Read DIOSPA QHELQACHISQ Quechua ÉXODO 26 Bible Online

ÉXODO 26 - DIOSPA QHELQACHISQ Quechua bible

ÉXODO 26

¹Ñañuy-ñañu linomanta, llawlli-puka, sani-puka, rawraq-puka q'aytumantawan chunka cortinata awanki, querubinkunaq rikch'aynin munay pallayniyoqta, chay cortinakunawanmi karpata ruwanki.

²Sapanka cortinan chunka iskayniyoq metro phisqa chunka centímetro sayayniyoq kanqa, iskay metro anchoyoqtaq. Llapa cortinan chay sayaykama kanqa.

³Phisqa cortinan ch'antaspa sirasqa kanqa, hukkaq phisqa cortinapas ch'antaspa sirasqallataq kanqa.

⁴Ñawpaq t'aqa tukukuy cortina puntapin llawlli-puka q'aytu ninrichasqakunata churanki, qhepa t'aqa cortina puntapipas ninrichallankitaqmi.

⁵Phisqa chunka ninrichasqakunatan ñawpaqkaqpi ruwanki, phisqa chunka ninrichasqatataq qhepakaqpipas ruwallankitaq, ninrichasqakunaqa qhawapunasqan kanqa.

⁶Ruwallankitaqmi phisqa chunka qori corchetetapas iskaynin t'aqa cortinata huñuykunanpaq, chhaynapin ch'ulla karpalla kapunqa.

⁷Awallankitaqmi cabra suphumanta cortinakunatapas karpata qatanapaq, chunka hukniyoq cortinatan awanki.

⁸Sapanka cortinan chunka kinsayoq metro phisqa chunka centímetro sayayniyoq kanqa, anchontaq iskay metro. Kaq sayaykamallan kanqa chay chunka hukniyoq cortinakuna.

⁹Phisqa cortinatan ch'antaspa siranki, soqta cortinatapas ch'antallankitaq, soqtakaq cortinatataq karpaq ñawpaqen ladopi q'empinki.

¹⁰Ñawpaq t'aqa tukukuy cortina puntapipas ruwallankitaqmi phisqa chunka ninrichasqakunata, qhepakaq t'aqa tukukuy cortina puntapipas phisqa chunka ninrichasqakunallatataq ruwanki.

¹¹Ruwallankitaqmi phisqa chunka bronce corchetetapas, chaykunatan ninrichasqakunanta suskhuchinki, hinaspan huñunki ch'ulla qatalla kananpaq.

¹²Qata cortinakunataq aswan hatun kanqa chayqa, cortinamanta kuskan puchuqqa karpa qhepa patamantan warkukunqa.

¹³Hinallataqmi karpaqa iskay ladoman hatun puchuq warkukuqwan qatasqa kanqa, huknin ladoman kuskan metro hukkaq ladomanpas kuskan metro.

¹⁴Karpapaqqa ruwallankitaqmi anejo qarakunamanta puka teñisqa qatata, patanpaqpas llamp'uy-llamp'u qarakunamanta huk qatata.

¹⁵Karpapaqqa ruwallankitaqmi acacia tablamanta marcokunata, chaykunatan allinta sayachinki.

¹⁶Sapanka marcon tawa metro phisqa chunka centímetro sayayniyoq kanqa, anchontaq soqta chunka phisqayoq centímetro.

¹⁷Sapanka marcon iskay chakiyoq kanqa, chay hinatan llapa marcota karpapaq ruwanki.

¹⁸Marcokunata karpapaq ruwaspaykiqa, iskay chunka marcotan uray ladopaq ruwanki.

¹⁹Hinallataq tawa chunka qolqe sayanata iskay chunka marcopaq ruwanki, sapanka marcopaq iskay sayanata iskaynin chakipaq.

²⁰Hinallataq karpaq hukkaqnin ladopaqpas, wichay ladopaqpas, iskay chunka marcota ruwanki,

²¹tawa chunka qolqe sayanantinta, sapanka marco iskay sayanayoq kananpaq.

²²Karpaq qhepanpaqtaq, inti haykuy ladopaq, soqta marcota ruwanki.

²³Iskay marcotawan karpaq qhepa esquinankunapaq ruwanki.

²⁴Chay marcokunaq uranmi anchorisqa kanqa, umantaq huk anillollaman suskhunqa, chhaynan chay iskay marcopas kanqa iskaynin esquinapaq.

²⁵Chay hinaqa, pusaq marcon kanqa chunka soqtayoq qolqe sayanayoqkama, sapanka marco iskay sayanayoqkama.

²⁶Ruwallankitaqmi acacia kurkumanta phisqa k'aspikunatapas karpaq huknin lado marcokunapaq,

²⁷hinallataq phisqa k'aspikunatapas karpaq hukkaqnin lado marcokunapaq, hinallataq phisqa k'aspikunatapas karpaq qhepan lado marcokunapaq, inti haykuy ladopaq.

²⁸Chawpinta puriq k'aspitaq huk esquinamanta huk esquinakama marcokunaq kuskanninta suskhunqa.

²⁹Hinamantataq chay marcokunata qori llaphllawan k'uyunki, ruwallankitaqmi qori argollakunatapas k'aspikuna suskhunanpaq, chay k'aspikunatapas qori llaphllawanmi k'uyunki.

³⁰Chaymantataq karpata ruwanki imaynatachus kay orqopi qhawachirqayki chay kikillanta.

³¹Ñañuy-ñañu linomanta, llawlli-puka, sani-puka, rawraq-puka q'aytumantawan cortinata awanki, querubinkunaq rikch'aynin munay pallayniyoqta.

³²Hinaspa qori ganchokunawan chayta warkunki qori llaphllawan k'uyusqa acacia k'aspi tawa postekunaman, chaykunaqa qolqemanta tawa sayanakunaman sayachisqan kanqa.

³³Chay cortinatan corchetekunaq uranpi warkunki, chay cortina qhepamantaq kamachikuy simiyoq arcata apaykunki. Chay cortinataq t'aqanqa Ch'uya Cheqasta Ch'uyay-ch'uya Cheqastawan.

³⁴Ch'uyay-ch'uya Cheqaspitaq kamachikuy simiyoq arca pataman kirpanata churanki.

³⁵Mesatan Ch'uya Cheqaspi churanki, karpaq wichay ladonpi, candelerotataq mesaq chimpanpi, karpaq uray ladonpi.

³⁶Karpa punkupaq huk cortinata ruwanki ñañuy-ñañu linomanta, llawlli-puka, sani-puka, rawraq-puka q'aytumantawan munay pallayniyoq awasqamanta.

³⁷Cortinapaqpas ruwallankitaqmi qori llaphllawan k'uyusqa acacia k'aspi phisqa postekunata qori ganchoyoqtakama, postekunapaqpas phisqa bronce sayanakunatan unuyachispa ruwanki.