Read DIOSPA QHELQACHISQ Quechua SALMOS 109 Bible Online

SALMOS 109 - DIOSPA QHELQACHISQ Quechua bible

SALMOS 109

¹(Davidpa takin) Yupaychanay Diosníy, ama upallakuyñachu.

²Llullakuy simiwanmi, mana chanin simiwanmi millayta rimakuwanku, llullakuspan k'amiwanku.

³Cheqnikuyta munaspan muyuykuwanku, yanqa-qasipunin maqawanku.

⁴Paykunatan munakuni, chaywanpas paykunaqa tumpakuywanmi kutichiwanku, ñoqataq ichaqa paykunapaq mañapuni.

⁵Allinkaqmantan mana allinkaqwan kutichiwanku, munakusqaymantan cheqnikuwanku.

⁶Millay runata paypaqqa juezta churay, juzganapi paytaqa ch'atachun.

⁷Juzgasqa kaspa huchachasqa kachun, mañakusqallantaq paytaqa huchachachun.

⁸Ama unaytachu kawsachun, wak runataq ruwananta hap'ichun.

⁹Wawankuna mana taytayoq kapuchun, warminpas viuda qhepachun.

¹⁰Wawankunapas tomaqaya kapuchun, mañapakuspa purichun, thunisqa wasinkumanta paykunata wikch'upuchunku.

¹¹Manuqnin lliw kaqninkunata hap'ikapuchun, wak llaqtayoqkuna llank'asqanta llat'anachun.

¹²Ama pipas khuyapayaykuqnin kachunchu, amallataq wakcha wawankunata pipas llakipayaykuq kachunchu.

¹³Llapa miraynin tukukapuchun, qhepa miraypi sutin wiñaypaq chinkapuchun.

¹⁴Taytanpa huchallikusqanta Señor Diosqa yuyarichun, mamanpa huchallikusqanpas amataq chinkachunchu,

¹⁵Señor Diosqa huchankuta yuyarishallachunpuni, kay pachapipas paykunaqa qonqasqa kachunku.

¹⁶Manan payqa llakipayakuyta yuyarillarqanpaschu, aswanmi payqa wakchakunata, khuyay kaqkunata qatiykacharqan, llakiq ñit'isqankunatapas wañuchinankama.

¹⁷Hukkunata ñakayllatapuni munaqmi karqan, kunanqa ñakasqallataq paypas kachun. Manapunin saminchayta munaqchu karqan, paypas amallataq saminchasqachu kachun.

¹⁸Paypaqqa p'acha churakuy hinan ñakayqa karqan, paypaqqa unu ukyaykuy hinan ñakayqa karqan, paypaqqa tullunkunamanmi ñakayqa aceite hina wiswiykurqan.

¹⁹Ahinaqa, p'acha hina payta p'istuykuchun, chumpi hinataq payta mat'iykuchun.

²⁰Ahinata Señor Diosqa ch'atawaqniykunaman pagapuchun, ñoqamanta millayta rimaqkunamanqa chay hinatapuni kutichipuchun.

²¹Apu Señor Diosníy, ñoqata ichaqa khuyakuwaspayki yanapaykuway, sutiyki yupaychasqa kananpaq, munakuq sonqo kaspayki qespichiway.

²²Mana imayoq wakchan kashani, sonqo nanasqan kashani.

²³Llanthu hinan chinkaripushani, langosta hinan chhaphchisqa kashani.

²⁴Ayunasqaywanmi moqoykuna mana takyanchu, mana mikhuspaymi tulluyapushani.

²⁵Runakunaq asipayananmi kashani, rikuwaspankun asikuspa umankuta maywikunku.

²⁶Yanapaykuway, Diosnilláy Señor Dios, munakuyniykiman hina qespichiway.

²⁷Kayqa qanpa ruwasqayki kasqanta yachachunku, Señor Diosníy, qanpa qespichiwasqayki kasqayta yachachunku.

²⁸Paykunaqa ñakashawachunkupas, qantaq saminchashallawaypuni. Paykunaqa sayarishachunkupas, ichaqa p'enqachisqa kachunku, ñoqa kamachiykitaq kusikusaq.

²⁹Ch'ataqniykunaqa anchatapuni p'enqakuchunku, p'enqasqa k'umuykachachunku.

³⁰Anchatapunin Señor Diosman graciasta qosaq, askha runa ukhupin payta yupaychasaq.

³¹Payqa wakcha runamanmi sayakun, wañunanpaq huchachasqakunatan qespichin.