Read DIOSPA QHELQACHISQ Quechua JOB 14 Bible Online

JOB 14 - DIOSPA QHELQACHISQ Quechua bible

JOB 14

¹Warmimanta paqariq runaqa pisi p'unchaynillayoqmi, askha sasachayniyoqmi,

²t'ika hina phanchiriq, chaymantataq ch'akirqapuq, llanthu hina chinkaripuq.

³¿Chay hina runatachu qhawaykuwanki? ¿Chay hina runatachu ñawpaqeykipi taripawanki?

⁴¿Pitaq atinman qhellita ch'uyaman tukuchiyta? ¡Manapunin pipas!

⁵Runaq p'unchayninkunaqa yupasqallañan, hayk'a killa kawsanantapas qanmi unancharqanki, kawsaypa qorpan churasqaykitaqa manan wasapanmanchu.

⁶Amaña qhawaykuyñachu, thak-kaypi saqepuy, llank'apakuq hina tutallapas samaykuchun.

⁷Sach'ata wit'uqtinkuqa kanraqmi ch'ikchin kutimunan, manapunin mana ch'ikchispaqa qhepapunmanchu.

⁸Mullphaña saphin kashanman chaypas, saphiña hallp'api ismupushanman chaypas,

⁹unuq ch'aqchuykusqanwanqa q'omeryarillanqapunin, qholla sach'a hinaraqmi sumaqta raphicharikunqa.

¹⁰Runan ichaqa hukpaqkamallaña wañukapunqa, wañukapuspari, ¿maypitaq kashan?

¹¹Qochapi unuqa waksirinraqmi, mayukunapas ch'akipunmi,

¹²chay hinan runaqa wañuspa mana sayarinqachu, hanaq pachaq kashanankamaqa puñusqanmanta manan rikch'arinqachu.

¹³May kusachá kanman phiñakuyniykiq thaninankama Wañuy-pachapi pakaykuwankiman chayqa, ñoqamanta yuyarikunaykipaqtaq huk p'unchayta churawaq chayqa.

¹⁴Runari, ¿wañuspa kawsarinñachu? Ñoqaqa suyakusaqmi muchusqay p'unchaykuna tukukunankama, suyallasaqpunin kacharisqa kanay p'unchaykama.

¹⁵Waqyamuwaqtiykiqa kutichimusqaykin, kamasqayki runamanta sonqoykita “ch'allaq” nirichinki.

¹⁶Chaypachan llapan sarusqayta qhawanki, qhawawaspaykiqa manañan huchachawankiñachu.

¹⁷Pantasqaykunatapas manañan yuyarinkiñachu, huchaykunatapas llapantan p'ampapunki.

¹⁸Orqokunapas pisi-pisimanta urmaspan thunikun, qaqakunapas chinkapunmi wak ladoman sinkukuspa.

¹⁹Rumitapas unuqa thantanmi, hallp'atapas paraqa qhochunmi, chay hinatan, Diosníy, runaq suyakuynintaqa chinkachinki.

²⁰Qanmi runataqa hukpaqkamallaña atipanki, hinan ripunqa, qanmi runata aya uyaman tukuchispa kachapunki.

²¹Wawankunaña allinpaq hap'isqa kaqtinpas, wañuqqa manañan yachanchu, hatun llakipi wawan kaqtinpas, wañuqqa manañan rikunchu.

²²Pay kikillanñan nanayta reparakun, pay kikillanmantañan llakikun, nispa.