Read DIOSPA QHELQACHISQ Quechua JOB 35 Bible Online

JOB 35 - DIOSPA QHELQACHISQ Quechua bible

JOB 35

¹Eliuqa nillarqantaqmi:

²— Job, ¿qanpaqri chaninchu: Diospa ñawpaqenpi chaninmi kani, nisqayki?

³Qanqa Diostan rimapakushanki: Huchallikuniña chaypas, ¿iman qanman qokusunki? Mana huchallikuqtiypas, ¿iman ñoqapaq kashan? nispa.

⁴Kunantaq ñoqa kutichisqayki qanmanwan amigoykikunamanwan.

⁵Qhawariy hanaq pachata, may hina wichaypiraqmi qanmantaqa phuyukunapas kashan.

⁶Huchallikunkiña chaypas manan Diostaqa imananpaschu, imaynataña huchallikunki chaypas Diostaqa manan imananpaschu.

⁷Allintaña ruwanki chaypas manan imatapas qonkichu, ¿ima allintataq Diosri qanmanta chaskin?

⁸Runallamanmi huchaykiqa chayan, allinta ruwaspaykipas runallatan allinta ruwanki.

⁹Sinchi sarunchasqa rikukuspan runaqa qaparin, munayniyoqmanta pillapas qechunanpaqmi yanapayta maskhan.

¹⁰Ichaqa manan pipas ninchu: ¿Maypitaq Kamaqniyqa kashan? Paymi tutaq sonqonpi takichiqninchisqa,

¹¹paymi uywakunamantapas aswan yachaysapata ruwawanchis, paymi phalaq animalkunamantapas aswan yuyaysapata ruwawanchis, nispa.

¹²Qaparinkun, Diostaq ichaqa mana uyarinchu uma hoqariq millay runakuna kasqanrayku.

¹³Cheqaqtapunin Diosqa yanqa rimasqata mana chaskinchu, Tukuy-atiyniyoqqa manan uyariqpas tukunchu.

¹⁴Hinaña ninki: Manan Diosta rikunichu nispa chaypas, suyaykullay, qanpa sasachayniykiqa ñawpaqenpiraqmi kashan.

¹⁵Qantaq ninki: Diosqa mana phiñakuqmi, mana muchuchikuqmi, manallataq huchamantapas imapas qokunchu, nispa.

¹⁶Imatachá qanqa rimashankipas, sinchitañan thawtishanki mana yuyayniyoq hina.