Read DIOSPA QHELQACHISQ Quechua ÉXODO 7 Bible Online

ÉXODO 7 - DIOSPA QHELQACHISQ Quechua bible

ÉXODO 7

¹Señor Diostaq Moisesta nirqan: — Ñoqan rey Faraonpaq rantiypi kanaykipaq churayki, wawqeyki Aarontaq profetayki kanqa.

²Qanmi lliw imaymana qanman ñoqaq kamachisqayta Aaronman ninki, wawqeyki Aarontaq rey Faraonta rimapayanqa Israel runakunata suyunmanta kacharipuqtin ripunankupaq.

³Ñoqataq ichaqa rey Faraonpa sonqonta rumiyaykachisaq, chaymi Egipto suyupi señalkunata musphanakunata askhayachishaqtiypas,

⁴rey Faraonqa mana kasusunkichischu. Chaymi ñoqaqa Egipto suyu contra sayarisaq, hinaspan Egipto runakunata sinchita muchuchispa chay suyumanta horqosaq ejército hina Israel llaqtayta.

⁵Ahinapin Egipto suyu contra sayarispa Israel runakunata chaymanta horqoqtiy, Egipto runakunaqa yachanqaku ñoqa Señor Diosqa kasqayta, nispa.

⁶Moiseswan Aaronwantaq Señor Diospa kamachikusqanta hina ruwarqanku.

⁷Rey Faraonta rimapayashaspan Moisesqa pusaq chunka watayoq karqan, Aaronpas pusaq chunka kinsayoq watayoq karqan.

⁸Señor Diosmi Moisestawan Aarontawan nirqan:

⁹— Rey Faraonchus nisunkichis: Milagrota rikuchiwaychis, nispa chayqa, Moisés, qanmi Aaronta ninki: Tawnaykita rey Faraonpa ñawpaqenman chanqay mach'aqwayman tukunanpaq, nispa.

¹⁰Moiseswan Aaronwanmi rey Faraonpata rirqanku, hinaspanmi Señor Diospa kamachikusqanta ruwarqanku. Aaronmi tawnanta chanqarqan rey Faraonpa ñawpaqenman oficialninkunaq ñawpaqenmanwan, mach'aqwaymantaq tukurqan.

¹¹Hinan rey Faraonqa waqyachirqan yachayniyoqkunata, layqakunata, chaymi Egipto layqakunapas kasqallantataq layqakuyninkuwan ruwarqanku.

¹²Sapankan tawnanta pampaman chanqarqan, hinan sapanka tawnaqa mach'aqwayman tukurqan. Aaronpa tawnantaq ichaqa chaykunaq tawnanta oqoykurqan.

¹³Chaypas rey Faraonpa sonqonqa rumiyaykachisqan karqan, manataq paykunata kasurqanchu, Señor Diospa nisqanman hina.

¹⁴Hinan Señor Diosqa Moisesta nirqan: — Rey Faraonpa sonqonmi rumiyasqa kashan, manan Israel runakunata kachariyta munanchu.

¹⁵Tutamanta rey Faraón Nilo mayuta rishaqtin, rispayki mayu patapi payta suyamuy, mach'aqwayman tukuq tawnaykitataq aparikuy.

¹⁶Chaypin nimunki: Hebreo runakunaq Diosnin Señormi qanman kachamuwarqan, nirqasunkitaq: Llaqtayta kachariy ch'inneqpi yupaychamuwananpaq, manataq kunankama kasukunkichu, nispa.

¹⁷Señor Diosmi nisunki: Kunanmi yachanki Señor Dios kasqayta, kamachiy Moisés tawnanwan mayu unuta waqtaqtinmi yawarman tukunqa.

¹⁸Hinan mayupi challwakuna wañuranqa, mayutaq asnarinqa, chaymi Egipto runakunaqa mayu unu ukyayta millakunqaku, nispa.

¹⁹Señor Diosmi Moisesta nirqan, Aaronta niy: Tawnaykita hap'iy, hinaspa haywariy Egipto unukunaman, mayunkuman, yarqhankuman, qochankuman, p'uytunkumanpas, yawarman tukunanpaq. Chaymi Egipto suyuntinpi yawar kanqa, k'ullu puruñakunapipas rumi p'uyñukunapipas, nispa.

²⁰Hinan Moiseswan Aaronwan ruwarqanku Señor Diospa kamachikusqanta hina. Aarontaq tawnata hoqarispa, rey Faraonpas oficialninkunapas rikushaqtin mayu unuta waqtarqan, chaymi mayu unuqa llapallan yawarman tukurqan.

²¹Mayupi challwakunapas wañurarqan, mayutaq asnarirqan, chaymi Egipto runakunaqa mana chay mayu unuta ukyapurqankuchu. ¡Egipto suyuntinpitaq yawar karqan!

²²Egipto layqakunapas kasqallantataq layqakuyninkuwan ruwarqanku, chaymi rey Faraonpa sonqonqa rumiyasqallapuni kasharqan, manataq Moisestawan Aarontawan kasurqanchu, Señor Diospa nisqanman hina.

²³Hinan rey Faraonqa chaytapas mana kasuspa wasinta kutipurqan.

²⁴Egipto suyuntinpitaq mayu patapi p'uytukunata hasp'irqanku ch'uya unuta horqonapaq, mayu unuta mana ukyapusqankurayku.

²⁵Qanchis p'unchayñan karqan Señor Diospa mayuta waqtasqanmanta.