Read DIOSPA QHELQACHISQ Quechua ÉXODO 4 Bible Online

ÉXODO 4 - DIOSPA QHELQACHISQ Quechua bible

ÉXODO 4

¹Hinan Moisesqa kutichirqan: — Paykunari creewankumanchu, simiytapas uyariwankumanchu, aswanpas niwanqakuchá: Manan Señor Diosqa rikhurirqasunkichu, nispa.

²Señor Diostaq payta nirqan: — ¿Imatan makiykipi hap'ishanki? nispa. Paytaq: — Tawnatan, nirqan.

³Señor Diostaq kamachirqan: — Pampaman chayta chanqay, nispa. Hinan Moisesqa chayta pampaman chanqarqan, hinaqtinmi tawnaqa mach'aqwayman tukurqan. Moisestaq mach'aqwaymanta ayqerirqan.

⁴Chaymi Señor Diosqa Moisesta nirqan: — Chupanmanta hap'iy, nispa. Chupanmanta hap'iqtintaq makinpi tawnaman tukurqan.

⁵Nillarqantaq: — Chaywanmi creenqaku ñawpa taytaykikunaq Diosnin, Abrahampa, Isaacpa, Jacobpa Diosnin, ñoqa Señor Diosqa qanman rikhurisqayta, nispa.

⁶Señor Diosqa nillarqantaqmi: — Makiykita qhasqoykiman winaykukuy, nispa. Paytaq makinta qhasqonman winaykukurqan, horqokamuqtintaq makinqa rit'i hina yuraqllaña lepra onqoyniyoq kapushasqa.

⁷Hinan Diosqa nirqan: — Huktawan makiykita qhasqoykiman winaykukuy, nispa. Chaymi payqa huktawan makinta qhasqonman winaykukurqan, huktawan horqokamuqtintaq wakin aychan hina iman kaq kapushasqa.

⁸Señor Diosqa nillarqantaqmi: — Manataq ñawpaqkaq señalwan creesunkikuchu kasusunkikuchu chayqa, qhepakaq señalwanmi creesunkiku.

⁹Manataqchus kay iskay señalwanpas creesunkiku kasusunkiku chayqa, mayu unuta wisispan hallp'a pampaman hich'anki. Hinan chay unuqa hallp'a pampaman chayaspa yawarman tukunqa, nispa.

¹⁰Moisestaq Señor Diosta nirqan: — ¡Ay, Señor Diosníy! Manan hayk'aqpas allin rimaq runachu kani, ñawpaqpas kunanpas kay kamachiykiqa manan usqhay rimaqchu kani, sasachaspa rimaqmi kani, nispa.

¹¹Señor Diostaq payman kutichirqan: — ¿Pitaq runata rimachin? Chayri, ¿pitaq ruwan upatapas, roqt'otapas, rikuqtapas, ñawsatapas? Ñoqa Señor Diospunin ruwani.

¹²Chhaynaqa, rillay, ñoqan rimachisqayki, imatachus rimanaykitan yachachisqayki, nispa.

¹³Chaymi Moisesqa nirqan: — ¡Ay, Señor Diosníy! Rogakuykin, hukta kachay, nispa.

¹⁴Hinan Señor Diosqa Moisespaq phiñakuspa nirqan: — Chaypin Leví runa wawqeyki Aarón kashan, ñoqaqa yachanin payqa allin rimaq kasqanta. Paymi taripamuqniyki hamushan, qanta rikuspan anchata kusikunqa.

¹⁵Qanmi payta rimapayanki, rimanan simikunatan yuyaychanki, ñoqataq rimachisqayki, paytapas rimachisaq, yachachisqaykichistaq imatachus ruwanaykichistapas.

¹⁶Qanmi Aaronta rimapayanki ñoqapas rimapayashayman hinata, paytaq rimapayasqaykita runakunaman willanqa.

¹⁷Kay tawnatan apanki, kaywanmi musphanakunata ruwanki, nispa.

¹⁸Moisesmi suegron Jetroq wasinman kutispa payta nirqan: — Valekuykin Egipto suyupi wawqeykunaman rinaypaq, kutispay kawsashankuraqchus icha manachus chayta yachamusaq, nispa. Chaymi Jetroqa Moisesta: — Sumaqllaña rirqoy, nirqan.

¹⁹Señor Diosmi Moisesta Madián suyupi nillarqantaq: — Egipto suyuta kutipuy, wañuchiyta munasuqniykikunaqa wañupunkuñan, nispa.

²⁰Chaymi Moisesqa warmintapas churinkunatapas huk asnoman sillaykachirqan, hinaspan Egipto suyuman kutirqan. Diospa tawnantapas aparikullarqantaq.

²¹Señor Diosmi Moisesta nillarqantaq: — Egiptoman kutispaykiqa, rey Faraonpa ñawpaqenpin kallpachasqay kaspa musphanakunata ruwanki. Ñoqataq sonqonta rumiyaykachisaq, chaymi Israel runakunata mana kacharinqachu.

²²Rey Faraontan ninki: — Señor Diosmi nin, Israelqa phiwi churiymi.

²³Ñan niykiña yupaychamuwananpaq churiyta kacharinaykita, manataq ripunanpaq kachariyta munankichu chayqa, ñoqan phiwi churiykita wañuchisaq, nispa.

²⁴Ñanta purishaqtinkun samakuna cheqaspi Señor Diosqa Moiseswan tuparqan, hinaspan wañuchiyta munarqan.

²⁵Chaymi Seforaqa filo rumita hap'ispa churinpa qhari-kaynin qarachata kuchuqarqan, hinaspa chaywan Moisespa phakanta tupaykurqan: — Qanqa cheqaqtapunin yawarwan hark'asqa qosay kanki, nispa.

²⁶Chayraqmi Señor Diosqa Moisesta ripunanpaq kacharirqan. (Seforaqa: Yawarwan hark'asqa qosay, nispaqa nirqan, qhari-kayta señalasqanraykun).

²⁷Chaykamataq Señor Diosqa Aaronta nirqan: — Moisesman taripaq ch'inneqta riy, nispa. Chaymi payqa rirqan, Diospa orqonpi tupaspataq Moisesta much'aykuspa napaykurqan.

²⁸Hinan Moisesqa Aaronman willarqan Señor Diospa kamachimusqan llapan simikunata, hinallataq llapan señalkunata ruwanapaq kamachimusqantapas.

²⁹Hinaspan Moiseswan Aaronwan rispa, llapa Israel kurak runakunata huñuykurqanku.

³⁰Aarontaq Señor Diospa Moisesman lliw imaymana nisqanta paykunaman willarqan, Moisestaq runakunaq rikushasqan señalkunata ruwarqan,

³¹paykunataq creerqanku. Hinaspan Señor Diospa paykunata yuyarimusqanta, ñak'arisqankutapas rikusqanta yachaspanku, yupaychanankupaq k'umuykukurqanku.