Read DIOSPA QHELQACHISQ Quechua ÉXODO 28 Bible Online

ÉXODO 28 - DIOSPA QHELQACHISQ Quechua bible

ÉXODO 28

¹Israel runakuna ukhumantan sacerdotey kanankupaq ñawpaqeykiman qayllaykachikunki wawqeyki Aaronta churinkunatawan: Nadabta, Abiuta, Eleazarta, Itamartawan.

²Wawqeyki Aaronpaqtaq sumaq p'achata ruwapunki ima sumaq munayllaña kananpaq.

³Qanmi rimapayanki llapa yuyaychasqay llank'ay yachaq runakunata Aaronpa p'achanta ruwanankupaq, chay p'achawanmi Aaronqa sacerdotey kananpaq churasqa kanqa.

⁴Kay p'achakunatan ruwanqaku: Qhasqo-ch'uspata, unkuta, capata, pallayniyoq sotanata, linomanta awasqa uma k'uyunata, chumpitawan. Sumaq p'achakunata wawqeyki Aaronpaq churinkunapaqwan ruwachinki, sacerdotey kanankupaq.

⁵Chaykunataqa ruwanqaku ñañuy-ñañu linomanta, ñañuy-ñañu qorimanta, llawlli-puka, sani-puka, rawraq-puka q'aytumantawan awasqamanta.

⁶Unkutan ruwanqaku ñañuy-ñañu linomanta, ñañuy-ñañu qorimanta, llawlli-puka, sani-puka, rawraq-puka q'aytumantawan munay pallayniyoq awasqamanta.

⁷Chay unkuq iskaynin lado rikraman walqanantaqmi kikinmanta ruwasqa kanqa, ahinapin huk awaylla kanqa.

⁸Unkuta wataq munay pallayniyoq chumpiqa unkuwan hukllan kanqa, ñañuy-ñañu linomanta, ñañuy-ñañu qorimanta, llawlli-puka, sani-puka, rawraq-puka q'aytumantawan awasqa.

⁹Hap'illankitaq yanayoq yuraq iskay umiña rumitapas, hinaspan chaykunapi Israelpa churinkunaq sutinta k'iñaspa qelqanki,

¹⁰huknin rumipi soqta sutita, hukkaq rumipipas soqta sutillatataq, nacesqankuman hina.

¹¹Israelpa churinkunaq sutintaqa iskaynin rumipin qelqachinki rumipi k'iñaqwan, k'iñasqa sellota hinan ruwanqa, iskaynin rumitataq muyuriq qoriman ch'olqochinqa.

¹²Hinan iskaynin rumita unkuq rikra watunman churanki Israelpa churinkunata yuyarichina rumi kananpaq. Chay hinatan Aaronqa ñoqa Señor Diospa ñawpaqeypi sutinkuta iskaynin rikranpi apanqa yuyarichiwanankupaq.

¹³Qorimantan ch'olqochinakunataqa ruwanki.

¹⁴Ruwallankitaqmi simp'asqa iskay qori watutapas, hinaspa chaykunata ch'olqochinakunaman k'askachinki.

¹⁵Ruwallankitaqmi munayniy sut'inchanapaq qhasqo-ch'uspatapas, munay pallayniyoq awasqata. Chaytan ruwanki unkuta hina ñañuy-ñañu linomanta, ñañuy-ñañu qorimanta, llawlli-puka, sani-puka, rawraq-puka q'aytumantawan awasqamanta.

¹⁶Chay ch'uspaqa tawa ch'ullpayoqmi kanqa, anchonpas wask'anpas huk cuartakaman kanqa.

¹⁷Umiña rumikunatan chayman ch'olqochinki tawa wachuchasqata. Ñawpaqkaq wachupin kanqa puka umiña, q'ellu umiña, nina qespi umiñapiwan.

¹⁸Iskaykaq wachupin kanqa siwar umiña, yana q'omer umiña, qespi umiñapiwan.

¹⁹Kinsakaq wachupin kanqa puka-samaq q'ellu umiña, ch'eqchi umiña, sani umiñapiwan.

²⁰Tawakaq wachupin kanqa q'omer umiña, yanayoq yuraq umiña, yana-puka umiñapiwan. Llapallanmi qoripikama ch'olqochisqa kanqa.

²¹Rumiqa chunka iskayniyoqmi kanqa, Israelpa churinkunaq sutinqa chunka iskayniyoqmi, sapanka rumipin sello hina k'iñakunqa chunka iskayniyoq ayllumanta huknin suti.

²²Ruwallankitaqmi qhasqo-ch'uspapaq ch'uya qorimanta simp'asqa watukunatapas,

²³iskay qori argollatapas, chaykunatan qhasqo-ch'uspaq iskaynin wichay ch'ullpanman churanki.

²⁴Hinaspa iskaynin qori watuta churanki chay iskaynin argollaman.

²⁵Chay watukunaq puntantataq unkupi iskaynin ch'olqochinaman churanki, ahinata chay watukunata hap'ichinki unkuq ñawpaqen walqanaman.

²⁶Ruwallankitaqmi iskay qori argollatapas, chaykunatan qhasqo-ch'uspaq iskaynin ura puntanman churanki, unkuwan tupaypi qhepa ch'ullpankunaman.

²⁷Ruwallankitaqmi iskay qori argollatapas, chaykunatan churanki unkuq iskaynin walqana ñawpaqpi, urankaqpi, sirasqa tupaypi, unku chumpi patapi.

²⁸Hinan qhasqo-ch'uspa argollakunaqa unku iskaynin argollakunaman llawlli-puka watuwan watasqa kanqa, chhaynapin qhasqo-ch'uspaqa unku chumpi patapi kashanqa, manataqmi unkumanta lloqsinqachu.

²⁹Aaronqa munayniy sut'inchanapaq qhasqo-ch'uspawan churaykukuspa karpaman haykunqa chayqa, qayllayman qhasqonpi apaykamullawanqataqmi Israelpa churinkunaq sutinta yuyarichiwananpaq.

³⁰Munayniy sut'inchanapaq qhasqo-ch'uspapitaq Urimta Tumimta churanki, qayllayman haykumuqtin Aaronpa qhasqonpi kashananpaq. Ahinatan Aaronqa qayllayman Israel runakunapaq sut'inchanata qhasqonpi apallanqapuni.

³¹Unkupaqmi capata awanki llawlli-puka q'aytumantakama.

³²Chawpinpin umapaq t'oqo kanqa, chay t'oqo muyuriqmi q'empisqa allin-allin sirasqa kanqa, qara chalecoq kunkan hina, ama llik'irparikunanpaq.

³³Capaq canton muyuriqmantaq churanki llawlli-puka, sani-puka, rawraq-puka q'aytumanta awasqa granadakunata, qori campanillakunawan chawpinasqata,

³⁴huknin qori campanillaq qhepanman huk granada, hukkaq qori campanillaq qhepanmanpas huk granada.

³⁵Aaronqa chay capawan churaykusqan serviwanqa, ñoqa Señor Diospa qayllay Ch'uya Cheqasman haykuqtin lloqsiqtin campanillakunaq “chin-chin” nisqan uyarikunqa, ama pay wañunanpaq.

³⁶Ruwallankitaqmi ch'uya qori llaphllatapas, hinaspan chaypi sellota hina k'iñaspa qelqanki “Señor Diospaq t'aqasqa” niq simita.

³⁷Hinaspanmi chayta uma k'uyunaq ñawpaqenman llawlli-puka watuwan qaqata watanki.

³⁸Aaronpa mat'illanpipunin kashanqa. Israel runakuna ofrenda haywasqankupi huchallikuqtinkupas paymi huchankuta apanqa, ñoqataq haywawasqankuta chaskisaq chay qori llaphllaqa mat'illanpipuni kasqanrayku.

³⁹Pallayniyoq sotanatapas uma k'uyunatapas ñañuy-ñañu linomantan awanki, chumpipas munay pallayniyoqmi kanqa.

⁴⁰Aaronpa churinkunapaqtaq ruwapunki sotanakunata, chumpikunata, chukukunatawan, ima sumaq munayllaña kanankupaq.

⁴¹Chaykunawanmi p'achaykachinki wawqeyki Aaronta churinkunatawan, hinaspan aceitewan umankuta hawispa sacerdote kanankupaq churapuwanki, t'aqapuwanki.

⁴²Cinturamanta moqokama chayaq lino calzoncillokunatapas ruwapullankitaq, q'ala cuerponkuta pakananpaq.

⁴³Aaronwan churinkunawanmi chaykunawan churakunqaku Dioswan Tupana Karpaman haykunankupaq otaq Ch'uya Cheqaspi yupaychaq altarman asuykunankupaq, ama huchallikuspa wañunankupaq. Chayqa paypaqpas qhepa mirayninkupaqpas wiñaypaq kamachikuy simin.