Read DIOSPA QHELQACHISQ Quechua ÉXODO 17 Bible Online

ÉXODO 17 - DIOSPA QHELQACHISQ Quechua bible

ÉXODO 17

¹Señor Diospa kamachikusqanman hinan llapa Israel llaqta Sin nisqa ch'inneqmanta puririrqan, asta-astarikuspa purinanpaq. Refidimpin samarqanku, ichaqa manan unu karqanchu runakunaq ukyananpaq.

²Hinaqtinmi runakunaqa Moisesta rimapakurqanku: — ¡Unuta qowayku ukyanaykupaq! nispa. Moisestaq paykunata nirqan: — ¿Imanaqtintaq ñoqawan churanakunkichis? ¿Imanaqtintaq Señor Diosta wateqankichis? nispa.

³Runakunataq ichaqa unumanta ch'akichikuspa Moisés contra chhuchupakurqanku: — ¿Imapaqtaq Egiptomanta pusamuwarqankiku? ¿Ch'akiymantachu wawaykutawan uywaykutawan wañuchiwankiku? nispa.

⁴Hinan Moisesqa Señor Diosta waqyakuspa nirqan: — ¿Imanasaqtaq kay runakunata? ¡Asllamanwanqa ch'aqewanqakun! nispa.

⁵Señor Diostaq payman kutichirqan: — Runakunamanta ñawpariy, Israel wakin kurak runakunata pusarikuspayki. Aparikullaytaq Nilo mayu waqtasqayki tawnatapas, hinaspa ñawpariy.

⁶Ñoqataq haqay Horeb orqo qaqa patapi ñawpaqeykipi sayaykusaq. Qaqata waqtaqtiykin llaqtaq ukyananpaq unu chay qaqamanta lloqsimunqa, nispa. Moisestaq chay hinata ruwarqan Israel kurak runakunaq rikushasqan.

⁷Chayneqtataq suticharqan Meriba[8] nispa, Israel runakunaq rimapakusqanrayku, sutichallarqantaq Masah[9] nispa: ¿Ñoqanchiswanchu Señor Diosqa kashan? Icha, ¿manachu? nispa Señor Diosta wateqasqankurayku.

⁸Amalec runakunan Refidimman hamurqanku Israel runakunata maqaq.

⁹Hinan Moisesqa Josueta nirqan: — Wakin qharikunata akllay, hinaspa Amalec runakunawan maqanakamuy. Paqarinmi moqo patapi ñoqa kashasaq, Diospa tawnan hap'iykusqa, nispa.

¹⁰Chaymi Josueqa Moisespa kamachisqanta hina ruwarqan, hinaspan Amalec runakunawan maqanakuq rirqan. Chaykamataq Moiseswan Aaronwan Hurwan moqo pataman wicharqanku.

¹¹Makinta Moisés hoqariqtintaq Israel runakuna atiparqan, uraykachiqtintaq Amalec runakuna atiparqan.

¹²Moisespa makintaq ichaqa sayk'urqanña, chaymi huk rumita hoqarispa chay patapi Moisesta tiyaykachirqanku, Aaronwan Hurwantaq makinta wichayman hap'irayarqanku, hukqa huk makinta hukkaqtaq hukkaq makinta. Chaymi Moisespa makinqa mana sayk'urqanchu inti haykunankama,

¹³Josuetaq Amalec runakunata mast'a pampata wañurqarichirqan.

¹⁴Hinan Señor Diosqa Moisesta nirqan: — Kayta huk qelqapi qelqay yuyarinapaq, hinaspa Josueman willamuy kay pachamanta Amalec runakunata llapantapuni chinkachipunayta, nispa.

¹⁵Moisestaq altarta perqarqan, chaytan suticharqan Señor Diosqa banderaymi nispa.

¹⁶Nirqanmi: ¡Señor Diospa banderanta hap'iychis! ¡Señor Diosmi Amalec runakunawan maqanakushan miray-miraykama! nispa.