Read DIOSPA QHELQACHISQ Quechua SALMOS 26 Bible Online

SALMOS 26 - DIOSPA QHELQACHISQ Quechua bible

SALMOS 26

¹(Davidpa takin) Señor Diosníy, chaninchaykapuway, mana huchachanatapunin kawsani, qanmanmi qaqatapuni hap'ipakamuyki.

²Señor Diosníy, qhawariway, t'aqwiriway, yuyayniyta reqsiykuway, tukuy sonqoytapas qhawaykuway.

³Hatun munakuyniykiqa ñoqapin kashallanpuni, cheqaq kayniykipin purishallani.

⁴Manan ch'achu runawan tiyanichu, manan iskay uyakunawanpas huñunakunichu.

⁵Millaykunaq huñunakuynintan cheqnikuni, waqllisqakunawanqa manan tiyanichu.

⁶Señor Diosníy, huchamanta mayllisqaña makintinmi altarniykiman muyuykusaq,

⁷yupaychaykunata takin-takin, musphana ruwasqaykikunatapas willan-willan.

⁸Señor Diosníy, tiyasqayki wasitan munakuni, qhapaq-atiyniykiq kanan wasitan munakuni.

⁹Ama huchasapakunatawan kuskataqa wañuchiwaychu, ama runa wañuchiqkunata hinapas rikuwaychu.

¹⁰Chaykunaqa millaytakaman hap'ishanku, paña makinkupin lluk'iykusqakunata hap'ishanku.

¹¹Kawsayniymi ichaqa ch'uyallaña kashan, kacharichiway khuyapayaykuway.

¹²Mana kuyuriqmi sayashani, huñunasqa runakuna qayllapin Señor Diosta saminchasaq.