Read DIOSPA QHELQACHISQ Quechua ÉXODO 25 Bible Online

ÉXODO 25 - DIOSPA QHELQACHISQ Quechua bible

ÉXODO 25

¹Señor Diosmi Moisesta nirqan:

²— Israel runakunata nimuy ñoqapaq ofrendata apamunankupaq. Ofrendataqa chaskipuwankichis pipas tukuy sonqo apamuqmantan.

³Kaykunatan chaskinkichis: Qorita, qolqeta, cobreta,

⁴llawlli-puka q'aytuta, sani-puka q'aytuta, rawraq-puka q'aytuta, ñañuy-ñañu lino q'aytuta, cabra suphuta,

⁵puka teñisqa anejo qarakunata, llamp'uy-llamp'u qarakunata, acacia sach'a kurkuta,

⁶lamparakunapaq aceiteta, hawina aceitepaqpas q'apashaq inciensopaqpas sumaq q'apaqkunata,

⁷yanayoq yuraq umiña rumikunata, umiña rumikunatapas uma sacerdoteq unkunman qhasqo ch'uspanmanwan ch'olqochinapaq.

⁸Hinaspan yupaychana karpata ruwapuwanqaku paykuna ukhupi tiyanaypaq.

⁹Chay tiyanaytaqa tukuy imaymanantapas ruwankichis imaynatachus qanman rikuchisqayki chay kikillantan.

¹⁰Acacia kurkumantan arcata ruwanki, wask'anmi huk metro chunka centimetroyoq kanqa, anchonmi soqta chunka phisqayoq centímetro, sayaynintaq soqta chunka phisqayoq centímetro.

¹¹Ukhunta hawantan ch'uya qori llaphllawan qatanki, ch'uya qoriwanmi chay patata muyuriqta ribetenki.

¹²Ruwallankitaqmi chaypaq tawa qori argollata, chaykunatan tawantin chakiman churanki, iskayta huknin qhataman iskaytataq hukkaqnin qhataman.

¹³Acacia kurkumanta k'aspikunatan ruwanki, chaykunatan qori llaphllawan k'uyunki.

¹⁴Hinaspan arca qhatapi kaq argollakunanta chay k'aspikunata suskhuchinki, chaykunawan arcata wantunankupaq.

¹⁵Chay k'aspikunaqa arca qhatakunapin kanqa, manan chaymanta horqokunqachu.

¹⁶Chay arcapitaqmi churanki qanman qosqayki chay kamachikuy simi qelqasqa iskaynin p'alta rumikunata.

¹⁷Ruwallankitaqmi ch'uya qorimanta arca kirpanatapas, hucha pampachana cheqas kananpaq, wask'anmi huk metro chunka centimetroyoq kanqa, anchontaq soqta chunka phisqayoq centímetro.

¹⁸Kirpanaq iskaynin puntanpi qorimanta takasqa iskay querubinkunatapas ruwallankitaqmi.

¹⁹Huknin puntapin huk querubinta ruwanki, hukkaqnin puntapitaq hukkaq querubinta, kirpanatawan iskaynin puntapi querubinkunatawanqa hukllatañan ruwanki.

²⁰Hucha pampachana cheqaspi qhawanakushaqmi kashanqa, querubinkunataq k'umuykuspa hucha pampachanata qhawashanqaku, chay cheqaspa patanman raphrankuta mast'arispataq llanthuykunqaku.

²¹Kirpanatataq arca pataman churanki, arcapitaq qanman qosqay kamachikuy simi qelqasqa iskaynin p'alta rumikunata churanki.

²²Hucha pampachana cheqaspin qanwan tupasaq, hinaspan arca patapi iskaynin querubinkuna ukhumanta qanwan rimasaq Israel runakunapaq imakunatachus qanman kamachisqayta.

²³Hinallataqmi acacia kurkumanta mesata ruwanki, wask'anmi huk metro kanqa, anchontaq kuskan metro, sayaynintaq qanchis chunka centímetro.

²⁴Ch'uya qori llaphllawanmi chayta qatanki, qoriwanmi muyuriq patanta ribetenki.

²⁵Mesa puntatan qanchis centímetro anchoyoqta kanchachanki, chaytataq ruwanki qori ribetewan muyuchisqata.

²⁶Ruwallankitaqmi tawa qori argollatapas, chaykunatan tawantin chaki qhataman churanki.

²⁷Argollakunaqa puntawan kuskan kanqa, mesa wantuna k'aspikuna chaykunata suskhunanpaq.

²⁸Mesa wantuna k'aspikunataqa acacia kurkumantan ruwanki, qori llaphllawanmi chaykunata k'uyunki, chaykunawanmi mesaqa apasqa kanqa.

²⁹Ch'uya qorillamantataqmi ruwanki qhata p'ukukunata, pocillokunata, vino hich'ana ofrendakunapaq vasokunata, p'uktu p'ukukunatawan.

³⁰Chay mesa patapiqa ñawpaqeypi churanaykichis t'antataqa churallankichispunin.

³¹Ruwallankitaqmi ch'uya qori candelerotapas, candelerotaqa takasqatan ruwanki. Tiyananpas, k'aspinpas, t'ikankunapas, mukmunkunapas, phanchisqankunapas kikillanmantan kanqa.

³²Soqta k'allman ladonkunapi kanqa: Kinsa k'allma huknin ladopi, kinsa k'allmataq hukkaq ladopi.

³³Candelero k'aspimanta p'alqariq soqtantin k'allman almendro t'ika hina kinsa t'ikayoqkama kanqa, mukmuntin phanchisqantin.

³⁴Candelero chawpi k'aspipipas almendro t'ika hina tawa t'ikayoqmi kanqa, mukmukunantin phanchisqakunantin.

³⁵Sapa iskay k'allman chawpi k'aspipi huk mukmu patapi tiyanqa.

³⁶Mukmunkunapas k'allmankunapas kikillanmantan chawpi k'aspipi kanqa, llapallanmi ch'uya qorimanta huk piezalla takasqa kanqa.

³⁷Ruwallankitaqmi qanchis lamparachakunatapas, chaykunatan k'allma patamankama churanki ñawpaqman k'anchananpaq.

³⁸Pábilo allichanakunapas uspha p'ukuchakunapas ch'uya qorimantan kanqa.

³⁹Kinsa chunka kinsayoq kilo ch'uya qorimantan ruwanki candelerota tukuy imaymanantinta.

⁴⁰Chaykunataqa orqopi qhawachirqayki chay kikillantapunin ruwanki.