Read DIOSPA QHELQACHISQ Quechua JOB 2 Bible Online

JOB 2 - DIOSPA QHELQACHISQ Quechua bible

JOB 2

¹Señor Diosmanmi angelninkuna huk kutitawan qayllaykurqanku, Satanaspas paykunawan kuska qayllaykullarqantaq.

²Chaymi Señor Diosqa payta nirqan: — ¿Maymantan hamushanki? nispa. Satanastaq nirqan: — Kay pachaq k'uchun-k'uchunta purimusqaymantan, nispa.

³Hinan Señor Diosqa tapuykullarqantaq: — ¿Kamachiy Jobta qhawarirqankichu? Pay hina chanin runaqa manan kay pachantinpi kanchu. Payqa tukuy sonqonwanpunin serviwan, mana allin ruwaymantapas t'aqakunpunin. Hinaña mana ima huchanmanta muchuchinaypaq tanqariwarqanki chaypas, payqa qaqatapunin iñiyninpi sayan, nispa.

⁴Hinan Satanasqa Señor Diosman kutichirqan: — Manataq cuerponta llamiykunkichu chayllayá allin kashan. Qhali kashaspaqa, tukuy imantapas runaqa qoyta atinmi, kawsayninta qespichinanraykuqa.

⁵Pay kikinta llamiykuwaq, chayñayá yachawaq imaynataraqchus uyaykipi ñakasunkiman chayta, nispa.

⁶Señor Diostaq kutichirqan: — Chay hinaqa, ima munasqaykita payta ruwamuy, ichaqa aman wañuchinkichu, nispa.

⁷Satanastaq Señor Diospa qayllanmanta ripurqan, hinaspan Jobpa aycha qaranta sarnaman rikch'akuq millay onqoywan tukurqachirqan, uma mukukunmanta chaki puntankama.

⁸Hinan Jobqa ripurqan uspha montonpi tiyakuq, manka p'akisqa k'arpawantaq qhetukurqan.

⁹Warminpas nillarqantaq: — Kay hinataña ñak'arishaspapas, ¿qaqataraqchu iñiyniykipi sayashanki? ¡Diosta ñakay, hinaspa wañuy! nispa.

¹⁰Qosan Jobtaq kutichirqan: — ¡Yaw, warmi, mana yuyayniyoq warmi hinan rimashanki! Diospa lliw allinkuna qowasqanchista chaskishaspaqa, ¿imaynataq mana chaskillasunmantaqchu mana allinkunatapas? nispa. Chay hinaña kashaspapas Jobqa manapunin imatapas Dios contraqa rimarqanchu.

¹¹Jobpan karqan kinsa amigonkuna, Temán llaqtayoq Elifaz, Shúa suyumanta Bildad, Naama suyumanta Zofarpiwan. Paykunan Jobta imaymana llakiq qatisqanta yachaspanku wasinkumanta puririrqanku, hinaspan watuykukuq riyta yuyaykurqanku, payta tiyapayaspa nanayninkunamanta llakipayanankupaq sonqochaykunankupaqwan.

¹²Jobta karumanta qhawarimuspankutaq mana reqsiytapas atirqankuchu, chaymi qaparispa waqaykurqanku, llakikuymantataq p'achankutaraq llik'ikurqanku, hallp'atapas hanaqman hach'ispan umankuta hallp'acharqanku.

¹³Chaymantataq paywan kuskapacha pampapi tiyaykurqanku qanchis p'unchay qanchis tutatawan, mana huk simillatapas rimapayaspa, sinchi khuyay nanayniyoq kasqanta rikuspanku.