Read DIOSPA QHELQACHISQ Quechua SALMOS 22 Bible Online

SALMOS 22 - DIOSPA QHELQACHISQ Quechua bible

SALMOS 22

¹(Davidpa takin) Diosníy, Diosníy, ¿imanaqtinmi saqerpariwanki? ¿Imanaqtinmi qespichiwanaykitaqa karunchakuwanki? ¿Imanaqtinmi khuyay qaparimusqayta mana uyariwankichu?

²Diosníy, p'unchaymi waqyakamuyki, manataq uyariwankichu, tutan waqyakamuyki, manataq samarisqay kanchu.

³Chaypas qanmi ch'uya-kaypi kamachikushanki, qantan Israel runakunaqa yupaychashasunki.

⁴Qanpin tayta-mamaykuqa hap'ipakurqanku, qanpin suyakurqanku, qantaq paykunata qespichirqanki.

⁵Qanmanmi waqyakamurqasunkiku, qantaq qespichirqanki, qanpin hap'ipakurqanku, manataq p'enqachirqankichu.

⁶Ñoqan ichaqa kurulla kani, manan runachu, runakunaq asipayanan, llaqtaq pisichanan.

⁷Lliw rikuwaqniykunan asipayawanku, q'esupayaspan umankuta maywipayawanku:

⁸Kayqa Señor Diosmanmi hap'ipaykukurqan, Señor Diosyá payta qespichichun, paytataq munakunpuni chayqa, qespichichunyá, nispa.

⁹Chaypas, qanmi mamaymanta paqarichimuwarqanki, mamaypa arphinpin samaykachiwarqanki.

¹⁰Paqarimuqtiy hinan qanman hap'iykachiwarqanku, wiksamantapachañan qanqa Diosniy kanki.

¹¹Ama karunchakuwaychu, llaki-phutiyñan qayllaykamuwan, manan pipas yanapaykuwaqniy kanchu.

¹²Awqaykunan askha torokuna hina muyuykuwanku, Basán phiña torokuna hinan ch'unkukamuwanku.

¹³Qaparispa llik'irqariq leonkuna hinan siminkuwan qhansaykuwanku.

¹⁴Hich'asqa unu hinan kani, llapa tulluykunan q'ewirqarikun. Unuyasqa wira hinan sonqoyqa ukhuypi kashan.

¹⁵Kallpayqa k'arpa hinan karqapun, qalluypas simi ukhuypin k'askarqapun, aya p'ampanakaman chinkaykachiwanki.

¹⁶Alqokunan muyuykuwanku, askha millay runakunan ch'unkukamuwanku, makiykunata chakiykunata t'oqowaspanku.

¹⁷Llapa tulluykunatan yupayman, chaykamataq paykunaqa millapakuspa mana kacharispa qhawawanku.

¹⁸P'achaytan rakinakunku, p'achaypaqmi sorteanku.

¹⁹Señor Diosníy, ¡ama karunchakuwaychu! Kallpachaqniy Diosníy, ¡yanapaykuwanaykipaq usqhaykamuy!

²⁰Espadaq wañuchiwananmanta qespichiway, chay alqokunaq atiyninmanta horqoway.

²¹Chay leonkunaq siminmanta qespichiway, chay salqa torokunaq waqrawananmanta kacharichiway. ¡Qanmi kunan uyarimuwankiña!

²²Wawqeykunamanmi qanmanta willasaq, huñukuyninkupin yupaychasqayki.

²³Señor Diosta manchakuqkuna, ¡payta yupaychaychis! Jacobpa llapa mirayninkuna, ¡payta hatunchaychis! Israelpa llapa ayllunkuna, ¡payta manchakuychis!

²⁴Payqa manan wakchakunaq muchusqanta pisicharqanpaschu qhawarparirqanpaschu, manallataqmi paykunamantaqa pakakunpaschu, aswanpas payta waqyarikuqtinkuqa uyarirqanmi.

²⁵Qantan hatun huñunakuypi yupaychasqayki, manchakuqniykikunaq qayllanpin prometekusqayta hunt'apusqayki.

²⁶K'umuykachisqakunan saksaykunankukama mikhunqaku, Señor Diosman llapa hamuqkunan yupaychanqaku. Wiñaypaq allin sonqollayoqpuni kawsachunku.

²⁷Llapa suyukunan yuyarispa Señor Diosman kutipunqaku, teqsimuyuntin runakunan ñawpaqenpi qonqorikunqaku.

²⁸Señor Diosmi kamachikuq reyqa, paymi suyukunata kamachin.

²⁹Arí, llapa anchaykachaqkunan payman k'umuykukunqaku, llapa wañukapuqkunan payman k'umuykukunqaku, paykunaqa hallp'aman tukuq runan kanku.

³⁰Qhepa miraykunan Señor Diosta yupaychanqaku, paymantan qhepa wiñayman willanqaku,

³¹qhepa naceqkunamanmi chaninchaynintapas ruwasqankunatapas willanqaku.