Read DIOSPA QHELQACHISQ Quechua JOB 18 Bible Online

JOB 18 - DIOSPA QHELQACHISQ Quechua bible

JOB 18

¹Shúa suyumanta Bildadmi kutichirqan:

²— ¿Hayk'aqkamataq manari upallankichu? Chaninchasqata rimaqtiykiqa rimaysiykikumanmi.

³¿Imanaqtintaq uywata hinari qhawariwankiku? ¿Waq'amantaraqtaq qhawaykuwankikupas?

⁴¿Yuyankichu renegasqa pelapakuqtiyki kay pacha qanpaq ch'usaqyananta, qaqakunapas tiyasqanmanta anchhurinanta?

⁵Millay runaqqa k'anchayninpas phukusqan kanqa, q'onchanpi ninapas manan rawranqachu.

⁶Karpanpi k'anchaqpas tutayapunqan, ladonpi lamparanpas wañupunqan.

⁷Allintan sarurqan, kunantaq yanqallaña, pay kikinpa yuyaykusqanwanmi urmaykapun.

⁸Pay kikinpa chakinmi llikaman aysaykun, chay llikapitaqmi mayt'usqa rikukun.

⁹Chaki talonninmantan huk toqlla hap'irqon, chaytaqmi allintapuni kanirqon.

¹⁰Ñan purinanpin kashan sipita pakasqa, ñan purinanpin kashan huk toqlla churasqa.

¹¹Llapa ladonmantan llaksakuy muyuykun, manchakuymi sapa thaskisqanpi qatiykachan.

¹²Hatun llakin payta suyashan oqorqonanpaq, kumpakuqtinqa hukpaqkamallaña ñit'irqonanpaq.

¹³Onqoyqa pisi-pisimantan aychata mikhun, onqoyqa wañuypa willaqninmi, chakintan makintan oqon.

¹⁴Wasinpi thak-nisqa tiyasqanmantapas wikch'usqan, manchakuy wañuy reypa qayllanman aysasqan.

¹⁵Karpantapas ninan ruphaykapun, tiyasqankunapas azufrewan hach'iykusqan.

¹⁶Ch'akisqa saphiyoq mallki hinan, t'awisqa k'allmayoq sach'a hinan.

¹⁷Paymantaqa kay pachapi manan yuyarinkuñachu, manañataqmi sutinpas hoqarisqañachu,

¹⁸k'anchaymantan tutayaqman wikch'uykapunqaku, kay pachamantan qarqopunqaku.

¹⁹Mirayninpas manan llaqtanpi kanqachu, wasinpiqa manan pininpas kawsanqañachu.

²⁰Inti haykuy suyu runakunan chayta yachaspa llaksakunqa, inti lloqsimuy suyu runakunan chayta uyarispa q'aqchakunqa.

²¹Chaypin millay runaq kawsayninqa tukukun, chay hinatan Diosta mana reqsiq runaqa tukukun, nispa.