Read DIOSPA QHELQACHISQ Quechua ÉXODO 3 Bible Online

ÉXODO 3 - DIOSPA QHELQACHISQ Quechua bible

ÉXODO 3

¹Moisesqa Madián suyupi suegron sacerdote Jetroq ovejankunata michishaspan, ovejakunata ch'inneq chimpaman qatirqan, hinaspa chayarqan Diospa orqon Horebkama.[3]

²Señor Diospa angelninmi Moisesman rikhurirqan t'ankar sonqo nina rawraypi. Paytaq qhawarispa rikurqan t'ankarpa rawrashaspa mana ruphasqanta.

³Chaymi Moisesqa nirqan: ¡Musphanamá kayqa! Risaq, qhawamusaq imanaqtinchus haqay t'ankarta mana ruphasqanta yachanaypaq, nispa.

⁴Qhawananpaq Moisés qayllaykusqanta rikuspataq, Señor Diosqa t'ankar ukhumanta waqyamurqan: — ¡Moisés! ¡Moisés! nispa. Paytaq kutichirqan: — Kaypin kashani, nispa.

⁵Hinan Señor Diosqa nirqan: — Sayashasqayki cheqasqa ch'uyan, chayrayku ama asuykamuychu, aswanpas usut'aykita ch'utikuy.

⁶Ñoqan kani taytaykiq Diosnin, hinallataq Abrahampa, Isaacpa, Jacobpa Diosnin, nispa. Chaymi Moisesqa Diosta qhawariyta manchakuspa uyanta pakaykukurqan.

⁷Señor Diosqa nillarqantaq: — Rikunipunin llaqtaypa Egipto suyupi muchushasqanta, uyarinin muchuchiqkuna hawa waqyakamusqankuta, yachanitaqmi ñak'arishasqankutapas.

⁸Egipto runakunamanta kacharichiqmi uraykamuni. Paykunatan chay suyumanta horqospa allinkaq hatunkaq hallp'aman pusasaq, lecheq miel misk'iq askha kasqan hallp'aman. Chaypin tiyan Canaán runakuna, Het runakuna, Amor runakuna, Ferez runakuna, Hev runakuna, Jebus runakunapas.

⁹Kayqa Israel runakunaq waqyakamusqantan uyarini, rikullanitaqmi Egipto runakunaq sinchi muchuchisqantapas.

¹⁰Chayrayku, rey Faraonman riy, paymanmi kachasqayki Egipto suyumanta Israel llaqtayta horqomunaykipaq, nispa.

¹¹Moisestaq ichaqa Diosta nirqan: — ¿Pitaq ñoqari kani rey Faraonman rispa Israel runakunata Egipto suyumanta horqomunaypaq? nispa.

¹²Chaymi Diosqa nirqan: — Qanwanmi ñoqa kasaq. Egipto suyumanta llaqtayta horqomuqtiykin kay orqopi yupaychawankichis, chaywanmi ñoqaq kachasqayta yachanki, nispa.

¹³Moisestaq Diosta nirqan: — Israel runakunaq kasqanman rispa: Ñawpa taytaykichiskunaq Diosninmi qankunaman kachamuwan, niqtiyqa: “¿Imataq sutinri?” niwanqakun. Hinari, ¿ima nisaqtaq paykunata? nispa.

¹⁴Diostaq Moisesta nirqan: — Ñoqan kani Ñoqaqa. Israel runakunata ninki: “Ñoqan kani” nisqa sutiyoqmi qankunaman kachamuwan, nispa.

¹⁵Diosmi Moisesta nillarqantaq: — Kay hinatan Israel runakunata ninki: Señor Diosmi ñawpa taytaykichiskunaq Diosnin, Abrahampa, Isaacpa, Jacobpa Diosninmi qankunaman kachamuwan, nispa. Kay sutiymi wiñaypaq, kay sutiywanmi wiñay-wiñaypaq reqsiwanqaku.

¹⁶Rispayki Israel kurak runakunata huñumuy, hinaspa paykunata niy: Señor Diosmi, ñawpa taytaykichiskunaq Diosninmi, Abrahampa, Isaacpa, Jacobpa Diosninmi rikhurimuwarqan. Paymi nisunkichis: Cheqaqtapunin qhawamurqaykichis, rikurqanitaq Egiptopi imaymana ruwasqasuykichistapas.

¹⁷Ñoqan Egipto suyupi ñak'arisqaykichismanta horqonaypaq prometekuykichis, hinaspan lecheq miel misk'iq askha kasqan hallp'aman pusasqaykichis. Chaypin tiyan Canaán runakuna, Het runakuna, Amor runakuna, Ferez runakuna, Hev runakuna, Jebus runakunapas, nispa.

¹⁸Simiykitaqa uyarinqakun, hinan Israel kurak runakunawan Egipto suyu reypata rispayki ninki: Hebreo runakunaq Diosnin Señormi rikhurimuwarqanku. Chaymi kunan valekuykiku ch'inneqta kinsa p'unchay puriyta rinaykupaq, Señor Diosniykuman sacrificiokunata haywamunaykupaq, nispa.

¹⁹Ichaqa Egipto suyu reyqa manan rinaykichista munanqachu mana sinchi mat'isqaqa, Chaytaqa yachanin.

²⁰Chaymi atiyniywan imaymana musphanakunata chaypi ruwaspa Egipto runakunata hasut'isaq, chayraqmi ripunaykichispaq kacharipusunkichis.

²¹Ñoqataq Egipto runakunawan sumaqta qhawarichisqaykichis, hinan lloqsishaspaykichis tukuy imaymanayoq ripunkichis.

²²Sapanka warmin mañakunqa wasi-masinmantapas qorpanmantapas qolqe alhajakunata, qori alhajakunata, p'achakunatapas, chaykunawanmi p'achaykachinkichis churiykichistapas ususiykichistapas, ahinatan Egipto runakunata llat'anankichis, nispa.