Read DIOSPA QHELQACHISQ Quechua JOB 30 Bible Online

JOB 30 - DIOSPA QHELQACHISQ Quechua bible

JOB 30

¹Kunantaq ichaqa ñoqamanta asikunku, ñoqamantapas aswan waynakunaraq, taytankutapas manapunin munarqanichu uywa michiq alqokunawan kanallantapas.

²¿Imapaqtaq paykunaq kallpanri serviwanman karqan? Paykunaqa sayk'usqa runakunañan karqanku.

³Yarqaymanta pisipaymantawan machuyasqa, tutapas ch'inneqpa ch'usaqninpin ch'aki saphikunallataña q'awtirqanku.

⁴Ch'aphra-ch'aphrakunamantan p'osqo qorakunata pallakurqanku, retamaq saphintawanpas mikhurqanku.

⁵Runamasinpa qarqosqankunan karqanku, suwata hina qaparkachakuspa qatiykachasqakunan karqanku.

⁶Ch'aki mayuq k'aktunkunapin tiyarqanku, qaqa-qaqapin pampa t'oqokunapin tiyarqanku.

⁷Ch'aphra-ch'aphrakunapin qaparkachaspa purirqanku, chaykunaq pachanmanmi suchuykurqanku.

⁸Mana valeq runakuna, mana taytayoq q'aqa runakuna, suyunkumantapas qarqosqa mana serviq runakuna.

⁹Kunantaq ichaqa chaykunaq wawankuna asipayawanku, ñoqamanta rimaspan imaymana rimayman wasapachinku.

¹⁰Millakuwaspankun ñoqamanta karunchakunku, uyaypiraqmi thoqaykuwanku.

¹¹Diospa kay hina k'umuchisqanña kashaqtiymi ima munasqankuta ruwawanku.

¹²Qayllaymanmi askhallaña huñurqakamunku, hinaspan qhepaman kutichiwanku, kumpaytapuni munawaspan phawaykuwanku.

¹³Ñanniytan wisq'arqowanku, askha llakikunawanmi ñit'iykuwanku, manataqmi pillapas yanapaykuwanchu.

¹⁴Perqaq hatun q'asantan hunt'aykamuwanku, mancharikuytaraqmi phawaykamuwanku.

¹⁵Llaksakuymi ñoqataqa chiriyarqachipuwan, respetasqa-kayniypas wayra hinan pasakapun, kaqniyoq kayniypas phuyu hinan ch'usaqyarqapun.

¹⁶Manañan kawsayta atiniñachu, llakikuymi ñoqataqa ñit'iykapushawanña.

¹⁷Nanaymi tulluykunamanña haykurqapun, tutakunapas sinchitapunin ch'akakakawan.

¹⁸Diosmi much'uymanta kallpawan hap'irqowan, mat'i kunkayoq p'acha hinan mat'irqowan.

¹⁹T'uru-t'urumanmi chanqaykuwan, ñut'u hallp'a hinan, uspha hinan kapuni.

²⁰Diosníy, waqyakamuqtiypas manan uyariwankichu, qayllaykamuykiña chaypas yanqallan qhawarimuwanki.

²¹Ñoqapaqqa awqa sonqo runa hinan tukupunki, llapan kallpaykiwanmi qatiykachawanki.

²²Hap'iykuspan wayrawan apachiyta yuyaykuwanki, manchay tutuka hatun wayrawanmi chhaphchichiwanki.

²³Allintan yachakuni wañuyman qatiwashasqaykita llapan runapaq waqaychasqa cheqasman.

²⁴Sasachaypi rikukuspa ñak'ariq runa yanapayta waqyakuqtinqa, manan pipas aswan hatun llakiwan yapaykunchu.

²⁵Ñoqari, ¿manachu muchuqmantapas waqarqani? Ñoqari, ¿manachu pisichikuqtapas khuyapayarqani?

²⁶Ñoqaqa kusikuytan suyakurqani, mana allin-kaytaq chayamuwan. K'anchaytan suyakurqani, laqhayaqtaq aypamuwan.

²⁷Sonqoypas mana thaniykuspan phataqeshawan, llaki phutiy p'unchayllañan suyashawan.

²⁸Khuyaytan yanayaykapushani intiq k'anchaynintapas mana rikuspa, llapa runaq qayllanpin yanapaytapas mañakuni.

²⁹Chacal animalkuna hinaraqmi aullakushani, suri animalkuna hinaraqmi qaparishani.

³⁰Aycha qaraypas yanayaykapuspan t'akarikapushan, tulluykunapas fiebrewanmi ruphapakushan.

³¹Qenaypas waqay-waqaytañan tocapushan, arpaypas llakiy-llakiytañan waqapushan.