Read DIOSPA QHELQACHISQ Quechua JOB 41 Bible Online

JOB 41 - DIOSPA QHELQACHISQ Quechua bible

JOB 41

¹Leviatán manchakuy hatun animaltari, ¿challwa hap'inawan aysarqowaqchu? ¿Qalluntapas watullawan aysarqowaqchu?

²¿Senqanta watuwan khipurqoyta atiwaqchu? ¿Qhaqllinmanta anzuelowan aysarqoyta atiwaqchu?

³¿Payri khuyapayaykunaykipaq valekusunkimanchu? ¿Sumaq simiwanchu rimapayasunkiman?

⁴¿Payri qanwan rimanakunmanchu wiñaypaq kamachiyki kananpaq?

⁵¿Pichinchukunawan hinachu qanri pukllakuwaq? ¿Ususiykikunaq pukllananta hinachu watawaq?

⁶¿Challwa qhatuqkunari Leviatanta vendenakuspa ch'aqwankumanchu? ¿Qhatunankupaqri kuchurqarinkumanchu?

⁷¿Qarantari wach'ispa t'oqorqoyta atiwaqchu? ¿T'urpunawan umanta t'oqorqowaqchu?

⁸Makiykiwan aychanta llamiykuy, imaynataraq tupapakunqa, manataq chaytaqa qonqankichu, chaymi mana llamipayankiñachu.

⁹Leviatantaqa rikurqospallaraqmi pasaqta llaksakunku, manan atikunchu imaynamanta hap'iypas.

¹⁰Pillapas llamipayaqtinqa kutirimunpachan, manataqmi pipas churanakuyta atinmanchu.

¹¹Chhaynallataq, ¿pin ñoqawan churanakuspa mana imanasqalla ayqenman? Llapan teqsimuyuntinmi ñoqaqkama.

¹²Willallasqaykitaq chakinkunamanta, chay musphana kallpanmanta sumaq rikch'ayninmantawan.

¹³¿Pitaq atinman chaypa qaran ch'utiyta? ¿Pitaq chay hark'aqnin phatu q'aqlachunta t'oqonman?

¹⁴¿Pitaq siminta qhaqllariyta atinman chay hina manchakuy kirukunayoqtari?

¹⁵Wasa sarphanpas hatuchaq escudowan qatasqa hinan, chaykunataq allin k'askasqa ch'illa rumi hinaraq.

¹⁶Allin-allin mat'illañan kashan, mana wayraqpas haykuy atinan.

¹⁷Allin-allin k'askachisqallañan kashan, mana piqpa paskay atinan.

¹⁸Chhullisqanpas illapa hinaraqmi lliphllikin, ñawinkunapas pacha paqar inti hinaraqmi k'anchan.

¹⁹Siminmantapas ninaraqmi rawrarin, nina phinchikillaraqmi t'akarikun.

²⁰Senqanmantapas q'osñiraqmi lloqsimun, t'impushaq manka waksi hinaraqmi lloqsimun.

²¹Samayninpas sansa hinaraqmi rupharin, siminmantapas ninaraqmi wach'imun.

²²Paypa kallpanqa much'unpin, paypa qayllanpiqa lliwmi khatatatanku.

²³Ukhu aychanpas allin talullañan mana imanay atina.

²⁴Sonqonpas qaqa hina ch'ilan, maran rumi hina mana atiymi.

²⁵Leviatán sayariqtinqa llapa dioskunan llaksakunku, q'aqchasqaraqmi ayqerikapunku.

²⁶Piña espadantin taripaspapas, manan imanaytapas atinchu, jabalinapas, lanzapas, rawrashaq wach'inapas manan haykuyta atinchu.

²⁷Leviatanpaqqa fierropas ichhu hinan, broncepas ismusqa k'ullu hinan.

²⁸Wach'isqapas manan ayqechinchu, rumiwan warak'asqapas ichhuwan chanqasqa hinan.

²⁹Marunawan q'asusqapas soqos hinan paypaqqa, asikunmi lanzawanña chanqasqapas.

³⁰Qhotunpas p'akisqa k'arpawan k'askachisqa hinan, suchuriqtinpas fierro kiruyoq saruchina hinan t'uruta wayq'on.

³¹Lamar-qochatapas mankapi unuta hinaraqmi t'impuchin, chhaqrusqa hawina t'impuchisqa mankaq phosoqonta hinaraq.

³²Unupi purisqanpas phosoqo ñanmi ruwakun, yuraq k'anchashaq soqo chukcha hinaraq.

³³Kay pachapiqa manan imapas kanchu chay hinaqa, chay animalqa mana imatapas manchakuqmi.

³⁴Llapan qhariykachaq animalkunatapas Leviatanqa pisichanmi, Leviatanqa llapan salqa animalkunaqpas reyninmi, nispa.