Read DIOSPA QHELQACHISQ Quechua SALMOS 2 Bible Online

SALMOS 2 - DIOSPA QHELQACHISQ Quechua bible

SALMOS 2

¹¿Imaraykutaq suyukunaqa awqa sayarinku? ¿Imaraykutaq llaqtakunaqa yanqapaq yuyaychanakunku?

²Señor Dios contran, hawisqan rey contran kay pacha reykunaqa sayarinku, kamachikuqkunan huk-nisqalla rimanakunku.

³Paykunan qaparinku: ¡Watawasqanchiskunata p'itirqarisun! ¡Watunkunata paskarqarisun! nispa.

⁴Hanaq pachapi kamachikuqqa asikunmi, Señor Diosqa paykunata asipayanmi.

⁵K'arakta phiñakuspan paykunata mancharichin, sinchi phiñasqan paykunata nin:

⁶— Ch'uya orqoy Sionpin reyniyta churaniña, nispa.

⁷Ñoqan Señor Diospa kamachikusqan simita willasaq: Señor Diosmi niwanña: Qanmi churiy kanki, kay p'unchaymi ñoqa churiyayki.

⁸Mañakullaway, suyukunatan qosqayki herenciayki kananpaq, lliw teqsimuyuntintan qosqayki kaqniyki kananpaq.

⁹Fierro tawnaykiwanmi suyukunata waqtanki, k'arpa mankata hinan paykunata p'akinki, nispa.

¹⁰Kay pacha reykuna, kayta uyariychis, kay pacha kamachikuqkuna, anyaykusqata hap'ikuychis.

¹¹Manchakuywan Señor Diosta yupaychaychis, khatatataspa ñawpaqenman k'umuykuychis.

¹²Churita yupaychaychis, usqhayllatan k'arakta phiñakunman, paqtan phiñakuspa qonqaylla wañuchisunkichisman. ¡Kusisamiyoqmi llapa payman k'askaykukuqkunaqa!