Read DIOSPA QHELQACHISQ Quechua JOB 21 Bible Online

JOB 21 - DIOSPA QHELQACHISQ Quechua bible

JOB 21

¹Chaymi Jobqa kutichirqan:

²— Rimasqayta makilla uyariykuwaychis chayllawanpas kusirichiwaychis.

³Upallakuychisyá rimanaykamaqa, chaymantaña asikuychispas munaspaqa.

⁴Quejayqa manan mayqen runawanpaschu, chayraykun sonqoy mana tiyanchu.

⁵Qhawariwaspa mancharikuychis, mancharikuymanta upayaychisraq.

⁶Imachus kawasqanta yuyarispaqa llaksakuniraqmi, ukhuyraqmi q'estiriwan.

⁷¿Imanaqtintaq millay runakunari kawsashallankupuni? ¿Imanaqtintaq yuyaq kanankukama qhapaq kayninkuwan atiyniyoq kashanku?

⁸Wawankuq kawsasqantaraqmi rikunku, nietonkuq ima sumaq wiñasqantaraqmi rikunku.

⁹Mana piqpa imanasqanmi wasinkupi kawsanku, Diospas manan imamantapas muchuchinchu.

¹⁰Toronkunapas allin muhun, wakankunapas mana sulluspan wachan.

¹¹Wawankunapas oveja hinaraqmi, erqenkunapas pukllaspa tusunkuraqmi.

¹²Paykunaqa takinkun arpawan tinyawan, paykunaqa kusikunkun qenawan.

¹³Kawsayninkupiqa allillanpunin kanku, mana imata muchuspallan wañukapunku.

¹⁴Chaytukuywanpas Diostaqa ninkun: ¡Ñoqaykumanta hatariy! Manan munaykuchu munayniykiman hina kawsaytaqa.

¹⁵¿Pitaq Tukuy-atiyniyoq Diosri kamachinta ruwanaykupaq? ¿Imatataq tarisaqku ñawpaqenpi mañakuspari? nispa.

¹⁶Millay runaq allin kayninqa manan paymantachu, paykuna hina yuyanaytaqa Diospas amapuni munachunchu.

¹⁷¿Hayk'a kutitan millay runaq k'anchaynin wañun? ¿Hayk'a kutitan hatun llaki paykunaman chayan? ¿Hayk'a kutitan Diosqa phiñakuspa paykunata ñak'arichin?

¹⁸¿Hayk'a kutitan q'opa hina phukusqa kanku? ¿Hayk'a kutitan tutuka hatun wayrawan apachikunku?

¹⁹Diosqa taytanpa huchanmantan wawankunata ñak'arichin, ninkun. Ñoqataq nini kikinpunin chaskinan huchanmantaqa Diospa muchuchiyninta, chhaynapin yachanqa huchanmanta ñak'ariy kasqanta.

²⁰Pay kikinpunin muchuchisqaqa kanan, pay kikinpunin Tukuy-atiyniyoq Diospa phiñakuynintaqa chaskinan.

²¹Wawankunapaq imaña kaqtinpas, ¿imataq paymanri qokun wañupusqan qhepatañari?

²²¿Pitaq atinman imatapas Diosman yachachiyta? Paymi juzgan hanaq pachapi atiyniyoqkunatapas.

²³Wakin runan kallpallanpi wañukapun kusisqa llakhillataq kashaspa,

²⁴allin wirayasqa qhali runa rakhu tulluyoq kashaspa ima.

²⁵Wakinkunataq ichaqa llakisqalla wañun, kawsashaspaqa manan hayk'aqpas kusikuyta tarirqanchu.

²⁶Hallp'aq sonqonpiqa kuskallapunin kapunku, iskayninkutataq kurullapuni mikhupun.

²⁷Ñoqaqa allintan yachani ñoqamanta yuyaykusqaykichista, contraypi millay yuyaykuyniyoq kashasqaykichista.

²⁸Qankunaqa tapukunkichis: ¿Maytaq chay hatun wiraqochaq wasinri? ¿Maypitaq chay millay runaq karpanri? nispa.

²⁹¿Manachu qankunaqa puriqkunaman rimakurqankichis? ¿Manachu paykunaq willakusqantapas uyarirqankichis?

³⁰Paykunan ninku: Diosninchis phiñakuspa hatun llakita kachamuqtinpas, millay runataqa manan imananpaschu, nispa.

³¹Manan pipas uyanpiqa ima kasqantapas laq'anchu, manataqmi pipas mana allin ruwasqanmantaqa muchuchinchu.

³²Wañuqtinpas p'ampanapaq apapunkupachan p'ampakusqan cheqastapas makillan qhawashanku.

³³P'ampanapaq apaqtinkun llapalla ima sumaqta puriysinku, mana yupay atiyraqmi rinku, p'ampakusqan hallp'apas paytaqa sumaqllatañan chaskiykun.

³⁴Chhaynaqa, qankunaq kusichiy munawasqaykichisqa yanqan, ¡q'otukuykaman ima niwasqaykichispas! nispa.