Read DIOSPA QHELQACHISQ Quechua JOB 9 Bible Online

JOB 9 - DIOSPA QHELQACHISQ Quechua bible

JOB 9

¹Chaymi Jobqa nirqan:

²— Ñoqaqa allintan yachani chayqa hinapuni kasqanta. Runaqa manan atinmanchu Diospa qayllanpi chaninchakuyta.

³Pipas Dioswan churanakuyta munanman chayqa, waranqanpi Diospa nisqanmanta manan hukllatapas kutichiyta atinmanchu.

⁴Diosqa hatun atiyniyoqmi, hatun yachayniyoqmi, ¿pitaq paywan churanakuspa altoman lloqsinman?

⁵Diosqa phiñakuspallaraqmi orqokunatapas kuyurichin, thuniykapuntaq mana piman willaspa.

⁶Paymi kay pachata chhaphchin, teqsintaraq kuyuykachachin.

⁷Paymi intita mana lloqsimunanpaq kamachin, ch'askakunatapas mana k'anchananpaq kamachin.

⁸Mana piqpa yanapasqanmi hanaq pachatapas mast'arirqan, lamar-qochapi manchakuy hatun animaltapas sarurqan.

⁹Paymi kamarqan Puka Ch'askatapas Hatun Cruztapas, paymi ruwarqan Qotutapas Ch'isin Ch'askatapas.

¹⁰Runaqa manan entiendeyta atinmanchu Diospa musphana ruwasqankunataqa, runaqa manan yupayta atinmanchu Diospa milagro ruwasqankunataqa.

¹¹Qayllaytaña Dios purishanman chaypas, manan rikuyta atiymanchu, purikushanmanña chaypas, manapunin reparaymanchu.

¹²Imatapas hap'ikapuqtinqa, ¿pitaq qechupakunman? Paytari, ¿pitaq imatan ruwashanki ninman?

¹³Diosqa phiñakuspa manan llamp'uyanchu, lamar-qochapi hatun manchana Rahab nisqa animalpa yanapaqninkunapas Diospa ñawpaqenpiqa ima khuyaytan khatatatanku.

¹⁴Chay hinaqa, ¿imaynatataq paywan churanakuyman? Diosta kutipakunaypaqri, ¿ima nispataq niyman?

¹⁵Mana ima huchayoqña kayman chaypas, manan kutichiymanchu, payqa Juezmi, chaymi khuyapayanallawantaña mañakusaq.

¹⁶Chaninchanaman waqyachiqtiy, pay hamunman chaypas, ñoqaq rimasqaytaqa manan uyariwanmanchu.

¹⁷Tutuka hatun wayrawan hinan waqtachiwan, k'iriykunatan yanqapacha aswantaraq yapaykuwan.

¹⁸Manan ratollapas samaykachiwanchu, sasachaykunawanmi ñit'iykachiwan.

¹⁹Maqanakuymanña chaypas payqa aswan atiyniyoqmi. Chaninchanaman waqyachiyman chaypas, ¿pitaq chayachimunman?

²⁰Mana ima huchayoqña kayman chaypas, simiymi huchachawanman, chaninña kayman chaypas, rimasqaymi tanqaykuwanman.

²¹Mana huchayoqña kakushani chaypas, imanasaqyá kanpas, amikuniñan kawsasqaywanpas,

²²kaqkamataq kashanpas, chaymi khaynata yuyaykuni: Señor Diosmi kuskata muchuchin huchayoqtapas mana huchayoqtapas, nispa.

²³Hatun llakiman chayaspa mana huchayoq qonqaylla wañuqtinqa, Diosqa asikunchari muchusqanmantaqa.

²⁴Millay runakuna kay suyuta munaychakuqtinmi, chaninchaqkunaq ñawinta Diosqa wisq'arqosqa, manataq Dioschu wisq'an chayri, ¿pitaq ruwan?

²⁵Kawsayniyqa chaski hinan phawashan, mana huk chhikallantapas kusikuyta tarispa,

²⁶qochapi phawaq balsa hinan phawashan, mikhunaman phalaykuq anka hinan phawashan.

²⁷Quejaykunata qonqaspa kusikusaq nishani chaypas, kusisqaman tukuspa asikusaq chaypas,

²⁸sinchi nanaypi rikukuspan llaksakuni, allintan yachakuni Diosqa huchasapamanta qhawaykuwasqanta.

²⁹Diostaq huchasapamanta qhawariwan chayqa, manan imapaqpas valenchu kallpachakusqayqa.

³⁰Jabonwanña makiyta maqchikuyman chaypas, lejiawanña allinta qhaqokuyman chaypas,

³¹Diosqa t'uru-t'urumanmi winaykuwanqa, p'achaypas qhellita rikuwaspa millakuwanankama.

³²Manan Dioswanqa hap'inakuymanchu runawan hinaqa, manataqmi niymanchu runata hinaqa: Chaninchana wasiman haku, nispaqa.

³³May kusachá Diostawan ñoqatawan chaninchaq kanman chayqa, iskayniykutan allipunachiwankuman,

³⁴Diospa muchuchiwananmantan hark'aykuwanman, kay hinata llaksawasqanmantan amachaykuwanman.

³⁵Chay hinaqa, mana manchakuspachá rimariyman, ñoqaqa yachakunin pichus kasqaytaqa.