Read DIOSPA QHELQACHISQ Quechua SALMOS 132 Bible Online

SALMOS 132 - DIOSPA QHELQACHISQ Quechua bible

SALMOS 132

¹Señor Diosníy, Davidmanta yuyarikuy, tukuy sasachakuy muchusqankunamanta yuyarikuy.

²Jacobpa Kallpasapa Diosnin, Davidpa prometekusqasuykimanta yuyarikuy, Davidpa jurasqasuykimanta yuyarikuy. Paymi nisqa:

³Manan wasiyta haykusaqchu, manan puñunaypipas puñusaqchu,

⁴manan puñurillasaqpaschu, manan ch'illmiykullasaqpaschu,

⁵Señor Diospaq tiyana wasita ruwanaykama, Jacobpa Kallpasapa Diosninpaq wasita sayarichinaykama, nispa.

⁶Efratapin rimanakuy arcaqa kashan, nisqatan uyarirqayku, Jaar nisqa sach'a-sach'apin chayta tarimurqayku.

⁷Nirqaykun, ¡Señor Diospa ch'uya tiyananman risunchis! ¡Ñawpaqenpi qonqorikusunchis! nispa.

⁸Señor Diosníy, atiyniykita rikuchiq arcantin sayariy, samakunaykimantaq hampuy.

⁹Sacerdoteykikuna chanin-kaywan p'achallikuchunku, qan sonqo runaykikunapas kusisqa qaparichunku.

¹⁰Kamachiyki Davidman prometesqaykirayku, akllakusqayki reyta ama qonqarpariychu.

¹¹Cheqaqtapunin Señor Diosqa Davidman jurarqan, chay jurasqantaqa manan yanqayachinqachu. Paymi nirqan: “Huknin churiykitan reyta churasaq”, nispa.

¹²Churiykikunachus rimanakuyniytapas, paykunaman yachachisaq chay kamachikuyniykunatapas hunt'anqaku chayqa, churinkupas suyupiqa kamachikushallanqakupunin.

¹³Señor Diosqa Sión orqotan akllakurqan, tiyananpaq chayta munaspan nirqan:

¹⁴Sionta munakuspaymi chaypi kamachikusaq, Sionmi wiñaypaq samakunayqa.

¹⁵Askha mikhunawanmi saminchasaq, wakcha runankunatan t'antawan saksachisaq.

¹⁶Sacerdotenkunatapas qespikuywanmi p'achachisaq, ñoqa sonqo runankunapas kusisqallañan qaparinqaku.

¹⁷Chaypin Davidpa atiyninta wakmanta paqarichisaq, akllakusqay reypaqmi lamparata wakichipuniña.

¹⁸Awqankunatan p'enqasqata k'umuykachisaq, paypa coronantaqmi sumaqta k'ancharinqa, nispa.