Read DIOSPA QHELQACHISQ Quechua ÉXODO 22 Bible Online

ÉXODO 22 - DIOSPA QHELQACHISQ Quechua bible

ÉXODO 22

¹Pipas torotapas ovejatapas suwakuspa nak'anqapas vendenqapas chayqa, chay toromantan phisqa wakata qopunqa, chay ovejamantataq tawa ovejata.

²Suwachus wasi t'oqoshaqta hap'ichikunqa, hinaspa wañuqllapaqña k'irisqa kanqa chayqa, wañuchiqqa manan huchachasqachu kanqa.

³Pacha illarimuytachus kanqa chayqa, wañuchiqqa suwa wañuchisqanmantan huchachasqa kanqa. Suwaqa suwakusqanmantan llapanta qopunqa. Manataq imanpas kutichipunanpaq kaqtinqa, suwakusqanmanta kutichipunanpaqmi pay kikin vendesqa kapunqa.

⁴Suwatachus suwakusqan animalta kawsashaq hap'ishaqta pipas tarinqa chayqa, iskaytañan pagachikunqa, torotaña, asnotaña, ovejataña kaqtinpas.

⁵Pichus campopipas uvas chakrapipas michinqa, uywantaq hukpa camponman haykunqa chayqa, allinkaq campontan allinkaq uvas chakrantan mikhusqamanta qopunqa.

⁶Pipas ninata hap'ichinqa, hinaspataq khiskaman aypaspa ruphaykunqa arkusqa trigota, otaq sayashaqllataraq, otaq chakrantinta chayqa, nina hap'iykachiqmi ruphasqamanta pagapunqa.

⁷Pipas runamasinman qolqetapas, alhajakunatapas waqaychapunanpaq hap'ichikunqa, chay runaq wasinmantataq suwanqaku chayqa, suwakuqmi hap'ichikuspaqa iskay chay hinata qopunqa.

⁸Manataq suwata hap'inqakuchu chayqa, wasiyoqmi Dios yupaychana wasita rinqa saqekuq runaq kaqninta mana llamiykusqanta Diospa qayllanpi rimarinanpaq.

⁹Maypachachus pipas hap'ikapunqa torotapas, asnotapas, ovejatapas, p'achatapas, ima chinkasqatapas, hinaspa pipas: Kayqa ñoqaqmi, ninqa chayqa, iskayninkun Dios yupaychana wasiman uyarichikuq rinqaku, pitachus Dios huchachanqa, chaymi runamasinman iskaytaña qopunqa.

¹⁰Pipas runamasinman hap'ichikunqa asnotapas, torotapas, ovejatapas, ima animaltapas qhawapunanpaq, chay animaltaq wañunqa otaq k'irisqa kanqa, otaq mana piqpapas rikusqan suwasqa kanqa chayqa,

¹¹chay runamasin uywayoqpaqmi Señor Diospa sutinpi juranqa, uywayoqpa kaqninta mana llamikusqanta. Uywayoqtaq rimasqanta creenqa, manataq runamasinmanta pagachikunqachu.

¹²Qhawashaqtin suwanqaku chayqa, uywayoqmanmi pagapunqa.

¹³Phiña animalpa llik'irqarisqantaq kaqtinqa, mikhusqa puchutan sut'inchanapaq apamunqa, chaymi manaña paganqachu.

¹⁴Pitaqchus runamasinmanta uywata mañakunqa, hinaspataq uywayoqpa mana rikushasqan k'irisqa kanqa otaq wañunqapas chayqa, mañakuqmi pagapunqa.

¹⁵Uywayoqchus chaypi kasharqan chayqa, manañan paganqachu. Uywachus fletasqa karqan chayqa, uywayoqmi fletellantaña chaskikapunqa.

¹⁶Pipas casarakunanpaq manaraq rimaykusqa doncella sipasta q'otunqa, hinaspa payta violanqa chayqa, warmi wawayoqmanmi warmi horqoy qolqeta qonqapuni, hinaspan chay sipaswan casarakunqa.

¹⁷Sipaspa taytanña mana casarachiyta munaqtinpas, payqa warmi wawayoqman qonqapunin doncella sipasmanta hina yachasqaña warmi horqoy qolqeta.

¹⁸Layqa warmiqa wañuchisqapunin kanqa.

¹⁹Pipas uywawan t'inkinakuqqa wañuchisqapunin kanqa.

²⁰Pipas wak dioskunaman sacrificiota haywanqa, manataq ñoqa Señor Diosmanchu chayqa, wañuchisqapunin kanqa.

²¹Sumaqtan wak llaqtayoqtaqa rikunki, aman ñak'arichinkichu, aman sarunchankichu, qankunapas wak llaqtayoqmi Egipto suyupi kamurqankichis.

²²Amallataq pi viudatapas mana tayta-mamayoqtapas ñak'arichinkichu,

²³qanchus paykunata ñak'arichinki, paykunataq waqyakamuwanqaku chayqa, ñoqaqa paykunata uyarisaqpunin.

²⁴Ñoqaqa k'arak phiñasqan qankunata espadawan wañuchisqaykichis. Hinan warmiykichispas viuda kapunqaku, wawaykichispas mana tayta-mamayoq kapunqaku.

²⁵Ñoqaq llaqtay llaqtamasiyki wakcha runamanchus qolqeta manunki chayqa, aman payta qolqe manuq hinachu rikunki, amataqmi interesnintapas cobrankichu.

²⁶Chay runa-masiykichus ponchonta prendasunki chayqa, inti haykuytan ponchonta kutichipunki,

²⁷chay ponchollanmi kan chiriqtin p'istuykukunanpaq. Mana chayqa, ¿imapin puñuykunqa? Paychus waqyakamuwanqa chayqa, ñoqan uyarisaq, ñoqaqa khuyapayakuqmi kani.

²⁸Aman Diosta ñakankichu, aman llaqtayki kamachiqtapas ñakankichu.

²⁹Usqhayllan ofrendata apamuwanki cosechaykimantapas, vinoykimantapas. Phiwi churiykitaqa qopuwankin.

³⁰Qopullawankitaqmi wakaykiq ovejaykiq ñawpaq uñantapas, qanchis p'unchayllan mamanwan kanqa, pusaqkaq p'unchaypiqa qopuwankin.

³¹Qankunaqa ch'uya runakunan kanaykichis. Aman campopi phiña animalkunaq llik'irqarisqan aychata mikhunkichischu, alqokunamanmi qaraykapunkichis.