Read DIOSPA QHELQACHISQ Quechua JOB 29 Bible Online

JOB 29 - DIOSPA QHELQACHISQ Quechua bible

JOB 29

¹Jobqa rimallarqantaqmi:

²— ¡May kusachá kanman qayna killakunaman kutikapuyman chayqa, Diosninchispa yanapawasqan p'unchaykunaman kutikapuyman chayqa!

³K'anchayninwanmi sut'iriwarqan, laqha tutayaqpi puriyta atinaypaq.

⁴Allin poqosqa kashaqtiymi, Diosninchisqa wasiyta qhawarispa saminchawarqan.

⁵Tukuy-atiyniyoq qayllaypi kashaqtinqa, wawaykunapas sumaqtan muyuriqniypi tiyaykurqanku.

⁶Uywaykunan askhallataña lecheta qowarqan, qaqa-qaqakunapiraqmi olivo sach'aykunapas wiñarqan.

⁷Llaqta haykunapi huñukuna cheqasman riqtiymi, huñukuna plazapi tiyaykuqtiymi,

⁸rikurqamuwaspanku waynakunapas huk ladoman suchurirqanku, kurak taytakunapas sayariykurqanku,

⁹qollana runakunapas rimashaspa upallaykurqanku, siminkutapas makinkuwan wisq'akurqanku,

¹⁰kamachikuqkunapas rimashaspan samp'ayaykurqanku, llapallankun ch'inyaykurqanku.

¹¹Uyariqniykunan ñoqamanta allinta rimarqanku, rikuwaqniykunan: Kusapunin, niwarqanku.

¹²Ñoqaqa sapa kutillan “yanapaykuway” niq wakchakunata horqorqani, mana tayta-mamayoq wikch'usqakunatan yanaparqani.

¹³Hatun pisipaypiña kashaqkunan saminchawarqanku, viudakunaq sonqontan kusichirqani.

¹⁴Runaqa p'achawan churakunpunin, chay hinan ñoqapas allin kaqtaqa ruwaqpuni kani, runaqa sombrerowanpas ponchowanpas churakunpunin, chay hinan ñoqapas chaninkaqtaqa ruwaqpuni kani.

¹⁵Ñoqaqa ñawsakunaq ñawinmi karqani, such'ukunaqpas chakinmi karqani,

¹⁶pisichikuqkunaqpas taytanmi karqani, wak llaqtayoqkunaqpas amachaykuqninmi karqani.

¹⁷Ñoqaqa awqa sonqo runaq atiynintapas thuniqmi karqani, makinpi kashaq runakunatapas qechuqmi karqani.

¹⁸Ñoqaqa nirqanin: P'unchayniykunaqa qocha aqo hinachá kanqa, wañukusaqpas yuyaqllañachá kikin wasiypipuni.

¹⁹Mayu patapi mallkisqa sach'a hinan kani, raphiykunatapas tuta sullan ch'aranchan.

²⁰Sumaq-kayniyqa mosoqpunin kanqa, kallpaypas aswan allinraqmi kapuwanqa, nispa.

²¹Lliwpas makillañan uyariwaqku, kunasqaykunatapas ch'inllan uyariqku.

²²Ñoqaq rimasqaytaqa manan pipas rimapaqñachu, rimarisqaymi paykunapaq iphu para hina karqan.

²³Paykunataq yanqallaña suyarayakuqku, paraqtin kusikuq chakra llank'aq hinan simiytaqa chaskiqku.

²⁴Asirikuqtiypas paykunaqa ñak'ayllatan creewaqku, kusisqa uyaytan makillaña qhawawaqku.

²⁵Ñoqan paykunaq kamachiqninkuqa karqani, paykunaq ima ruwanankupaqpas ñoqan yuyaykuq karqani, soldadonkunaq chawpinpi rey hinaraqmi karqani, llakisqaña kaqtinkupas kusichiqmi karqani.