Read DIOSPA QHELQACHISQ Quechua SALMOS 31 Bible Online

SALMOS 31 - DIOSPA QHELQACHISQ Quechua bible

SALMOS 31

¹(Davidpa takin) Señor Diosníy, qanmanmi hap'ipakamuyki, ama hayk'aqpas p'enqachisqa kanayta munaychu. Qanqa chanin Diosmi kanki, qespichiway.

²¡Uyariykamuway! ¡Qespichillawayña! Pakaykuwaqniy Qaqay kay, Qespichiwaqniy pukaray kay.

³Qanmi Qaqaypas pakakunaypas kanki, pusaway waqaychaykuway, sutiyki yupaychasqa kananpaq.

⁴Ñoqapaq churasqanku toqllamanta horqoway, qanmi pakaykuwaqniyqa kanki.

⁵Qanmanmi espirituyta hap'iykachimuyki, Señor Diosníy, qanmi kacharichiwanki, hunt'aq Diosmi kanki.

⁶Ñoqaqa qanllamanpunin hap'ipakamuyki, yanqa ídolo yupaychaykunatan ichaqa cheqnikuni.

⁷Anchatapunin munakuwanki, chaymi q'ochukuspa kusikusaq. Qanmi muchusqaykunata rikurqanki, llakikusqaykunatapas yacharqanki.

⁸Manan awqaman hap'iykachiwarqankichu, sinchi sasa kawsaymantan kacharichimuwarqanki.

⁹Señor Diosníy, khuyapayaway, llaki-phutiypin rikukuni, llakikuymi ñawiytapas sonqoytapas llapallanta naq'echishawan.

¹⁰Kawsayniyqa nanaywanmi thantakapushan, wataykunapas llakikuywanmi chinkaripushan, waqasqaywanmi kallpay pisiyapushan, tulluykunan mullphayapushan.

¹¹Ñoqaqa kani awqaykunaq p'enqachinanmi, runamasiykunaqpas manchapakunanmi, reqsiwaqniykunaqpas mancharikunanmi. Hawapi rikuwaqniykunapas ayqerikuwankun.

¹²Wañusqata hinan llapalla qonqapuwanku, p'akisqa p'uyñu hinan kapuni.

¹³Askhaq chhiwchillapi rimasqantan uyarini, ¡hinantinpin manchakuy muyuykuwan! Huk-nisqallan contraypi rimanakunku, wañuchiwanankupaqtaq yuyaykunku.

¹⁴Señor Diosníy, ñoqaqa qanmanmi hap'ipaykukuyki. Niykin: ¡Qanmi Diosniyqa kanki! nispa.

¹⁵Qanpa makiykipin kawsayniyqa kashan, awqaykunamanta, qatiykachawaqniykunamanta qespichiway.

¹⁶Munakuq sonqoykiwan kamachiykita qhawarimuway, khuyakuwaspayki qespichiway.

¹⁷Señor Diosníy, waqyakamuykin, ama p'enqachisqa kanayta munaychu. Millay runakunataqa p'enqachiy, Wañuy-pachaman ch'inlla uraykuchunku.

¹⁸Llullakunaqa upallachunku, chanin runa contran anchaykachaspa pisichaspa k'arakta rimanku.

¹⁹¡May hatunmi yupaychaqniykikunapaq waqaychasqayki munakuq sonqo-kayniykiqa! ¡May hatunmi hap'ipakuqniykikunapaq runakunaq rikushasqan ruwasqaykiqa!

²⁰Hark'aykusqaykiwanmi runaq millay yuyaykusqankunamanta paykunata qespichinki, pakaykusqaykiwanmi awqankuq k'amikuyninmanta paykunata waqaychanki.

²¹Saminchasqa Señor Diosqa kachun, allin perqasqa llaqta muyuykusqa hina kashaqtiymi, munakuwaspa musphanakunata ruwarqan.

²²Llakipakusqaypin nirqani: Qayllaykimantan wikch'usqaña kapuni, nispa. Ichaqa yanapayta mañakamuqtiymi qanqa waqyakamusqayta uyarimuwarqanki.

²³Señor Diosta munakuychis, llapa paypi sonqollikuqkuna, Señor Diosqa llapa paypaq hunt'aqkunatan waqaychan, uma hoqariqkunatataq sinchita muchuchin.

²⁴Señor Diosman llapa hap'ipaykukuqkuna, kallpachakuychis, sonqoykichispas kawsarichun.