Read DIOSPA QHELQACHISQ Quechua JOB 16 Bible Online

JOB 16 - DIOSPA QHELQACHISQ Quechua bible

JOB 16

¹Chaymantataq Jobqa kutichirqan:

²— Askhatañan kikintakama rimasqaykichista uyarini, sonqochawanaykichistaqa ñak'arichiwankichismi.

³¿Mana tukukuqchu kanqa chay yanqa rimayri? ¿Imataq chay hinatari rimachisunkichis?

⁴Qankuna ñoqa hina rikukuwaqchis chayqa, ñoqapas chhaynallatataqmi rimayman, asipayakuq hina umaywan chhaphchipayaykichisman, k'arak simikunawantaq qhansaykuykichisman.

⁵Ñoqaqa kallpachariykichismanmi sumaqta rimaspa, kusirichispan qhaliyarichiykichisman.

⁶Rimaqtiypas manan nanayniyqa thaninchu, ch'inlla kaypas manallataqmi qhaliyachiwanchu.

⁷Diosmi kallpayta tukurqospa sayk'uchiwan, llapan wawaykunatapas lliwta ch'usaqyachipurqan.

⁸Paymi kay hina ch'akisqa qawi uyaman tukuchiwan, chaymi runakuna yuyanku huchaymanta muchusqayta, tulluyayniymi contraypi rimarin.

⁹Diosmi qatiykachashawan, phiñakuspataq llik'irqariwan, león hinan contraypi kiruntaraq k'utupakushan, awqaypas kanman hinan qhawapayashawan.

¹⁰Runakunan contraypi huk-hinamanraq tukunku, pisichawaspankun uyaypikama ch'aqlaykuwanku, askha runan contraypi huñuykakamun.

¹¹Diosmi qaraykuwan yana alma runaq makinman, Diosmi wikch'uykuwan awqa sonqo runaq makinman.

¹²Allillanpuni kashaqtiymi, Diosqa much'uymanta hap'irqowan, q'apirqowaspan ñut'urqapuwan, ñoqamankaman wach'iykushawan.

¹³Tukuy ladoymantan wach'irqariwan, mana khuyapayaykuspan wiksayta sat'irqariwan, hayaqeytaraqmi t'oqyachiwan.

¹⁴K'iriykunatan aswantaraq k'iripaykuwan, maqanakuypi tupaq hinaraqmi phawaykuwan.

¹⁵Llakikuymantan qhasqa p'achawan ukhuyman churaykukuni, kallpa chiriyasqan hallp'api tiyapushani.

¹⁶Waqashaqtiy hinan uyaypas p'aspayan, ñawiypas t'oqoyarqapun.

¹⁷Manan pitapas ima mana chanintapas ruwarqanichu, mañakushanipas ch'uya yuyaywanmi.

¹⁸Hallp'a, yawarniyta ama pakaykuychu. ¡Waqyakusqayqa uyarisqapuni kachun!

¹⁹Hanaq pachapiqa kanpunin ñoqamanta rimariq, haqaypiqa kanpunin ñoqamanta sayarikuq.

²⁰Diospa ñawpaqenpi waqashaqtiymi amigoyqa ñoqamanta mañapuwan.

²¹Paymi Diospa ñawpaqenpi hukkunapaq valepakun imaynan huk runa amigonpaq valepakun hinata.

²²Pisi tiempollaña kawsanaypas tukurqakapushanñan, kunallanmi ripusaq mana kutimuqllaña.