Read DIOSPA QHELQACHISQ Quechua SALMOS 106 Bible Online

SALMOS 106 - DIOSPA QHELQACHISQ Quechua bible

SALMOS 106

¹¡Yupaychasqa Señor Diosqa kachun! Señor Diosta yupaychaychis, payqa allinmi munakuyninqa wiñaypaqmi.

²¿Pitaq Señor Diospa musphana ruwasqankunata rimarinman? ¿Pitaq payta yupaychana kasqanta willakunman?

³Kusisamiyoqmi chanin-kayman hina kawsaqkunaqa, kusisamiyoqmi chaninkaqllatapuni ruwashaqkunaqa.

⁴Señor Diosníy, llaqtaykita munakusqaykirayku yuyarikuway, llaqtaykita qespichiq hamuspa yanapaykuway,

⁵akllakusqaykikunaq kusisaminta rikunaypaq, llaqtaykiq kusikusqanwan kusikunaypaq, suyuykiwan q'ochukunaypaq.

⁶Ñawpa taytayku hinan huchallikurqayku, mana chaninkaqtan ruwarqayku, mana allinkaqtan ruwarqayku.

⁷Egiptopi kashaspa ñawpa taytaykuqa manan musphana ruwasqaykikunata chaninpaqchu qhawarirqanku, ancha hatun munakuyniykitan qonqapurqanku, Puka Qocha patapin awqayki sayarirqanku.

⁸Ichaqa ancha atiyninta rikuchinanpaqmi sutinta yupaychanapaqmi Diosqa paykunata qespichirqan.

⁹Puka Qochatan phiñarirqan, chaytaq ch'akirqapurqan, hinaspan ch'aki pampanta hina qocha ukhunta paykunata chimpachirqan.

¹⁰Cheqnikuqninkumantan paykunata qespichirqan, awqankumantan paykunata kacharichirqan.

¹¹Unun awqankutaqa millp'uykurqan, manan huknillankupas kawsarqanchu.

¹²Hinan ñawpa taytaykuqa prometesqankunata creerqanku, payta yupaychaspan takirqanku.

¹³Ichaqa usqhayllatan Diospa ruwasqankunata qonqapurqanku, manataq paypa yuyaychayninta chaskirqankuchu.

¹⁴Chay ch'inneqpin ima munasqankuta mikhuykuyta munarqanku, mana imaq kasqanpin Diosta wateqarqanku.

¹⁵Diosmi imatachus mañakusqankuta qorqan, ichaqa wañuna onqoywanmi paykunata hap'ichirqan.

¹⁶Karpa-karpapin Moisesta envidiakurqanku, Señor Diospa ch'uyanchasqan Aarontapas envidiakurqanku.

¹⁷Chaypachan pampa kicharikurqan, hinaspan Datanta millp'uykurqan, Abiram t'aqatapas p'ampaykurqan.

¹⁸¡Ninan chay t'aqa contra rawrarirqan! ¡Nina rawraymi millay runakunata ruphaykurqan!

¹⁹Horeb orqopin torillota ruwarqanku, qorita unuyachispa ruwasqanku idolotan yupaycharqanku.

²⁰Qhapaq-atiyniyoq Diosninkuta yupaychanankutaqa q'achu mikhuq toroq rikch'aynintan yupaycharqanku.

²¹Qespichiqninku Diostan qonqapurqanku, Egiptopi musphana ruwasqankunatan qonqapurqanku,

²²Campa miraynin suyupi musphanakuna ruwaqtan qonqapurqanku, Puka Qochapi utirayana ruwasqankunatan qonqapurqanku.

²³Hinaqtinmi Diosqa paykuna wañurqarichiyta yuyaykurqan, ichaqa akllakusqan Moisesmi paykunapaq mañapurqan, k'arak phiñakusqantan thanichirqan ama paykunata wañurqarichinanpaq.

²⁴Ima munay suyutan wikch'uykukurqanku, manan Diospa simi rimarisqanta creerqankuchu.

²⁵Karpanku ukhupin Señor Dios contra chhuchupakurqanku, manan simintapas kasurqankuchu.

²⁶Chaymi payqa makinta haywarispa jurarqan chay ch'inneqpi paykunata wañuchinanpaq,

²⁷suyukunaman mirayninkuta wikch'unanpaq, llaqtakunaman paykunata ch'eqechinanpaq.

²⁸Baal-peor diostan yupaycharqanku, wañusqakunaman haywasqa mikhunatan mikhurqanku.

²⁹Millay ruwasqankuwanmi Diosta phiñachirqanku, hinan wañuy onqoy paykunata mast'arqan,

³⁰ichaqa Fineesmi sayarispa huchallikuqta wañuchirqan, chaymi onqoyqa sayarparirqan.

³¹Chay chanin ruwasqanmantan Diosqa payta chaninpaq qhawarirqan, chay hinan wiñaypaq kanqa.

³²Meriba unuq kasqanpin Diosta phiñachillarqankutaq, hinan paykuna hawa Moisespaq mana allinchu kapurqan,

³³manañan Moisesqa pacienciakuyta atirqanñachu, chaymi mana rimananta rimarqan.

³⁴Señor Diosmi paykunata kamachirqan llaqtakunata wañuchinankupaq, ichaqa manan wañuchirqankuchu,

³⁵aswanmi mana iñiyniyoqkunawan mich'ukurqanku, hinaspan imaymana ruwasqankuta yachaqakurqanku.

³⁶Idolonkutan yupaycharqanku, chaykunan paykunata waqllichirqan.

³⁷Churinkutan ususinkutan supaykunaman sacrificiopi haywarqanku.

³⁸Mana huchayoq churinkutan, ususinkutan wañuchirqanku, paykunatan Canaán suyu idolokunaman sacrificiopi haywarqanku, chay suyutaq yawar hich'asqawan qhellichasqa karqan.

³⁹Ahinatan ruwasqankuwan qhellichakurqanku, ruwasqankuwanpas wasancharqanku.

⁴⁰Chaymi Señor Diosqa llaqtanpaq k'arakta phiñakurqan, hinan paykunata cheqnikurqan.

⁴¹Mana iñiyniyoq suyukunamanmi hap'iykachirqan, cheqnikuqninkutaq paykunata kamachirqan.

⁴²Awqankun paykunata saruncharqan, paykunatan pasaqta k'umuykachirqan.

⁴³Askha kutitan Diosqa paykunata kacharichirqan, paykunataq ichaqa yuyaykusqankupi k'ulluchakurqanku, huchallikushaspankun pisi kallpayapurqanku.

⁴⁴Chaywanpas, llaki-phutiypi kashasqankuta rikushaspanmi, waqyakusqankutapas uyarishaspanmi,

⁴⁵paykunarayku Diosqa rimanakusqanta yuyarirqan, hinaspan ancha hatun munakuyninman hina llamp'uyapurqan.

⁴⁶Llapa preso apaqninkunawanpas paykunataqa sumaqtan khuyapayachirqan.

⁴⁷¡Qespichiwayku Diosniyku, Señor Dios! Suyukuna ukhumanta huñumuwayku, ch'uya sutiykiman graciasta qonaykupaq, q'ochukuspa qanta yupaychanaykupaq.

⁴⁸Israelpa Diosnin Señorqa wiñay-wiñaypaq saminchasqa kachun. Llaqtallantintaq nichunku: ¡Amén! ¡Yupaychasqa Señor Diosqa kachun! nispa.