata, Adaliata, Aridatata,

⁹Parmastata, Arisaita, Aridaita, Vaizatatawan.

¹⁰Chaykunan karqan judío runakunaq awqan Hamedataq churin Amanpa chunkantin churinkuna, judío runakunan ichaqa paykunaq kaqninkuta mana hap'ikapurqankuchu.

¹¹Chay kikin p'unchaymi rey Asueroman willarqanku Susa llaqtapi hayk'achus wañusqanta.

¹²Hinan reyqa Esterta nirqan: — Kay Susa llaqtallapiraq phisqa pachak qharikunata Amanpa churinkunatawan wañuchinku chayqa, ¿wakin provinciakunapiqa hayk'ataraqchá wañuchinku? ¿Astawanraqchu munanki imatapas? Mañakullaway, qosqaykipunin, nispa.

¹³Estertaq kutichirqan: — Allin rikch'akusunki chayqa, valekuykin paqarintawan Susa llaqtapi judío runakuna kaqlla kamachisqaykiman hina wañuchinankupaq, Amanpa chunkantin churinkunaq ayanpas seq'onaman warkusqa kananpaq, nispa.

¹⁴Reyqa mañakusqanman hinan hunt'akunanpaq kamachikurqan, hinan chay kamachikuyqa Susapi willasqa karqan. Amanpa chunkantin churinpa ayankunataq warkusqa karqan.

¹⁵Hinan Susa llaqtapi kashaq judío runakunaqa Adar killaq chunka tawayoq p'unchayninpi huñukuspanku, kinsa pachak qharikunata wañuchirqanku, ichaqa manan kaqninkutaqa hap'ikapurqankuchu.

¹⁶Suyuq provinciankunapi tiyaq wakin judío runakunapas Adar killaq chunka kinsayoq p'unchayninpin huñukullarqankutaq kawsayninkumanta tupapakunankupaq. Hinaspan awqankuta vengakuspa qanchis chunka phisqayoq waranqa runata wañuchirqanku, ichaqa manan kaqninkutaqa hap'ikapurqankuchu.

¹⁷Qhepantin p'unchaytaq samarqanku, hinaspan kusisqa hatun mikhuywan q'ochukurqanku.

¹⁸Susapi kaq judío runakunaqa iskay p'unchaymi maqanakurqanku, chaymi paykunaqa chunka phisqayoq p'unchaypi samaspanku kusisqa hatun mikhuywan q'ochukurqanku.

¹⁹Chayraykun campopi, ayllukunapi tiyaq judío runakunaqa Adar killaq chunka tawayoq p'unchayninpi kusikuspa fiestata ruwallankupuni, mikhunatapas apachinakuspanku.

²⁰Mardoqueoqa lliwtan chay ruwasqakunata qelqarqan, hinaspa suyuq provinciankunapi tiyaq llapan judío runakunaman qelqakunata apachirqan, karupiña qayllapiña karqanku chaypas.

²¹Paykunatan kamachirqan sapa wata Adar killaq chunka tawayoq p'unchayninpi chunka phisqayoq p'unchayninpiwan fiestata ruwanankupaq.

²²Chay p'unchaykunapin judío runakunaqa awqankuta vengakuqtinku, llakikuyninku, waqayninku, anchiyninkupas kusikuyman q'ochukuyman tukupurqan. Chaymi chay p'unchaykunapiqa kusisqa hatun mikhuywan fiestata ruwananku karqan, mikhunata apachinakuspanku wakchakunamanpas regalokunata qospanku ima.

²³Hinan judío runakunaqa Mardoqueoq qelqapi kamachisqanman hina chay fiestata watan-watan ruwanankupaq yuyaykurqanku.

²⁴Llapan judío runakunaq awqan Agag runa Hamedataq churin Amanqa paykunata wañuchiyta yuyaspanmi Purta[2] sorteasqa wañuchinanta ch'usaqyachinanta yachananpaq.

²⁵Reyman Ester willaqtintaq ichaqa, reyqa kamachikuspa unancharqan judío runakuna contra chay mana chanin yuyaykusqanmanta kikin Amán wañuchisqa kananpaq. Ahinapin Amantapas churinkunatapas seq'onapi wañuchirqanku.

²⁶Chaymi chay p'unchaykunata “Purim” nispa suticharqanku, Pur simimanta kasqanrayku. Hinan judío runakunaqa Mardoqueoq qelqanman hina, paykunaq rikusqanman kawsayninkupi yachasqankuman hina,

²⁷yuyaykurqanku watan-watan fiestata ruwanankupaq paykunapas mirayninkupas, hinallataq judío runaman tukuqkunapas. Sapa wata hina fiestata ruwanankupaq yuyakurqanku chay iskay p'unchaypi, kamachisqa kasqankuman hina.

²⁸Ahinapin paykunaqa chay p'unchaykunata yuyarispanku waqaychananku karqan sapanka mirayninkupi, ayllukunapi, llaqtakunapi, provinciakunapiwan, judío runakunapas mirayninkupas fiestata ruwashanallankupaq.

²⁹Abihailpa ususin reina Estertaq Mardoqueopiwan atiyninkuman hina Purim fiestamanta iskaykaq qelqata qelqarqanku ñawpaqkaq qelqata cheqaqchananpaq.

³⁰Chaytan sumaq simikunawan munakuywan apachirqanku suyupi pachak iskay chunka qanchisniyoq provinciakunapi kashaq llapan judío runakunaman.

³¹Chay qelqapin ñawpaqkaq kamachisqanku p'unchayman hina Purim fiestata ruwanankupaq paykunata kamachirqanku, hinallataq kamachirqan chay fiestapi ayunanankupaq llakikunankupaqwan.

³²Chay hinatan reina Esterqa cheqaqcharqan Purim fiestapaq kamachikuyta. Tukuy chay ruwaykunaqa huk qelqapi qelqasqan karqan.