Read DIOSPA QHELQACHISQ Quechua SALMOS 102 Bible Online

SALMOS 102 - DIOSPA QHELQACHISQ Quechua bible

SALMOS 102

¹Señor Diosníy, mañakamusqayta uyariykuway, waqyakamusqayta uyariykuway.

²Llaki ñit'ishawaqtinqa ama qheparpariwaychu, maki uyariykamuway, waqyakamuqtiyqa usqhaylla kutichimuway.

³Kawsayniymi q'osñi hina chinkapushan, tulluykunan nina sansa hina ruphaykushan.

⁴Sonqoymi naq'esqa qora hina ch'akiykapushan, manañan mikhunayawanpasñachu.

⁵Hik'ipakuspa anchisqaywanmi tullullaña ch'akiykapushani.

⁶Ch'inneqpi tiyaq suweq'ara hinan kani, thunisqa wasipi tiyakuq huku hinan kani.

⁷Manan puñunichu, wasi patapi sapallan pichinchu hinan kani.

⁸Sapa p'unchaymi awqaykunaqa k'amiwanku, phiñapayawaqniykunaqa sutiypin hukkunata ñakanku.

⁹Ñoqaqa usphatan t'antata hina mikhuni, ukyanaytapas weqeywanmi chhaqruni,

¹⁰k'arakllataña phiñakusqaykirayku. Qanmi hoqariwarqanki, hinaspa wikch'uwarqanki.

¹¹Kawsayniyqa llanthu hinan chinkaripushan, qora hinan ch'akiykapushan.

¹²Señor Diosníy, qanmi ichaqa wiñaypaq kamachikushanki, sutiykitaqa tukuy mirayllapunin mentanqa.

¹³Qanmi Sión llaqtata khuyapayanaykipaq sayarinki, ñan tiempoqa hunt'akamunña, ñan payta khuyapayanayki tiempoña.

¹⁴Kamachiykikunaqa rumi soqyankunatapas munakunkun, perqanpa thunikusqanmantapas llakikunkun.

¹⁵Llapa suyukunan Señor Diosta manchakunqaku, kay pachantin reykunapas qhapaq-atiynintan manchakunqaku.

¹⁶Sión llaqtata wakmanta sayarichispanmi, qhapaq-atiyninpi rikhurimuspanmi,

¹⁷wikch'usqa runaq mañakusqanta uyarinqa, paykunaq mañakusqantaqa manan pisichanqachu.

¹⁸Kaymi qhepa miraykunapaq qelqasqa kanqa, paykuna Señor Diosta yupaychanankupaq.

¹⁹Señor Diosmi ch'uya hanaqmantapacha qhawamurqan, hanaq pachamantapachan kay pachata qhawamurqan,

²⁰presokunaq anchisqanta uyarinanpaq, wañuchinapaq nisqakunata kacharinanpaq.

²¹Sión llaqtapi Señor Diosmanta willanankupaq, Jerusalén llaqtapi payta yupaychanankupaq.

²²Llapallan llaqtakunapas suyukunapas hukllaman huñuykukuspankun, Señor Diosta yupaychanqaku.

²³Paymi waynallaraq kashaqtiy pisi kallpayachiwarqan, kawsayniytapas pisiyachiwarqan.

²⁴Ñoqan nini: Diosníy, ama munaychu mana wañunaypi wañunayta, qanqa wiñay-wiñaypaqmi kawsanki, nispa.

²⁵Qallariypin kay pachata teqsicharqanki, hanaq pachatapas qanmi ruwarqanki.

²⁶Chaykunan tukukapunqa, qanmi ichaqa kashallankipuni. Llapallanmi p'acha hina mawk'ayapunqa, p'achata hinan qanqa chaykunata cambianki, hinan wikch'usqa kapunqaku.

²⁷Qanmi ichaqa kaqllapuni kanki, manan wataykikunapas tukukunqachu.

²⁸Kamachiykikunaq wawankunaqa mana manchakuspallan tiyakunqa, qayllallaykipipunin wawankuqa kashanqa.