Read DIOSPA QHELQACHISQ Quechua ÉXODO 11 Bible Online

ÉXODO 11 - DIOSPA QHELQACHISQ Quechua bible

ÉXODO 11

¹Señor Diosmi Moisesta nirqan: — Huk muchuchiytawanraqmi rey Faraonman Egipto suyumanwan chayachisaq, chaymantañan payqa mana kaymanta lloqsinaykichispaq kachariyllachu kacharisunkichis, aswanpas pay kikinmi qarqosunkichis ripunaykichispaq.

²Llaqtata nimuy sapanka qharipas warmipas wasi-masinmanta qolqe alhajakunatapas qori alhajakunatapas mañakunanpaq, nispa.

³Hinaspan Señor Diosqa Israel runakunata Egipto runakunawan sumaqta qhawarichirqan. Moisestapas allinnin runapaqmi hap'irqanku rey Faraonpa oficialninkunapas llapa Egipto runakunapas.

⁴Moisesmi rey Faraonta nirqan: Señor Diosmi nin, kuska tutatan ñoqa pasasaq Egipto suyunta,

⁵chaymi Egipto suyupi llapa phiwi wawa wañunqa, kamachikuy tiyanapi tiyaq rey Faraonpa phiwinpas kutanapi kutaq kamachi warmiq phiwinpas, hinallataq uywakunaq llapa ñawpaq wachasqankunapas.

⁶Chaymi Egipto suyuntinpi sonqo nanay waqay kanqa, manan chay hinaqa hayk'aqpas karqanchu, manallataqmi hayk'aqpas kanqachu.

⁷Israel runakuna ukhupin ichaqa mana alqollapas hiriririnqachu runatapas uywatapas, Egipto runakunamanta Israel runakunata ñoqa Señor Diospa t'aqasqayta yachanaykichispaq, nispa.

⁸Hinaqtinmi llapan oficialniykikunaqa hamuwanqaku, qonqorikuwaspankutaq niwanqaku: — Ripuychis llapallan qatikuqniyki runakunapiwan, nispanku. Chay qhepatataq ñoqa ripusaq, nispa. Hinaspanmi Moisesqa rey Faraonpa qayllanmanta sinchi phiñasqa lloqsimpurqan.

⁹Chaymantataq Señor Diosqa Moisesta nirqan: — Rey Faraonqa manan kasusunkichischu, chaymi Egipto suyupi astawan musphanakunata ruwasaq, nispa.

¹⁰Moiseswan Aaronwantaq tukuy chay musphanakunata rey Faraonpa ñawpaqenpi ruwarqanku, Señor Diostaq ichaqa rey Faraonpa sonqonta rumiyaykachirqan, hinan Israel runakunata mana kacharirqanchu suyunmanta ripunankupaq.