Read DIOSPA QHELQACHISQ Quechua ÉXODO 39 Bible Online

ÉXODO 39 - DIOSPA QHELQACHISQ Quechua bible

ÉXODO 39

¹Ch'uya Cheqaspi servinapaq pallayniyoq p'achataqa ruwarqanku llawlli-puka, sani-puka, rawraq-puka q'aytumantan. Aaronpaqpas ruwallarqankutaqmi ch'uya p'achata, Moisesta Señor Diospa kamachisqanman hina.

²Ruwallarqankutaqmi unkutapas ñañuy-ñañu qorimanta, llawlli-puka, sani-puka, rawraq-puka q'aytumanta, ñañuy-ñañu linomantawan.

³Qori llaphllakunatan takarqanku, chaykunamantataq ñañuy-ñañu qori q'aytuta kuchurqanku. Hinaspan chay qorimanta, llawlli-puka, sani-puka, rawraq-puka q'aytumanta, ñañuy-ñañu linomantawan munay pallayniyoqta awarqanku.

⁴Unkuq iskaynin rikra walqanantapas ruwallarqankutaq, ahinapin iskaynin lado huk awaylla karqan.

⁵Watanapaq unkupi chumpiqa unkuwan hukllan karqan, qorimanta, llawlli-puka, sani-puka, rawraq-puka q'aytumanta, ñañuy-ñañu linomantawan awasqallataq karqan, Moisesta Señor Diospa kamachisqanman hina.

⁶Thuparqankun yanayoq yuraq umiña rumikunatapas, chaykunapin Israelpa churinkunaq sutinta sellota hina k'iñaspa qori ch'olqochinakunaman ch'olqochirqanku.

⁷Hinaspan chaykunata unkuq walqanankunaman churarqanku, Israelpa churinkuna yuyarichiq rumi kananpaq, Moisesta Señor Diospa kamachisqanman hina.

⁸Ruwallarqankutaqmi munay pallayniyoq qhasqo-ch'uspatapas, qorimanta, llawlli-puka, sani-puka, rawraq-puka q'aytumanta, ñañuy-ñañu linomantawan, unkuta hina awasqata.

⁹Chay ch'uspaqa tawa ch'ullpayoqmi karqan, anchonpas wask'anpas huk cuartakaman karqan.

¹⁰Chaymantaq tawa wachuchasqa umiña rumikunata k'askachirqanku. Ñawpaqkaq wachupin karqan: puka umiña, q'ellu umiña, nina-qespi umiñapiwan.

¹¹Iskaykaq wachupin karqan: siwar umiña, yana q'omer umiña, qespi umiñapiwan.

¹²Kinsakaq wachupin karqan: pukaman-samaq q'ellu umiña, ch'eqchi umiña, sani umiñapiwan.

¹³Tawakaq wachupitaq karqan: q'omer umiña, yanayoq yuraq umiña, yana-puka umiñapiwan. Llapallanmi qoripikama ch'olqochisqa karqan.

¹⁴Chunka iskayniyoq rumin karqan, Israelpa chunka iskayniyoq churinkunaq sutinman hina. Sapanka rumipin sello hina k'iñasqa chunka iskayniyoq ayllumanta huknin suti karqan.

¹⁵Ruwallarqankutaqmi qhasqo-ch'uspapaq ch'uya qorimanta simp'asqa watukunatapas.

¹⁶Ruwallarqankutaqmi iskay qori ch'olqochinatapas iskay qori argollatapas, hinaspan chay iskay qori argollata qhasqo-ch'uspaq iskaynin wichay ch'ullpanman churarqanku.

¹⁷Hinaspan iskaynin qori watuta qhasqo-ch'uspaq ch'ullpankunapi kaq argollakunaman churarqanku.

¹⁸Chay watukunaq patantataq iskaynin ch'olqochinaman churarqanku, chay hinatan chay watukunata unkuq walqananman hap'ichirqanku.

¹⁹Ruwallarqankutaqmi iskay qori argollatapas, chaykunatan qhasqo-ch'uspaq iskaynin uray ch'ullpanman churarqanku, unkuwan tupaypi qhepa ch'ullpankunaman.

²⁰Ruwallarqankutaqmi iskay qori argollatapas, chaykunatan churarqanku unkuq iskaynin walqana qallariy urapi, unku chumpi patapi.

²¹Hinan qhasqo-ch'uspa argollakunataqa unku argollakunaman llawlli-puka q'aytuwan watarqanku, chhaynapi qhasqo-ch'uspaqa kikin unku chumpi patapi kananpaq, amataq unkumanta qhasqo-ch'uspaqa lloqsinanpaq, Moisesta Señor Diospa kamachisqanman hina.

²²Unkupaqmi capata llawlli-puka q'aytumanta awarqanku.

²³Chawpinpin umapaq khallu karqan, chay khalluq muyuriqnintan q'empispa allin-allinta sirarqanku qara chalecoq kunkanta hina, ama llik'irparikunanpaq.

²⁴Capaq canton muyuriqmantaq churarqanku llawlli-puka, sani-puka, rawraq-puka q'aytumanta, ñañuy-ñañu linomantawan awasqa granadakunata.

²⁵Hinallataqmi ruwarqanku ch'uya qori campanillakunatapas, muyuriqnintin capaq cantonpitaq granadakuna ukhupi chawpinarqanku,

²⁶huknin campanillaq qhepanman huk granadata, hukkaq campanillaq qhepanmantaq huk granadata. Chay hinan servinapaq Aaronpa churakunan capaqa karqan, Moisesta Señor Diospa kamachisqanman hina.

²⁷Awapullarqankutaqmi ñañuy-ñañu lino sotanakunatapas Aaronpaq churinkunapaqwan,

²⁸hinallataq ñañuy-ñañu linomanta awasqa uma k'uyunatapas, chukukunatapas, calzoncillokunatapas.

²⁹Hinallataq chumpitapas munay pallayniyoqta awarqanku llawlli-puka, sani-puka, rawraq-puka q'aytumanta, ñañuy-ñañu linomantawan, Moisesta Señor Diospa kamachisqanman hina.

³⁰Hinallataqmi uma sacerdotepaq ch'uya llaphllatapas ch'uya qorimanta ruwarqanku, hinaspan chaypi sello k'iñasqata hina qelqarqanku: “Señor Diospaq t'aqasqa” niq simita.

³¹Hinaspanmi chayman llawlli-puka watuta churarqanku, uma k'uyunaq ñawpaqenman watanapaq, Moisesta Señor Diospa kamachisqanman hina.

³²Chhaynatan Dioswan Tupana Karpa ruwayqa hunt'asqa tukukurqan. Israel runakunaqa Moisesta Señor Diospa kamachisqanman hinan chay kikillanta ruwarqanku.

³³Hinaspan Dioswan Tupana Karpata Moisesman apamurqanku tukuy imaymanantawan: Ganchonkunata, marconkunata, suskhuq k'aspinkunata, sayaq k'aspinkunata, sayanankunata,

³⁴puka teñisqa anejo qarakunamanta qatata, llamp'uy-llamp'u qarakunamanta qatata, Ch'uyay-ch'uya Cheqasta t'aqaq cortinata,

³⁵kamachikuy simiyoq arcata, suskhuq k'aspikunata, kirpanata,

³⁶mesata, tukuy imaymanantawan, Diospa ñawpaqenpi churana t'antata,

³⁷ch'uya qori candelerota, maychus kananpi lamparachakunata tukuy imaymanantawan, k'anchaqpaq aceiteta,

³⁸qori altarta, hawina aceiteta, q'apashaq inciensota, karpa punku cortinata,

³⁹bronce rejillayoq bronce altarta, suskhuq k'aspinkunata, tukuy imaymanantinta, tiyanayoq puruñata,

⁴⁰kancha cortinakunata, sayaq k'aspikunata, sayanankunantinta, kancha punku cortinata, waskhankunata, takarpukunantinta, Dioswan Tupana Karpapi servinapaq tukuy imaymanatawan.

⁴¹Ch'uya Cheqaspi servinapaq pallayniyoq p'achatapas, sacerdote Aaronpaq ch'uya p'achatapas, hinallataq churinkunaq p'achantapas, sacerdote-kayninkupi servinankupaq.

⁴²Moisesta Señor Diospa imaymana kamachisqanman hinapunin Israel runakunaqa tukuy imatapas ruwarqanku.

⁴³Moisesmi tukuy ruwasqankuta qhawaspa repararqan Señor Diospa kamachisqanman hina ruwasqankuta, hinaspan paykunata samincharqan.