Read DIOSPA QHELQACHISQ Quechua ÉXODO 8 Bible Online

ÉXODO 8 - DIOSPA QHELQACHISQ Quechua bible

ÉXODO 8

¹Chaymantataq Señor Diosqa Moisesta nirqan: — Rey Faraonpata rispa nimuy, Señor Diosmi nin: Llaqtayta kachariy, rispa yupaychamuwananpaq.

²Manataqchus ripunanpaq kacharinki chayqa, lliw suyuykitan k'ayrawan muchuchisaq.

³K'ayrakunan mayumanta wakwarimunqa, hinaspan wichamuspa wasiykiman haykunqa, puñunayki wasiman, puñunayki patamanpas, oficialniykikunaq wasinmanpas, llaqtayki runakunaq wasinmanpas, hornoykikunamanpas, masa chapunaykikunamanpas.

⁴Chay k'ayrakunataq qanmanpas, oficialniykikunamanpas, llaqtayki runakunamanpas seqasunkichis, nispa.

⁵Señor Diosqa Moisesta nillarqantaq, Aaronta niy: Tawnaykita haywariy mayukunaman, yarqhakunaman, qochakunamanwan, chaymanta k'ayrakuna Egipto suyuntinman wichamunanpaq, nispa.

⁶Hinaqtinmi Aaronqa Egipto suyupi unukunaman haywarirqan, chaymi k'ayrakuna lloqsimuspa Egipto hallp'aman wakwaykurqan.

⁷Layqakunapas kaqllatataq layqakuyninkuwan ruwarqanku, Egipto suyuman k'ayrakunata rikhurichimurqanku.

⁸Chaymi rey Faraonqa Moisestawan Aarontawan waqyachispa nirqan: — Señor Diosmanta mañakuychis, k'ayrakunata ñoqamanta runaykunamantawan karunchananpaq, llaqtaykitataq kacharisaq sacrificiokunata Señor Diosman haywamunanpaq, nispa.

⁹Moisestaq rey Faraonta nirqan: — Willaykuway hayk'aqchus qanpaq, oficialniykikunapaqpas runaykikunapaqpas mañapunayta. Chaypachan k'ayrakunaqa qanmantapas wasiykichismantapas karunchasqa kanqa, hinaspa mayullapiña kanqa, nispa.

¹⁰Rey Faraontaq: — Paqarinpacha, nirqan. Hinan Moisesqa kutichirqan: — Nisqayki hinan kanqa, Señor Diosniyku hina wak diosqa mana kasqanta yachanaykipaq.

¹¹K'ayrakunan karunchakapunqa qanmantapas, wasiykimantapas, oficialniykikunamantapas, runaykikunamantapas, mayullapiñataq kapunqa, nispa.

¹²Hinaspataq Moiseswan Aaronwan rey Faraonpamanta lloqsirqanku. Hinaspanmi Moisesqa Señor Diosman waqyakurqan rey Faraonman k'ayrakunata kachamusqanmanta.

¹³Hinan Señor Diosqa ruwarqan Moisespa mañakusqanman hina, chaymi k'ayrakunaqa wañurarqan wasinkupipas, kanchankupipas, chakrankupipas.

¹⁴Wañusqakunata monton-montonta huñuqtinkutaq, suyuntinpi asnarirqan.

¹⁵Rey Faraontaq ichaqa k'ayramanta samarispaña sonqonta rumiyaykachirqan, manataq paykunata kasurqanchu, Señor Diospa nisqanman hina.

¹⁶Chaymantataq Señor Diosqa Moisesta nirqan, Aaronta niy: Tawnaykita haywariy, hinaspa ñut'u hallp'ata waqtay, Egipto suyuntinpi usaman tukunanpaq, nispa.

¹⁷Paykunataq chay hinata ruwarqanku. Aaronmi tawnanta haywarispa ñut'u hallp'ata waqtarqan, hinan Egipto suyuntinpi ñut'u hallp'a usaman tukurqan, usataq runakunatapas uywakunatapas kanirqan.

¹⁸Layqakunapas layqakuyninkuwan usakunata rikhurichiyllatataq munarqanku, ichaqa manan atirqankuchu. Chaykamataq runakunatapas uywakunatapas usaqa kanisharqan.

¹⁹Chaymi layqakunaqa rey Faraonta nirqanku: — Diospa ruwasqanmi kayqa, nispa. Chaywanpas rey Faraonpa sonqonqa rumiyasqan karqan, manataq paykunata kasurqanchu, Señor Diospa nisqanman hina.

²⁰Señor Diosmi Moisesta nirqan: — Rey Faraonmi tutallamanta mayuta rinqa, chay hinaqa, tutallamanta rispa nimuy, Señor Diosmi nin: Llaqtayta kachariy yupaychamuwananpaq.

²¹Manataqchus llaqtayta kacharinki chayqa, ñoqan qanman, oficialniykikunaman, runaykikunaman, wasiykikunamanwan ati-musphay ch'uspita chayachimusaq. Hinan Egipto runakunaq wasinmanpas tiyasqanku pampamanpas ch'uspi wakwaykunqa.

²²Chay p'unchaymi ichaqa llaqtaypa tiyasqan Gosén hap'iyta t'aqasaq, chaypi ama huk ch'uspillapas kananpaq, chaywanmi ñoqa Señor Diosqa kay suyupi kashasqayta yachanki.

²³Ñoqan runaykunata runaykikunamanta t'aqasaq. Paqarinmi kay señalqa kanqa, nispa.

²⁴Señor Diosmi chay hinata ruwarqan, chaymi ati-musphay ch'uspi hunt'aykurqan rey Faraonpa wasinman, oficialninkunaq wasinman, Egipto suyuntinmanwan. Hinan chay suyutaqa ch'uspikuna purunyachisharqan.

²⁵Hinaqtinmi rey Faraonqa Moisestawan Aarontawan waqyachimuspa nirqan: — Riychis, ichaqa kay suyullapi Diosniykichisman sacrificiota haywamuychis, nispa.

²⁶Moisestaq kutichirqan: — Manan chay hinataqa ruwaykumanchu, Egipto runakunaq ch'uyapaq hap'isqanku animalkunata Diosniyku Señor Diosman haywaspachá paykunata phiñachiykuman, hinan chayta rikuspa rumiwan ch'aqewankuman.

²⁷Kinsa p'unchay puriy ch'inneqtan risaqku, hinaspa kamachiwasqankuman hina Señor Diosniykuman sacrificiokunata haywamusaqku, nispa.

²⁸Rey Faraontaq nirqan: — Ñoqan kacharisqaykichis sacrificiokunata Diosniykichis Señor Diosman ch'inneqpi haywamunaykichispaq, amalla ichaqa sinchita karunchakuychischu. Ñoqapaqpas mañampullawankichistaq, nispa.

²⁹Moisestaq nirqan: — Lloqsispa hinan Señor Diosmanta mañakusaq qanmanta oficialniykikunamanta, runaykikunamantapas ati-musphay ch'uspikuna paqarin ripunanpaq, amaña astawan q'otuwaykuchu Señor Diosman sacrificiota haywanaykupaq ñoqaykuta mana kacharispa, nispa.

³⁰Hinaspan Moisesqa rey Faraonpa qayllanmanta lloqsispa, Señor Diosmanta mañakurqan.

³¹Hinan Señor Diosqa Moisespa mañakusqanta uyarispa ati-musphay ch'uspikunata karuncharqan rey Faraonmanta, oficialninkunamanta, runankunamantapas, manan hukllapas qheparqanchu.

³²Rey Faraontaq ichaqa chay kutitawanpas sonqonta rumiyaykachirqan, manataq Israel runakunata kacharirqanchu.