Read DIOSPA QHELQACHISQ Quechua SALMOS 19 Bible Online

SALMOS 19 - DIOSPA QHELQACHISQ Quechua bible

SALMOS 19

¹(Davidpa takin) Diospa qhapaq-atiyninmantan hanaq pachaqa sut'ita willakun, kamasqanmantan hanaq pachaqa sut'inchan.

²Huk p'unchaymi hukkaq p'unchayman willan, huk tutapas hukkaq tutaman yachachin.

³Rimayña mana kanchu chaypas, ima simiña mana uyarikunchu chaypas,

⁴kunkankuqa pachantinmanmi chayan, teqsimuyuntinmanmi aypan. Chaypin Diosqa intipaq tiyanata ruwapurqan,

⁵intitaq chayllaraq casarakuq novio hina tiyananmanta lloqsimun, llallinakuypi phawaq hinataq kusisqa ñanninta purin.

⁶Huknin ladomantan intiqa lloqsimun, muyuspataq hukkaq ladoman chayan, manataq imapas ruphayninmantaqa pakakunmanchu.

⁷Señor Diospa yachachikuyninqa chaninpunin, sonqotan llanllachin. Señor Diospa unanchasqa siminqa mana kuyuqmi, mana yachaqtan yachayniyoqman tukuchin.

⁸Señor Diospa churasqan simikunaqa chaninpunin, sonqotan kusichin. Señor Diospa kamachikuyninqa sut'ipunin, ñawitan kicharin.

⁹Señor Diosta manchakuyqa ch'uyan, wiñaypaqmi sayan. Señor Diospa chaninchayninkunaqa cheqaqmi, llapallanmi chaninkama,

¹⁰qorimantapas aswan munanan, ch'uyanchasqa askha qorimantapas ancha munanan, lachiwanamanta sut'umuq mielmantapas aswan misk'in.

¹¹Ñoqa kamachiykitaqa chaykunan anyaykuwan, kamachikuyniykikunata kasuqqa allin premiotan chaskin.

¹²Manan pipas pantasqankunataqa reparakuyta atinchu. ¡Señor Diosníy, mana reparaspa huchallikusqayta pampachaykuway!

¹³Kamachiykiq hatunchakuspa huchallikunaymanta hark'aykuway, ama chay huchakuna atipawachunchu. Chaypachan mana huchachana kasaq, hatun huchallikuytaqa manan ruwasaqchu.

¹⁴Señor Diosníy, hatun Qaqaymi, qespichiqniymi kanki, simi rimarisqaykunapas yuyaykusqaykunapas sonqoykipaq hinapuni kachun.