Read DIOSPA QHELQACHISQ Quechua SALMOS 105 Bible Online

SALMOS 105 - DIOSPA QHELQACHISQ Quechua bible

SALMOS 105

¹¡Señor Diosman graciasta qoychis! ¡Paymanta mañakuychis! Ruwasqankunata llaqtakunaman willaychis.

²Señor Diosman takiychis, payman yupaychaykunata takiychis, tukuy musphana ruwasqankunata willaychis.

³Ch'uya sutinpi kusikuychis, Señor Diosta yupaychaqkuna kusikuychis.

⁴Señor Diosman qayllaykuychis, atiyninman hap'ipakuychis, Señor Diostaqa maskhallaychispuni.

⁵Señor Diospa musphana ruwasqankunata yuyariychis, Señor Diospa milagronkunata chaninchayninkunata yuyariychis,

⁶qankuna, Diospa kamachin Abrahampa mirayninkuna yuyariychis, qankuna, Diospa akllakusqan Jacobpa churinkuna yuyariychis.

⁷Paymi Diosninchis Señor Diosqa, paymi kay pachantinta kamachiqqa,

⁸payqa rimanakusqanta yuyarillanpunin, waranqa mirayña pasaqtinpas kamachikusqantaqa yuyarillanpunin.

⁹Abrahamwan rimanakusqantaqa yuyarillanpunin, Isaacman jurasqantaqa yuyarillanpunin.

¹⁰Chaytan Jacobpaq unancharqan, Israelpaq wiñay rimanakuyta churaspa nirqan:

¹¹Qanmanmi Canaán hallp'ata qosqayki, chaymi kanqa herenciaykichis, nispa.

¹²Paykunaqa pisi runakunallan karqanku, wak llaqtayoq hinan chay hallp'api pisilla karqanku,

¹³huk llaqtamanta huk llaqtamanmi purirqanku, huk suyumanta huk suyumanmi rirqanku.

¹⁴Señor Diosqa manan piqpa sarunchanantapas munarqanchu, paykunaraykun reykunatapas anyarqan:

¹⁵Akllakusqaykunataqa aman llamiykunkichischu, profetaykunataqa aman imanankichispaschu, nispa.

¹⁶Chay suyumanmi yarqayta chayachimurqan, llapa mikhuytan qechupurqan.

¹⁷Ñawpaqenkutan huk qharita kacharqanku, kamachipaq vendesqanku Josetan kacharqanku.

¹⁸Chakinkunatan thunkunawan t'eqerqanku, kunkanmantan cadenawan watarqanku.

¹⁹Señor Diospa siminmi Joseta probaykurqan, Josepa willakusqan hunt'akunankama.

²⁰Rey Faraomi payta kacharinapaq kamachikurqan, llaqtakuna kamachiqmi payta kacharichipurqan.

²¹Wasinpi kamachikunanpaqmi Joseta churarqan, llapa kaqninkunapi kamachikunanpaq,

²²kamachikuq runakunata munasqanman hina yachachinanpaq, kurak runakunatapas hamawt'aman horqonanpaqwan.

²³Chaymantataq Israelqa Egiptoman rirqan, Jacobmi Campa miraynin suyupi tiyapakurqan.

²⁴Señor Diosqa anchatapunin llaqtanta askhayachirqan, Egipto runakunamantapas aswan kallpasapatan ruwarqan.

²⁵Egipto runakunaq sonqontan t'ikrarqan llaqtanta cheqnikunankupaq, kamachinkunata q'otunankupaq.

²⁶Diosqa kamachin Moisestan kacharqan, akllakusqan Aarontawanmi kacharqan.

²⁷Paykunan ch'inneqpi Diospa señalninkunata ruwarqanku, Campa miraynin suyupi utirayana musphanakunata ruwarqanku.

²⁸Egipto runakunaqa manan Diospa siminkunata chaskirqankuchu, chaymi Diosqa suyuntinman tutayaykachimurqan.

²⁹Ununkutan yawarman tukuchirqan, challwankutan wañuchirqan.

³⁰Suyunkupin k'ayrakuna wakwarirqan, reyninkuq puñunan wasikunamanmi hunt'aykurqan.

³¹Dios rimariqtinmi askhallaña ch'uspi hunt'aykurqan, usapas Egipto suyuntinmanmi hunt'aykurqan.

³²Parachimunantaqa chikchichimurqanmi, suyuntinpin lliphllikiyninta rawrarichirqan.

³³Uvas chakrankutapas higos sach'ankutapas saqtarqanmi, suyuntinpi sach'akunatapas p'akirqarirqanmi.

³⁴Dios rimariqtinmi langostakuna chayarqan, mana yupay atina askhallañan langostakuna karqan.

³⁵Suyuntin qoratan q'ararqan, chakraq llapallan rurusqantan mikhurqan.

³⁶Kikin Egiptopin llapa phiwi churinkuta wañuchirqan, llapa kurak churinkutan sipirqan.

³⁷Diosqa llaqtantan horqomurqan, qorintinta qolqentinta pusamurqan, ayllunku ukhupiqa manan pipas laq'akurqanchu.

³⁸Egipto runakunan puririqta rikuspanku kusikurqanku, sinchi manchasqapunin kasharqanku.

³⁹Diosmi phuyuchimurqan paykunata llanthuykunanpaq, ninatataq churarqan tuta paykunata k'anchaykunanpaq.

⁴⁰Mikhunata mañakuqtinkun yuthukunata chayachimurqan, hanaq pacha t'antawanmi paykunata saksachirqan.

⁴¹Qaqata ch'eqtaqtinmi unu phullpumurqan, ch'aki pampantan mayu hina phawarqan.

⁴²Kamachin Abrahamman ch'uya simi rimarisqantan yuyarirqan.

⁴³Llaqtantan kusisqata horqomurqan, akllakusqankunatan may kusisqa takishaqta pusamurqan.

⁴⁴Wak suyukunaq hallp'antan paykunaman qorqan, chay wak llaqtakunaq llank'akusqankutan hap'ikurqanku.

⁴⁵Diosqa munarqan kamachikusqankunata hunt'anankutan, yachachisqankunatapas kasunankutan. ¡Yupaychasqa Señor Diosqa kachun!