Read DIOSPA QHELQACHISQ Quechua JOB 24 Bible Online

JOB 24 - DIOSPA QHELQACHISQ Quechua bible

JOB 24

¹¿Imaraykun Tukuy-atiyniyoqqa taripanan p'unchaykunata mana willakunchu? ¿Imaraykun Diosta reqsiqkunaqa taripanan p'unchaykunata mana yachankuchu?

²Millay runakunaqa chakraq qorpantan suchurichinku, ovejakunatapas suwakuspan michinku.

³Mana tayta-mamayoqpa asnontapas qechunkun, viudaq torontapas paganankaman hap'inku.

⁴Wakchakunatan mana uyariq tukunku, mana imayoq runakunan paykunamanta pakakun.

⁵Mana imayoqkunan k'ita asnokuna hina lloqsinku ch'in pampapi sinchi sasawan mikhunanku maskhaq, chay ch'inneqmantan wawankupaq mikhunata tarimunku.

⁶Wak chakrakunamantan trigo choqllokunata pallakamunku, mana chanin runakunaq uvas chakrankunamantan qhellakamunku.

⁷Tutan paqarinku q'alalla mana qatanayoq kaspa, manan imallankupas kanchu chirimanta hark'aykuqninku.

⁸Orqopi parawanmi lliwta hallch'uchikunku, qaqallatan oqllaykunku pakakunata maskhaspanku.

⁹Viudamantan wawanta ñuñukushaqtin qechunku, wakchakunaq qholla wawantan manumanta paganankama qechunku.

¹⁰Wakchakunaqa q'alallañan purinku, trigo q'epiykusqan yarqaymanta wañushanku.

¹¹Olivos sach'akuna chawpipin aceiteta ch'irwanku, uvastan sarunku vinota ruwakunankupaq, chaywanpas ch'akiymantan wañushanku.

¹²Llaqtaq karunmanraqmi uyarikun wañunayaqkunaq anchisqan, k'irisqakunan waqyakunku yanapaykunapaq. Diostaq ichaqa chay mana allinkunata qhawarparillan.

¹³Wakinkunan k'anchayta cheqnikunku, tukuy puriyninkupitaq k'anchaymanta t'aqakunku.

¹⁴Runa wañuchiqqa rankhi-rankhillataraqmi puñunanmanta sayarin, hinaspan wakchata mana imayoqtawan wañuchin, tutatañataq suwakuq puririn.

¹⁵Wasanchay huchapi puriq runaqa tutayaykunantan suyakun, uyantapas allintan pakaykukun, mana pipas rikunanta yuyaspa.

¹⁶Suwakunaqa tutan wasikunaman winaykukun, ch'isiyaq p'unchaytaq ichaqa wasinkupi wisq'arayanku, p'unchaytaqa manan rikuytapas munankuchu.

¹⁷Paykunapaq p'unchayqa laqhayaq tuta hinan, aswantaqa munanku tutaq manchay ch'ampiqyaynintan.

¹⁸Millay runaqa mayu phosoqo hinan, hallp'anpas ñakasqan kapun, manataq pipas llank'anñachu uvas chakrantaqa.

¹⁹Chiraw tiempo ruphaymi rit'itaqa chulluchin, chay hinallatataqmi huchasapataqa Wañuy-pacha chinkachin.

²⁰Kikin mamanpas paymantaqa qonqapunmi, kurukunan misk'itaraq paytaqa mikhuykapun, manan pipas millay runamantaqa yuyarikunñachu, mallki wit'usqa hinan payqa kumpakapun.

²¹Mana wachakuq warmitan mana allinta ruwarqan, viuda warmitan mana khuyapayarqanchu.

²²Ichaqa Diosmi chay atiyniyoqkunata kallpanwan chinkachin, pay muchuchiyta munan chayqa, millay runaqa manan kawsanñachu.

²³Hinallata Dios qhawaqtinmi suwaqa waqaychasqa kasqanta yuyaykun, ichaqa Diosmi lliw purisqanta qhawashan.

²⁴Millay runaqa huk ratollan hatunchasqa, chaymantataq chinkarqapun, yuyu t'irasqa hinan ch'akirqapun, qholla trigo choqllo wit'urparisqa hinan kapun.

²⁵Mana chayri, ¿pitaq kunan rimasqayta: Llullan, ninman? ¿Pitaq rimasqayta yanqa rimayman tukuchinman? nispa.