Read DIOSPA QHELQACHISQ Quechua JOB 19 Bible Online

JOB 19 - DIOSPA QHELQACHISQ Quechua bible

JOB 19

¹Chaymi Jobqa kutichirqan:

²— ¿Hayk'aqkaman ñak'arichiwankichis? ¿Hayk'aqkaman simiykichiswan k'iriwankichis?

³Kuti-kutirisparaq k'amiwankichis, mana p'enqakuspan siminchawankichis.

⁴Ñoqaña huchayoq kayman chaypas, ñoqamanmi huchayqa chayawanqa.

⁵Qankunaqa yuyankichis ñoqamanta aswan allin kasqaykichistan, ñak'arisqayta rikuspan: Huchanmantan muchun, niwankichis.

⁶Allinta yachanaykichispaqpas ñoqataqa Diosmi kumpawan, paypunin llikanwan hap'irqowan.

⁷Ñoqaqa qaparini: ¡Mana chanintan ruwashawan! nispa, manataq pipas uyariwanchu, mañakunin yanapayta, manataq pipas chaninchawanchu.

⁸Diosmi purinayta wisq'arqowan mana chimpanaypaq, ñanniytapas tutayarqachinmi.

⁹Hatunchasqa kayniytapas qechurqapuwanmi, allinpaq hap'isqa kayniytapas chinkarqachipunmi.

¹⁰Kay hina raqay-raqaypin saqerpariwan, suyakuyniytapas mallkita hinan t'irarqapun.

¹¹Contraypin k'arakta phiñakun, awqanta hinan qhawaykuwan.

¹²Llapan soldadonmi aswan-aswanta qayllaykuwan, karpa qhepaykunapin muyuykuwan, phawaykuwananpaqmi wakichikunku.

¹³Diosmi wawqeykunata karunchachiwan, amigoykunapas karupiñan ñoqamanta kashan.

¹⁴Familiaykunapas lliwmi ñoqamanta t'aqarikapun, amigoykunapas lliwmi qonqapuwanku.

¹⁵Qorpachasqaykunapas wak llaqtayoqta hinan qhawariwanku, uywasqay sipaskunapas wak runata hinan rikuwanku.

¹⁶Uywasqay runata waqyarikuqtiypas manan uyariwanchu, imaymana sumaqta valeykukuqtiypas manan uyariwanchu.

¹⁷Warmiypas simiypa asnasqantan millakun, wawaykunapaqpas millaytan asnapuni.

¹⁸Erqekunapiwanpas pisicharpariwanmi, hatarishallaqtiyraqmi k'amimushawankuña.

¹⁹Sinchi munasqay amigoykunapas cheqnikapuwanmi, munakusqay kaqkunapas contraypin sayaripunku.

²⁰Aychaypas qaray ukhupin ismupushan, tulluypas kiruy hinañan q'alarqakapushan.

²¹Amigoykuna, khuyapayaykuwaychisyari, Diosmi makinwan muchuchishawan.

²²¿Imanaqtinmi qankunapas Dios hina qatiykachawankichis? ¿Manachu saksankichis kay hinata khaskawaspaykichis?

²³¡May allinchá kanman pillapas rimasqayta qelqanman chayqa, huk qelqa k'uyupi seq'enman chayqa!

²⁴¡May kusachá kanman pillapas fierro cincelwan k'awaspa rumipipas titipipas wiñaypaq qelqasqata saqenman chayqa!

²⁵Allintan yachani Qespichiqniy kawsashasqanta, paypunin qhepa p'unchaypi sayarimunqa ñoqamanta rimariq.

²⁶Hinaña aychay urmaqashaqtin wañupusaq chaypas, ñoqaqa kikiypunin Diosta rikusaq.

²⁷Ñoqaqa ñawiywanpunin rikusaq, ñoqa kikiypunin, manan hukchu. ¡Maytapunin chayta munashani!

²⁸Qankunataqchus ninkichis: ¡Imaynatataq qatiykachasunmanri! ¡Pay kikinpin mana allin-kayqa kashan riki! nispa chayqa,

²⁹manchakuychis espadaq ñak'arichinasuykichista, Diosmi phiñakuspa qankuna hina rimaqtaqa muchuchispa wañuchin, chaypin yachankichis chanin juez kasqanta, nispa.