Read DIOSPA QHELQACHISQ Quechua SALMOS 139 Bible Online

SALMOS 139 - DIOSPA QHELQACHISQ Quechua bible

SALMOS 139

¹(Davidpa takin) Señor Diosníy, qanmi t'aqwiwankipas reqsiwankipas,

²qanmi tiyaykusqaytapas sayarisqaytapas yachanki, yuyaykusqaytapas karumantaraqmi sut'itapuni yachanki.

³Qanmi purinaytapas samarinaytapas yachanki, tukuy ima ruwasqaytapas qhawankin.

⁴Manaraq rimarishaqtiymi, Señor Diosníy, qanqa llapantaña yachanki.

⁵Tukuyneqmantan muyuykuwarqanki, makiykiwantaqmi waqaychawankipas.

⁶Chay yachayniykimanqa manan yuyayniy taripanchu, sinchi hatunmi, manan aypayta atinichu.

⁷¿Maymantaq Espirituykimanta risaq? ¿Maymantaq qayllaykimanta ayqesaq?

⁸Hanaq pachaman wichasaq chaypas, chaypin qanqa kashanki. Wañuy-pachaman uraykusaq chaypas, chayllapitaqmi qanqa kashanki.

⁹Inti lloqsimuyman phalasaq chaypas, inti haykuy lamar-qocha karu patapi tiyasaq chaypas,

¹⁰chaypipas makiykiqa pusawanqan, paña makiykiqa hap'ishallawanqan.

¹¹Laqhayaqtaña pakaykuway niyman chaypas, laqhayaqqa astawanraqmi k'anchaykuwanqa,

¹²laqhayaqpas manan qanpaqqa laqhayaqchu, tutapas p'unchay hinan k'ancharin, k'anchaypas tutapas kaqllan qanpaqqa.

¹³Qanmi sonqo ruruyta ruwarqanki, qanmi mamaypa wiksanpi hank'ukunawan minichawarqanki.

¹⁴Ancha musphana ruwasqa kasqaymantan yupaychayki, utirayanapaqmi ruwasqaykikunaqa, allintapunin chaytaqa yachani.

¹⁵Cuerpoypa wiñasqantapas qanqa rikurqankin pakallapi kamasqa kashaqtiypas, hallp'aq sonqonpi sumaq minichasqa kashaqtiypas.

¹⁶Wiksallapiraq kashaqtiymi rikuwarqankiña. Hayk'a watachus kawsanaymi qelqaykipi qelqasqaña karqan, manaraq huk watallapas chayamushaqtin.

¹⁷Diosníy, ñoqapaqqa ancha chaniyoqmi yuyaykusqaykikunaqa, ancha askhallañan chaykunaqa.

¹⁸Chaykunata yupariyta munayman chaypas, aqomantapas aswan askharaqmi kanman. Rikch'arispaypas qanllawanpunin kashani.

¹⁹Diosníy, ¡maytan munayman millay runakunata wañuchinaykita! ¡Maytan munayman runa wañuchiqkuna ñoqamanta karunchakunanta!

²⁰Paykunaqa millaytan qanmanta rimanku, awqaykikunan yanqapuni sutiykita hoqarinku.

²¹Señorníy, ¿manachu cheqnipakuqniykikunataqa cheqnikuyman? ¿Manachu awqaykikunataqa millakuyman?

²²Sinchitapunin paykunataqa cheqnikuni, paykunataqa awqaykunata hinan rikuni.

²³Diosníy, t'aqwiriway, sonqoyta reqsiykuway, allinta probaykuway, yuyaykuyniykunata reqsiykuy.

²⁴Qhawariway, urmachiq ñanpipaschá purishani, wiñay ñanninta pusakuway.